سەناتتا بۇگىن «قازاقستان رەسپۋبليكاسىنىڭ شەكارا ساياساتى – نورماتيۆتىك قۇقىقتىق رەتتەۋدىڭ جاي-كۇيى مەن پەرسپەكتيۆالارى» تاقىرىبىنا ارنالعان دوڭگەلەك ۇستەل ءوتتى. وعان قۇقىق قورعاۋ, ورتالىق مەملەكەتتىك جانە جەرگىلىكتى اتقارۋشى ورگانداردىڭ وكىلدەرى قاتىستى.
«شەكارا ساياساتى مەملەكەتتىڭ سىرتقى جانە ىشكى ساياساتىنىڭ ءبىر بولىگى. سوندىقتان ول ەلدىڭ ۇلتتىق قاۋىپسىزدىگىنىڭ قۇرامداس بولىگى سانالاتىن شەكارا قاۋىپسىزدىگىن قامتاماسىز ەتۋدىڭ تۇتاس جۇيەسىن قۇرۋعا باعىتتالۋى ءتيىس», – دەدى مۇحتار قۇل-مۇحاممەد.
كەزدەسۋ بارىسىندا ەلىمىزدە العاش رەت ازىرلەنىپ جاتقان شەكارا ساياساتىنىڭ تۇجىرىمداماسى كەڭىنەن تالقىلاندى. ونىڭ دايىنداۋ قازاقستان رەسپۋبليكاسىنىڭ شەكارا ساياساتى سالاسىندا جۇيەلى, عىلىمي نەگىزى بار ۇلتتىق ستراتەگيانىڭ قاجەتتىگىنەن تۋىنداپ وتىر. سەناتورلاردىڭ ايتۋىنشا, شەكارا ساياساتى شەكارا ماڭىنداعى ەلدى مەكەندەردىڭ الەۋمەتتىك-ەكونوميكالىق دامۋىن جانە ونداعى تۇرعىنداردىڭ ءال-اۋقاتىن جاقسارتۋدى قامتاماسىز ەتۋ ماسەلەلەرىن دە قامتۋى كەرەك.
«شەكارا ساياساتىنىڭ نەگىزگى باعىتتارى شەكارا ماڭىنداعى اۋماقتاردى الەۋمەتتىك-ەكونوميكالىق دامىتۋ. سونداي-اق, حالىقتىڭ ءال-اۋقاتىن ارتتىرۋ, مەملەكەتتىك شەكارالاردى حالىقارالىق-قۇقىقتىق رەسىمدەۋدى جۇزەگە اسىرۋ, شەكارا ىنتىماقتاستىعىن دامىتۋ جانە شەكارا ساياساتى سالاسىندا عىلىمي ءبىلىم جۇيەسىن قالىپتاستىرۋ», – دەدى مۇحتار قۇل-مۇحاممەد.
شەكارا ساياساتىنىڭ تۇجىرىمداماسىن ازىرلەۋدىڭ ماقساتى شەكارا قاۋىپسىزدىگىن قامتاماسىز ەتۋدىڭ نەگىزگى باعىتتارى, شەكارا سالاسىنداعى ۇلتتىق مۇددەلەردى ىسكە اسىرۋ, مەملەكەتارالىق شەكارا ىنتىماقتاستىعىن دامىتۋ جانە نىعايتۋ, مەملەكەتتىك شەكارانىڭ تۇتاستىعىنا قول سۇعۋشىلىقتىڭ الدىن الۋ جانە جولىن كەسۋ بويىنشا رەسمي كوزقاراستاردى قالىپتاستىرۋ بولىپ تابىلادى. وتىرىس بارىسىندا سىرتقى جانە ىشكى كوشى-قون, شەكارا ايماعىنداعى قوعامدىق قاۋىپسىزدىكتى قامتاماسىز ەتۋ, مەملەكەتتىك شەكارادا وتكىزۋ پۋنكتتەرىنىڭ ينفراقۇرىلىمىن قۇرۋ جانە دامىتۋ ماسەلەلەرى تالقىلاندى.
