ايماقتار • 02 ءساۋىر، 2021

قاراعاندىلىق پوليتسەيلەر قۇنى 24 ملرد تەڭگە بولاتىن ەسىرتكى تاركىلەدى

197 رەت كورسەتىلدى

قاراعاندى وبلىستىق پوليتسيا دەپارتامەنتىنىڭ ەسىرتكىگە قارسى ءىس-قيمىل باسقارماسىمەن بىرگە جۇرگىزىلگەن ارنايى وپەراتسيالار بارىسىندا قاراعاندى، اقمولا وبلىستارىندا جانە پاۆلودار قالاسىندا جۇمىس ىستەپ كەلگەن ءتورت ەسىرتكى زەرتحاناسى انىقتالدى، دەپ حابارلايدى Egemen.kz وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.

بۇل زەرتحانالاردا سينتەتيكالىق ەسىرتكى زاتتارى دايىندالىپ، كەيىن ول ساتىلىمعا جىبەرىلمەكشى بولعان.

ناۋرىزدىڭ 31-ءى كۇنى جۇرگىلىگەن ارنايى وپەراتسيا بارىسىندا اقمولا وبلىسىندا قىلمىستىق توپتىڭ ۇيىمداستىرۋشىسى قولعا ءتۇستى. قاراعاندى وبلىسىنىڭ 30 جاستاعى تۇرعىنى اتالعان وڭىردەن ءۇي ساتىپ الىپ، ونىڭ ءىشىن ءىرى كولەمدە سينتەتيكالىق ەسىرتكى زاتتارىن جاسايتىن قۇرال-سايمانمەن جابدىقتاپ،  كەيىن جاسالعان ەسىرتكىنى باسقادا وڭىرلەرگە ساتپاقشى بولعان. سانكتسيالانعان ءتىنتۋ جۇرگىزۋ بارىسىندا ۇستالعان ازاماتتان ءۇش كيلوگراممنان استام دايىن «مەفەدرون» ەسىرتكى زاتى جانە 35 ليتر سۇيىق «مەفەدرون» ەسىرتكى زاتى، سونداي-اق ءۇش مىڭ ليتر سۇيىق، شامامەن 50 كيلوگرامم جاپپاي پرەكۋرسورلار الىندى.

قاراعاندى وبلىستىق پوليتسيا دەپارتامەنتىنىڭ باستىعى ەرلان فايزۋللين بۇعان دەيىن ءتارتىپ ساقشىلارىنىڭ قىلمىستىق ارەكەتتەرىن قاراعاندى وبلىسى، نۇر-سۇلتان، الماتى جانە پاۆلودار قالالارىندا ىسكە اسىرىپ كەلگەن  ۇيىمداسقان قىلمىستىق توپتىڭ بەلدى مۇشەلەرىنىڭ ۇستالعانىن حابارلادى. اتاپ ايتقاندا، ولار – الماتى قالاسىنىڭ 32 جاستاعى، اقمولا وبلىسىنىڭ 35 جاستاعى جانە پالودار قالالارىنىڭ 21 جاستاعى تۇرعىندارى.

 جوعارىدا ايتىلعان جەدەل ءىس-شارا بارىسىندا، قىلمىستىق توپتىڭ اينالىمنان وتكىزۋگە دايىنداپ قويعان 100 مىڭ ءبىر رەتتىك دوزاعا تەڭ، قارا بازارداعى قۇنى شامامەن 1 ميلليارد 600 ميلليون بولاتىن 50 كيلوگراممنان استام ەسىرتكى زاتى تاركىلەندى. ساراپشىلاردىڭ ايتۋىنا قاراعاندا،  قىلمىستىڭ جولى كەسىلمەگەندە، كۇدىكتىلەر پرەكۋرسورلاردان قارا بازارداعى قۇنى 24 ميلليارد تەڭگە بولاتىن ەسىرتكىنىڭ ءبىر جارىم ميلليون دوزاسىن جاساپ، بۇكىل ەلگە تاراتادى ەكەن.

سوڭعى جاڭالىقتار

ۇقساس جاڭالىقتار