“بالداۋرەندە” وتكەن دوڭگەلەك ۇستەل

پارلامەنت ءماجىلىسىنىڭ الەۋمەتتىك-مادەني دامۋ  كوميتەتى  ءبىلىم جانە عىلىم مينيستر­لىگىمەن بىرلەسىپ, “بالداۋرەن” رەسپۋبليكالىق وقۋ-ساۋىقتىرۋ ورتالىعىندا “قازاقستان رەسپۋبليكاسىنداعى بالالار مەن جاسوسپىرىمدەردىڭ جازعى دەمالىسىن, ساۋىقتىرۋ جانە جۇمىسپەن قامتىلۋىن ۇيىمداستىرۋ” تاقى­رىبىندا دوڭگەلەك ۇستەل وتكىزدى. دوڭگەلەك ۇستەلگە قاتىسۋشىلار “بالداۋرەن” ورتالىعىنىڭ جۇمىسىمەن تانىسىپ, لاگەردە دەمالىپ جاتقان بالالارمەن كەزدەسىپ اڭگىمە­لەستى, ساباقتارىنا قاتىستى. ودان كەيىن دوڭگە­لەك ۇستەلدىڭ كۇن تارتىبىنە سايكەس ءبىلىم جانە عىلىم مينيسترلىگىنىڭ بالالاردىڭ قۇقىقتارىن قورعاۋ كوميتەتىنىڭ ءتورايىمى رايسا شەردىڭ “قازاقستان رەسپۋبليكاسىنداعى بالالار مەن جاسوسپىرىمدەردىڭ جازعى دەمالىسىن, ساۋىقتىرۋ جانە جۇمىسپەن قامتىلۋىن ۇيىمداستىرۋ جاعدايى تۋرالى” دەگەن تاقىرىپتاعى باياندا­ماسى تىڭدالدى. وندا جىل سايىن ەلىمىزدە ءار ءتۇرلى ۇلگىدەگى 10 مىڭنان استام لاگەردىڭ جۇمىس ىستەپ, 1 ميلليوننان استام بالانى قامتيتىنى ايتىلدى. سودان كەيىن باسقوسۋعا قاتىسۋشىلارعا “ارتەك” (ۋكراينا), “ورلەنوك”, “وكەان” (رەسەي), “زۋبرەنوك” (بەلارۋس) حالىقارالىق بالالار ورتالىقتارىنىڭ جۇمىسى تۋرالى فيلم  كورسەتىلىپ, “بالداۋرەن” رەسپۋبليكالىق وقۋ-ساۋىقتىرۋ ورتالىعىنىڭ دامۋ بولاشاعى تۋرالى ونىڭ باس ديرەكتورى مۇحيتدين تولەپ­باەۆ ءسوز سويلەدى. ونىڭ مالىمدەۋىنشە, “بالداۋرەن” روسو جىل بويى جۇمىس ىستەيدى جانە اۋىسىمىنا ۇزدىك وقۋى, بەلسەندى ومىرلىك ۇستانىمى ءۇشىن كونكۋرستىق نەگىزدە جولداما العان 11-دەن 15 جاسقا دەيىنگى 300 بالاعا دەيىن قابىلدايدى. وقۋشىلاردىڭ جازعى دەمالىسىن دامى­تۋدىڭ وڭىرلىك ماسەلەلەرىن شەشۋ بويىنشا ءوز اۋماقتارىندا جىل بويى جۇمىس ىستەيتىن بالالار ورتالىقتارى بار وڭتۇستىك قازاقستان جانە ماڭعىستاۋ وبلىستارى ءبىلىم باسقار­مالارىنىڭ باستىقتارى ءوز ۇسىنىستارىمەن ءبولىستى. ەلىمىزدە مۇنداي ورتالىقتار – جەتەۋ. بالالار مەن جاسوسپىرىمدەردىڭ جازعى دەمالىسىن, ساۋىقتىرۋ مەن جۇمىسپەن قامتىلۋىن قارجىلاندىرۋ جاعدايى تۋرالى  قارجى مينيسترلىگى دەپارتامەنت ديرەكتورى­نىڭ ورىنباسارى ۆارۆارا ۇسىپبەكوۆا ايتىپ بەردى. باسقوسۋعا قاتىسۋشىلار اتالعان جۇمىستى جەتىلدىرۋ ماسەلەلەرى بويىنشا سۇراق-جاۋاپتارمەن پىكىر الماستى, ساۋىقتىرۋ لاگەرلەرى جۇيەسىن بۇدان ءارى دامىتۋ تۋرالى ۇسىنىستاردى تالقىلادى. قاتىسۋشىلار قابىلدانىپ وتىرعان شارالارعا قاراماستان, بالالار مەن جاسوسپىرىمدەردىڭ دەمالىسىن ۇيىمداستىرۋ  جانە  ساۋىقتىرۋمەن قامتۋ شارالارى جەتكىلىكسىز دەگەن پىكىرگە كەلدى. ساۋىقتىرۋ لاگەرلەرىنە از قامتاماسىز ەتىلگەن, كوپ بالالى وتباسىلارى بالالارىنىڭ قولجەتىمدىلىگى پروبلەمالىق ماسەلە بولىپ وتىر – رەسپۋبليكا بويىنشا جازعى بالالار لاگەرلەرىنە جولدامانىڭ ورتاشا باعاسى 7 مىڭ تەڭگەدەن 45 مىڭ تەڭگەگە دەيىنگى ارالىقتى قۇرايدى. دوڭگەلەك ۇستەل جۇمىسىنىڭ قورىتىندىسى بويىنشا بالالار مەن جاسوسپىرىمدەردىڭ جازعى دەمالىسىن ۇيىمداستىرۋدى جەتىلدىرۋ, جازعى كەزەڭدە وقۋشىلاردى ساۋىقتىرۋ, جۇمىسپەن قامتۋدى قامتاماسىز ەتۋدىڭ جاڭا تۇرعىلارىن دايىنداۋ, بالالار مەن جاسوسپىرىمدەردىڭ دەمالىسىن, ساۋىقتىرۋ جانە جۇمىسپەن قامتىلۋىن دايىنداۋ جانە ۇيىمداستىرۋ بويىنشا بارلىق دەڭگەيدە كوميسسيالار قۇرۋ, سونداي-اق بالالار لاگەرلەرىن پايدالانۋعا قابىلداۋ دايىندىعى, بارلىق قالا سىرتىنداعى لاگەرلەر مەن دەمالىس ايماقتارىن ەسەپكە الۋ, ولاردى قازاقستان رەسپۋبليكاسىنىڭ زاڭدارىنا سايكەس ليتسەنزيالارمەن قامتۋ, اتا-انالارىنىڭ قامقورلىعىنسىز قالعان بالالاردى, مەملەكەتتىك قولداۋعا مۇقتاج كوپ بالالى, تولىق ەمەس, از قامتىلعان وتباسىنىڭ بالالارىن, ءومىردىڭ قيىن جاعدايىندا قالعان “تاۋەكەل” توپتىڭ بالالارىن, ەكولوگيالىق جايسىز اۋدانداردا تۇراتىن بالالاردى, مۇگەدەك بالالاردى جانە دامۋداعى مۇمكىندىكتەرى شەكتەۋلى بالالاردى جازعى كەزەڭدە جەرگىلىكتى بيۋدجەت قاراجاتى ەسەبىنەن تەگىن جولدامامەن قامتاماسىز ەتۋ, ەڭبەك زاڭدارىنا سايكەس جازعى كانيكۋل كەزىندە ۋاقىتشا جۇمىس ورىندارىن قۇرۋ جولىمەن جاسوسپىرىمدەردى جۇمىسپەن قامتۋ تۋرالى ۇسىنىستار قابىلداندى. دوڭگەلەك ۇستەل جۇمىسىنا پارلامەنت دەپۋتاتتارى, بىرقاتار ورتالىق جانە جەرگىلىكتى اتقارۋشى ورگانداردىڭ وكىلدەرى قاتىستى. ساۋلە دوسجانوۆا, جۋرناليست.