شارا پرەزيدەنت قاسىم-جومارت توقاەۆتىڭ باستاماسىمەن ۇيىمداستىرىلعان «يگى ىستەر مارافونى» اياسىندا ءوتتى.
جامبىل وبلىسى ءبىلىم باسقارماسىنىڭ مالىمەتىنشە, قورداي اۋدانىندا ەرەكشە ءبىلىم الۋعا قاجەتتىلىگى بار 910 بالا تۇرادى, ونىڭ ىشىندە 403-ىندە مۇگەدەكتىك بار.
«مامانداردىڭ ۋاقىتىلى جانە بىلىكتى كومەگى «ەرەكشە» بالانىڭ ءومىرىن جاقسارتىپ, ونىڭ لايىقتى جانە تابىستى بولاشاققا قادام باسۋىنا مۇمكىندىك بەرەدى. ءبىلىم الۋىندا ەرەكشە قاجەتتىلىكتەردى تالاپ ەتەتىن بالالار مەن ولاردىڭ وتباسىلارىنا كەرەكتى قولداۋدى قورداي اۋىلىنداعى پپتك كورسەتەدى. بۇگىن ماسانشى مەن سورتوبە بالالارىنا ءوز اۋىلدارىنان شىقپاي-اق كومەك الۋعا مۇمكىندىك بەرەتىن تاعى ەكى فيليال اشىلدى. وسى جۇمىس ىستەپ تۇرعان اۋداندىق پپتك دامىتۋ جوباسى اۋىلدىق جەرلەردە تۇراتىن ەبق بار بالالارعا قىزمەت كورسەتۋ سپەكترىن ىلگەرىلەتۋ جانە كەڭەيتۋ ءۇشىن ۇلگى بولا الادى», - دەپ اتاپ ءوتتى «دارا» قورىنىڭ وكىلى ساۋلە بەكسۇلتانوۆا.
پسيحولوگيالىق-پەداگوگيكالىق تۇزەتۋ كابينەتى - بۇل كەز كەلگەن ەرەكشە بالا جانە ونىڭ وتباسى دەفەكتولوگ, پسيحولوگ, لوگوپەد, سۋردوپەداگوگ, تيفلوپەداگوگ, ەدش نۇسقاۋشىسى, مۋزىكالىق ىرعاق پەداگوگى سياقتى ماماندار كومانداسىنىڭ كەشەندى بىلىكتى كومەگىن الا الاتىن مەكەمە. جىل سايىن پپتك, فيليالداردى قوسا العاندا, دامۋىندا ءتۇرلى اۋىتقۋلارى بار 120-دان استام بالاعا تەگىن قىزمەت كورسەتە الادى.
«پپتك جانە باسقا دا ارنايى ءبىلىم بەرۋ ۇيىمدارىنىڭ جەلىسىن كەڭەيتۋدىڭ ارقاسىندا ەرەكشە ءبىلىم بەرۋ قاجەتتىلىكتەرى بار بالالار ءوز قۇرداستارىمەن بىرگە جالپى ءبىلىم بەرەتىن مەكتەپتە وقي الادى. «سامۇرىق-قازىنا» اق كومپانيالار توبىنىڭ قولداۋىمەن بۇكىل قازاقستان بويىنشا 15 تۇزەتۋ كابينەتى جانە 16 رەسۋرستىق ورتالىق اشىلدى», - دەيدى قورداي اۋداندىق پوشتا بايلانىسى تورابىنىڭ باستىعى اقجول كارىموۆ.
رەسۋرستىق ورتالىق - بۇل ەرەكشە بالالارمەن جۇمىس ىستەيتىن ماماندار مەن قاراپايىم مۇعالىمدەردىڭ مەكتەپ كەڭىستىگى جانە ىنتىماقتاستىق ايماعى. رەسۋرستىق ورتالىقتىڭ قولداۋىمەن مەكتەپتە وقۋدا ەرەكشە ءبىلىم بەرۋ قاجەتتىلىكتەرى بار بالالاردى جالپى ءبىلىم بەرەتىن مەكتەپتەرگە تولىق جانە ءتيىمدى ەنگىزۋ, دامۋىندا اۋىتقۋلارى بار بالالارمەن جۇمىس ىستەيتىن پەداگوگتارعا جانە ولاردىڭ اتا-انالارىنا عىلىمي-ادىستەمەلىك قىزمەتتەر كەشەنىن كورسەتۋ ءۇشىن قاجەتتى جاعدايلار جاسالادى.
