تەحنيكانىڭ مۇمكىندىگى عوي, ايتپەسە التايدى قار بارىسى مەكەن ەتەدى دەگەنگە ءبىرى سەنسە, ءبىرى سەنبەس تە ەدى. ولاي دەيتىنىم, كوز كورىم جەردەن قار بارىسىن كوردىك دەپ وتىراتىن باياعىنىڭ اڭشىلارىنا كوپ ەشكىم يلانا بەرمەيتىن. ال تاعىلاردى اپ-انىق تۇسىرگەن فوتو مەن بەينە جازبالارعا قاراپ, تاڭداي قاقپاسقا امال جوق.
كاتونقاراعاي مەملەكەتتىك ۇلتتىق پاركىنىڭ قىزمەتكەرلەرى جومارت امانباەۆ, ماناربەك وماروۆ جانە مۇرات اراباەۆتار بىلتىر قارا كۇزدە ارشاتى ورمانشىلىعىنىڭ اۋماعىنا ورناتقان فوتوتۇزاقتارىن تەكسەرىپ وتىرىپ, بارىستىڭ تاسپالانعانىن كورگەن. بار-جوعى وتىز سەكۋندتىق بەينەجازبا بولعانىمەن, پارك قىزمەتكەرلەرى ءۇشىن وتە ۇلكەن ەڭبەكپەن كەلگەن ولجا. بۇل ءۇشىن ولارعا قوماقتى سىياقى تاعايىنداسا دا ارتىق ەتپەس ەدى. زاماناۋي تەحنيكانىڭ ءتىلىن مەڭگەرۋ ءبىر باسقا, ونى 2300 مەتر بيىكتىكتەگى بارىس جۇرەدى-اۋ دەگەن تۇسقا ورناتۋ ءبىز ويلاعانداي وڭاي شارۋا ەمەس.
تەڭىز دەڭگەيىنەن 2300 مەتر بيىكتىكتى باسقا شىڭدارمەن سالىستىرساق, اناعۇرلىم الاسا. بىراق ءتور التايدىڭ ءار توبەسى مىنەزدى. يت تۇمسىعى وتپەس قالىڭ قارا ورمانىن جارىپ ءوتىپ, شاعىل تاستى بەلدەۋگە جەتكەندە ءجۇرىس وندىمەيدى. ودان اسىپ جىعىلساڭ, جالاما بەتكەيلەر, شاپشىما شىڭدارى جانە بار. اتپەن جەتسەڭ, ءبىر ءسارى. جاياۋ-جالپى كوتەرىلەسىڭ. فوتوتۇزاقتى ورناتتىڭ دەلىك. كەلەسى بارعاندا, ءبىر-بىرىنەن اينىمايتىن قۇز-جارتاستاردىڭ اراسىنان جۇدىرىقتاي قۇرىلعىنى اداسپاي تابۋىڭ كەرەك. اۋرەسى كوپ. ينسپەكتورلاردىڭ وسىنداي شابىستارىنا قاراي تابىستارى ساي ما؟
– قازاقستاننىڭ قىزىل كىتابىنا ەنگەن قار بارىسىنىڭ بەينەتاسپاعا ءىلىنۋى, ءبىز ءۇشىن ۇلكەن قۋانىش. ەڭبەكتىڭ جەمىسى دەۋگە بولادى. قۇرىلعىنى تاۋ باسىنا قۇرىپ, قاداعالاپ جۇرگەن ينسپەكتورلارعا راحمەت. كوپشىلىكتىڭ نازارىنا ۇسىنىلعان بارىستىڭ بەينەجازباسى, فوتوسۋرەتى 2020 جىلدىڭ جەلتوقسانىندا, وسى جىلدىڭ اقپان, ناۋرىز ايلارىندا تۇسكەن. قازىرگى ۋاقىتتا ماتەريالداردى انىقتاپ جاتىرمىز, – دەدى ۇلتتىق تابيعي پاركتىڭ جانۋارلاردى قورعاۋ جانە ءوندىرۋ ءبولىمىنىڭ مەڭگەرۋشىسى ەرىك قاسىموۆ.
ايتا كەتەرلىگى, فوتوتۇزاقتار تولىقتاي تەكسەرىلگەن جوق. ەندىگىلەرى تاۋدىڭ قيا-بەتكەيلەرىندە تۇر. ونى ماماندار جوسپارعا ساي ءساۋىر, مامىر ايلارىندا قارايدى. سول كەزدە كوپشىلىكتى تاڭعالدىراتىن كادرلار تاعى شىعۋى مۇمكىن.
شىعىس قازاقستان وبلىسى,
كاتونقاراعاي اۋدانى
