جامبىل وبلىستىق توتەنشە جاعدايلار دەپارتامەنتى توتەنشە جاعدايلاردىڭ الدىن الۋ باسقارماسىنىڭ باستىعى, ازاماتتىق قورعاۋ پولكوۆنيگى تالعات ايتباەۆتىڭ ايتۋىنشا, ايماقتا تابيعي تاسقىن كەزىندە سۋدىڭ اپاتسىز ءوتۋىن الدىن الۋ شارالارى تىڭعىلىقتى جۇرگىزىلۋدە ەكەن. سونىمەن قاتار, باسقارما باستىعى 1207 شاقىرىم درەناجدى كانال جانە ارىق جۇيەلەرىن قوقىستان تازارتۋ جۇمىستارىنىڭ اتقارىلعانىن, ال, اۆتوكولىك جانە تەمىر جولدارىنىڭ بويىنداعى 430 كوپىر مەن 1164 سۋ وتكىزۋ قۇرىلعىلارىنىڭ تازارتىلعانىن جەتكىزدى.
بۇگىندە وبلىستا سۋ تاسقىنى بولۋى مۇمكىن بىرقاتار اۋداندار بار. تاسقىن تالاس, شۋ جانە اسا وزەندەرى ارقالى وتەدى. سونىمەن قاتار, تاۋلى ايماقتاردا ورنالاسقان 5 وزەننىڭ ەرىگەن قار سۋى حالىققا قاۋىپ ءتوندىرۋى مۇمكىن. ماسەلەن, ولاردىڭ قاتارىندا جۋالى, مەركى, ت.رىسقۇلوۆ, قورداي جانە تالاس اۋداندارىنداعى قاراقوڭىز, ىرعايتى, اسپارا, مەركە, قاراقىستاق, قايىڭدى, اقساي جانە كوكساي وزەندەرى بار. ال, ءىرى سۋ قويمالارى بولىپ سانالاتىن كيروۆ, تاسوتكەل, تەرىس-اششىبۇلاق ايدىندارىنىڭ تولۋى ءجىتى باقىلاۋدا ەكەن. بۇگىندە تەرىس-اششىبۇلاق سۋ قويماسىنا 63 پايىز, تاسوتكەلگە 72 پايىز, قىرعىز مەملەكەتىندەگى كيروۆ سۋ قويماسىنا (چوڭ-قاقپا) 72 پايىز جانە ىنتالىعا 78 پايىز سۋ جينالعان.
قازىرگى كەزدە ايماقتا 138 مىڭ توننا جانار-جاعارماي مەن 11 مىڭ توننا ينەرتتى ماتەريالداردىڭ قورى قۇرىلىپ, 65 مىڭنان استام قاپتار دايىندالعان. كوشىرىلگەن حالىقتى ۋاقىتشا ورنالاستىرۋ ءۇشىن 41 قابىلداۋ بەكەتى, ءارتۇرلى 139 پالاتكا, جاتىن جابدىقتار, 1900 توسەك دايىن. ال, دەر كەزىندە مەديتسينالىق كومەك كورسەتۋ ءۇشىن 56 دەنساۋلىق ساقتاۋ نىساندارى جانە ءدارى-دارمەك قورى دايىندالعان. باقىلاۋ جۇرگىزۋ جانە زارداپ شەككەندەردى كوشىرۋ ءۇشىن تاراز اۋەجايىندا «قازاۆياقۇتقارۋ» اق «ەس-145» تىكۇشاعى كەزەكشىلىكتە تۇر.
