اشىلۋ راسىمىنە ى.التىنسارين اتىنداعى ۇلتتىق ءبىلىم اكادەمياسىنىڭ قىزمەتكەرى شولپان ءشۇيىنشينا, قر مادەنيەت جانە سپورت مينيستىرلىگىنىڭ وكىلى ەرقوجا تىلەپبەرديەۆ, ءتىل جاناشىرى, قوعام قايراتكەرى ورازكۇل اسانعازى, نۇر-سۇلتان قالاسى ءبىلىم باسقارماسىنىڭ ءبولىم باسشىسى اسىل امانگەلدىقىزى, ءبىلىم بەرۋدى جاڭعىرتۋ ورتالىعىنىڭ ماماندارى مەن وسى تەحنولوگيا بويىنشا جۇمىس ىستەپ جۇرگەن ەلوردالىق مەكتەپتىڭ مۇعالىمدەرى, وقۋشىلار جانە باق وكىلدەرى قاتىستى.
نۇر-سۇلتان قالاسىنىڭ ورتا ءبىلىم بەرۋ ۇيىمدارىندا جۇزەگە اسىرىلىپ كەلە جاتقان «پروفەسسور ساباعى» جوباسى اياسىندا ىسكە قوسىلعان زەرتحانا الداعى ۋاقىتتا «ساتىلاي كەشەندى وقىتۋ» تەحنولوگياسىن مەڭگەرىپ شىعاتىن مۇعالىمدەر مەن وقۋشىلار سانىن ارتتىرماق. زاماناۋي ءبىلىم بەرۋ جۇيەسىمەن ۇيلەستىرىلگەن زەرتحانا تالىمگەرلەرى «ساتىلاي كەشەندى وقىتۋ» تەحنولوگياسىنىڭ تاجىريبەلىك الاڭىن ەلوردا كولەمىندە عانا ەمەس, ەل بويىنشا كەڭەيتۋدى كوزدەپ وتىر.
الاش ارىستارىنىڭ ءبىلىم بەرۋ جۇيەسىندەگى پەداگوگيكالىق تاعىلىمدى تۇجىرىمدارىمەن تامىرلاس تەحنولوگيا مۇعالىمدەر مەن وقۋشىعا كەز كەلگەن ءپاندى, اتاپ ايتقاندا, قازاق ءتىلى مەن ادەبيەتى, اعىلشىن جانە ورىس تىلدەرى, ماتەماتيكا, جاراتىلىستانۋ, بيولوگيا, گەوگرافيا, حيميا, فيزيكا پاندەرىن جەڭىل يگەرۋگە جول اشادى.
قازاق ءتىلىنىڭ قاسيەتىن ءتۇسىندىرۋ ارقىلى وزگە پاندەردىڭ قىر-سىرىن تەز مەڭگەرۋگە, فۋنكتسيونالدىق ساۋاتتى ارتتىرۋعا ايانباي ەڭبەك ەتىپ كەلە جاتقان ءتول تەحنولوگيا اۆتورى, پروفەسسور نۇرشا الجانبايقىزى «ساتىلاي كەشەندى وقىتۋدى» 1994-1995 وقۋ جىلىنان باستاپ جۇرگىزىلىپ كەلەدى.
نۇر-سۇلتان اۋماعىندا سوڭعى 8 جىل كولەمىندە جۇرگىزىلىپ, اياسى كەڭەيىپ كەلە جاتقان ءتول تەحنولوگيانىڭ العاشقى جەڭىسى مەن جەتىستىكتەرى دە از ەمەس. بالاباقشا تاربيەلەنۋشىلەرىنىڭ مەكتەپكە دايىندىعى مەن وقۋشىلاردىڭ ءبىلىم ساپاسىن ارتتىرۋدى كوزدەيتىن تەحنولوگيا بويىنشا قازىرگى تاڭدا ءبىر عانا ەلوردانىڭ وزىندە 2 مىڭنان استام ءبىلىم الۋشى, 150-گە جۋىق تاربيەلەنۋشى سويلەۋ داعدىلارىن قالىپتاستىرىپ, ۇلتتىق ءتالىم-تاربيەمەن سۋسىنداۋدا. «ساتىلاي كەشەندى وقىتۋ» تەحنولوگياسىنىڭ تاجىريبەلىك الاڭ جۇمىستارىنا ەل كولەمىندە 7 بالاباقشا تاربيەشىسى مەن جۇزدەن استام مۇعالىم بەلسەندى قاتىسىپ ءجۇر.
2013 جىلدان باستاپ تاجىريبەلىك الاڭدار №59 «اققانات», №71 ء«مولدىر» بالاباقشالارى, №66 مەكتەپ-ليتسەيىندە, №4, 52, 74 مەكتەپ-گيمنازيالارىندا, №8 بۇرىنعى جالپى ءبىلىم بەرەتىن ورتا مەكتەپتەردە جۇزەگە اسىرىلىپ كەلەدى. ال جالپى تەحنولوگيانى رەسپۋبليكا بويىنشا باتىس قازاقستان وبلىسىندا 2 مەكتەپ, الماتى وبلىسىندا 5 مەكتەپ 10 ءپان بويىنشا ەنگىزىلىپ, ءساتتى جۇرگىزىلىپ ءجۇر.
وسكەلەڭ ۇرپاقتىڭ ۇلتتىق تانىمىن قالىپتاستىرۋدى الدىڭعى قاتارعا قويعان وسى تەحنولوگيا ارقىلى ەل كولەمىندە بىرنەشە مۇعالىم «ۇزدىك پەداگوگ» اتاعىنا يە بولسا, ونىڭ ىشىندە نۇر-سۇلتان قالاسىنىڭ بىرنەشە مۇعالىمى بار.
«ساتىلاي كەشەندى وقىتۋ» تەحنولوگياسىنىڭ اۆتورى نۇرشا ورازاحىنوۆا زەرتحانانى قۇرۋداعى باستى ماقساتىن «قازاق تىلىندە ويىن تولىق جەتكىزە الاتىن, ۇلتتىق قۇندىلىقتاردى باعالاي بىلەتىن, قازاقتىڭ تاريحى مەن مادەنيەتىن تەرەڭ مەڭگەرگەن, ۇلتتىق ساناسى قالىپتاسقان, رۋحى بيىك كوپتىلدى, ءبىلىمدى تۇلعا قالىپتاستىرۋ» دەپ ءتۇسىندىرىپ ءوتتى.
الاش ارىسى جۇسىپبەك ايماۋىت ۇلىنىڭ «ۇلتتى ءسۇيۋ, قازاقتىڭ وزگەشە مىنەزىن ساقتاپ قالۋ تۋعان انا ءتىلىن قالاي وقىتۋعا بايلانىستى. ءتىل – جۇرتتىڭ جانى. تىلىنەن ايىرىلعان جۇرت – جويىلعان جۇرت» دەگەن جاقسى ءسوزى بار. ءبىزدىڭ دارىپتەپ جۇرگەن تەحنولوگيامىز وسى تۇجىرىمدامانى نەگىزگە الىپ, شامشىراق ەتىپ ۇستانىپ كەلەدى. باستى كوزدەگەنىمىز دە وسى – انا ءتىلىمىزدىڭ جالاۋىن جىقپاي-اق ەكىنشى, ءۇشىنشى تىلدەردى مەڭگەرۋدىڭ نەگىزىن قالاۋ, تاڭداۋ ءپانى ارقىلى وقۋشىلاردىڭ ءبىلىمىن تەرەڭدەتىپ, دۇنيەتانىمىن كەڭەيتۋ», دەيدى تەحنولوگيا اۆتورى.
«قازىر جاسىراتىنى جوق, بالالاردىڭ سويلەۋ داعدىسى تومەندەپ بارادى. بالالار قازاق ءتىلىنىڭ دىبىستارىن دۇرىس ايتا المايدى. ونىڭ سەبەپتەرى دە ءارتۇرلى. وسى ولقىلىقتىڭ ورنىن تولتىرار امال-ءتاسىل مەن باعىت-باعداردىڭ بارلىعىن الاش ارىستارى باياعىدا-اق ايتىپ, تايعا تاڭبا باسقانداي كورسەتىپ كەتكەن. الاش ارىستارى ءوز ەڭبەكتەرىندە ءبىلىم سالاسىنداعى بۇگىنگى ءتۇيىندى ماسەلەلەردىڭ شەشىمىن كورسەتىپ قانا قويماي, ونى قولدانۋ ادىستەرىن دە جازىپ كەتكەن. ولار ءبىلىمنىڭ 90 پايىزى مەكتەپتە بەرىلۋى كەرەك دەيدى. ءبىز ۇسىنىپ وتىرعان «ساتىلاي كەشەندى وقىتۋ» تەحنولوگياسى ۇلتتىق ءبىلىمنىڭ مىقتى فۋنكتسيونالدى ىرگەتاسىن قالاپ بەرگەن وسى باعىتپەن ۇندەس, تامىرلاس», دەگەن نۇرشا ادجانبايقىزى پاندىك ماتەريالدار وقۋشىنىڭ جاس ەرەكشەلىگىن ەسكەرە وتىرىپ, عىلىمي نەگىزدە مەڭگەرتۋدى ماقسات ەتىپ الىنعانىن دا اتاپ ءوتتى. احمەت بايتۇرسىن ۇلىنىڭ عىلىمي كەشەنىن نەگىزگە العان بۇل تەحنولوگيانىڭ باستى ەرەكشەلىگى دە وسىندا – وقۋ ماتەريالىن مەڭگەرۋدىڭ جۇيەلىلىگى مەن بىرىزدىلىگىندە.
ەل ۇكىمەتىنىڭ «مەكتەپ وقۋشىلارىنىڭ فۋنكتسيونالدىق ساۋاتتىلىعىن دامىتۋ جونىندەگى» قاۋلىسىنا سايكەس, «ماڭگىلىك ەل» جالپى ۇلتتىق يدەياسىن باسشىلىققا الا وتىرىپ ىسكە قوسىلعان اتالعان زەرتحانا قالالىق №52, 86 مەكتەپتەردە قازاق تىلىنەن ۇلگەرىمى تومەن وقۋشىلارعا اپتاسىنا 2 رەت تەگىن ءدارىس بەرەدى.
