ارينە جەر رەفورماسى جونىندەگى كوميسسيانىڭ جۇمىسىنا قاتىستى قوعامدا ءتۇرلى پىكىرلەر ايتىلعانىن جاقسى بىلەمىز. قولدايتىن دا, سىناپ-مىنەيتىن دە سوزدەردى قۇلاعىمىز شالىپ جاتتى. الايدا كەز كەلگەن جۇمىس ناتيجەمەن ولشەنەتىنىن ۇمىتپاۋىمىز قاجەت. بۇل رەتتە اتالعان كوميسسيا العا قويعان مىندەتتەردىڭ بىرقاتارىن اتقارىپ ۇلگەرگەنىن ايتقىم كەلەدى.
ءبىر كەزدەرى قازاق جەرىنىڭ شەتەل ازاماتتارىنا ۇزاق مەرزىمگە جالعا نەمەسە مەنشىككە بەرىلۋ ماسەلەسى – ەل اراسىندا دۇربەلەڭ, داۋ-داماي تۋعىزعانى بەلگىلى. وسى ماسەلەگە ءبىرجولا نۇكتە قويىلدى. مەملەكەت باسشىسى ۇسىنعان ءتيىستى زاڭ جوباسى پارلامەنت ماجىلىسىندە قارالىپ جاتىر. بۇل شەشىمدى ازاماتتىق قوعامنىڭ زور جەتىستىگى دەپ باعالاۋعا بولادى. وعان وسى كوميسسيانىڭ جەمىستى جۇمىسى ارقىلى قول جەتكىزگەنىمىز انىق. ناقتى ناتيجە دەپ وتىرعانىمىز – وسى.
سوعان قاراماستان, جەرگە قاتىستى ءالى دە ءتۇيىنى شەشىلمەگەن تۇيتكىلدى ماسەلەلەر بار. ەندى قازاقستان وسى جەردىڭ تاعدىرىن قالاي شەشەدى دەگەن ماسەلە پايدا بولدى. ماسەلەن, ەلىمىز جەر اۋماعى بويىنشا الەمدە توعىزىنشى ورىنعا تۇراقتاعانىمەن, حالىقتىڭ تىعىزدىعى بويىنشا كوش سوڭىندا كەلەمىز. 1 شارشى شاقىرىمعا 6 ادامنان عانا كەلەدى. بۇل – الەمدەگى ەڭ تومەن كورسەتكىشتەردىڭ ءبىرى. ال جەمە-جەمگە كەلگەندە وتانداستارىمىزعا جەر جەتپەي جاتقانىن ەستيمىز. اينالدىرعان 10 سوتىق جەردىڭ وزىنە قول جەتكىزە الماي وتىرمىز. كەز كەلگەن اۋىلدىڭ اينالاسىنداعى جەردىڭ ءبارى ءباز بىرەۋلەردىڭ قولىندا بولىپ شىعادى. اۋىلدىقتار سونىڭ كەسىرىنەن جايىلىم تاپپاي زار قاعىپ ءجۇر.
ارينە بۇل جەر رەفورماسى جونىندەگى كوميسسيانىڭ العاشقى وتىرىسى عانا. سوندىقتان بۇل وتىرىستا ەڭ الدىمەن جۇمىس ءتارتىبى, رەگلامەنتى, ۇيىمداستىرۋ ماسەلەلەرى قارالدى. سونداي-اق ءبىرتالاي ازاماتتار ءسوز سويلەپ, 50-60-قا جۋىق ورىندى ۇسىنىستار ايتىلدى. اشىق اڭگىمە بولدى. ەڭ باستىسى, ماڭىزدى ماسەلەلەردىڭ بارلىعى قوعاممەن بىرلەسە وتىرىپ شەشىلەتىن بولادى.
راسۋل جۇمالى,
ساياساتكەر, جەر رەفورماسى جونىندەگى كوميسسيا مۇشەسى
