ونەر • 23 ناۋرىز، 2021

ۇرمەلى اسپاپتار كۆارتەتى ۇزدىك اتاندى

16 رەت كورسەتىلدى

«استانا وپەرا» سيمفونيالىق وركەسترىنىڭ مۋزىكانتتارى، تانىمال «Astrobones» كۆارتەتىنىڭ مۇشەلەرى فارحاد بولاتوۆ، الماس ساعىمباەۆ، البينا وتەگەنوۆا جانە ەراسىل امەشوۆ GRAND MUSIC ART بەينەجازبالارى بويىنشا مۋزىكانتتار اراسىنداعى X ۇلكەن حالىقارالىق بايقاۋدا ءبىرىنشى جۇلدەنى يەلەندى، دەپ حابارلايدى Egemen.kz

بايقاۋعا قاتىسۋشىلاردىڭ ونەرىن باعالاۋ ءۇشىن شەت ەلدەن جەتەكشى مۋزىكانتتار شاقىرىلعان بولاتىن. ۇرمەلى جانە سوقپالى اسپاپتار اتالىمى بويىنشا ارتىستەردىڭ شەبەرلىك قابىلەتىن ماسكەۋ كونسەرۆاتورياسىنىڭ دوتسەنتى، رەسەي مەملەكەتتىك اكادەميالىق ۇلكەن تەاترى وركەسترىنىڭ ءسوليسى الەكسەي كورنيلەۆ، رەسەي مەملەكەتتىك اكادەميالىق ۇلكەن تەاترى وركەسترىنىڭ كلارنەتتەر توبىنىڭ كونتسەرتمەيستەر-ءسوليسى سەرگەي پەتروۆ جانە ماسكەۋ كونسەرۆاتورياسىنىڭ پروفەسسورى، شنيتكە اتىنداعى مممي پروفەسسورى، رەسەي مەملەكەتتىك اكادەميالىق ۇلكەن تەاترى وركەسترىنىڭ ءسوليسى ەركين يۋسۋپوۆ باعالادى.

ماسكەۋدە وتكەن حالىقارالىق بايقاۋعا 200 قالادان 2760 مۋزىكانت قاتىستى.

– ءبىز ءۇشىن بۇل كۇتپەگەن جاڭالىق بولدى. سايىستا جاڭا قۇراممەن ونەر كورسەتتىك، ارينە العاشقىدا قوبالجىدىق، بىراق قويىلعان تالاپتى ءمىنسىز ورىنداپ، ەلىمىزدىڭ مۋزىكالىق ونەرىن حالىقارالىق بايقاۋدا لايىقتى تانىستىرا بىلدىك. اسىرەسە بۇل جەڭىسكە ناۋرىز مەيرامى قارساڭىندا قول جەتكىزگەنىمىز مەرەيىمىزدى ءوسىردى. قانداي بايقاۋ بولسىن مۋزىكانت ءۇشىن وتە ماڭىزدى، ويتكەنى مۇنداي جوبالار مۋزىكامەن كوبىرەك اينالىسۋعا، كۇردەلى، قيىن شىعارمالاردى ۇيرەنۋگە مۇمكىندىك بەرەدى. بۇل جەڭىس ءبىزدى شىن مانىندە شابىتتاندىردى، ەندى ءتۇرلى قىزىقتى باعدارلامالار دايىنداۋدى جوسپارلاپ وتىرمىز. سونداي-اق الداعى ۋاقىتتا رەسەيدە ارنايى كونتسەرت بەرمەك ويىمىز بار. باسقا دا فەستيۆالدەرگە شاقىرتۋ الدىق، ەگەر ەپيدەميولوگيالىق احۋال جاقسارسا، وندا جاقىن كۇندەردە قازاقستاننىڭ ونەرىن وزبەكستاندا تانىستىراتىن بولامىز، – دەپ اتاپ ءوتتى كۆارتەت جەتەكشىسى فارحاد بولاتوۆ.

ودان بولەك، بايقاۋ اياسىندا وزەكتى تاقىرىپتارعا ونلاين-دارىستەر مەن شەبەرلىك سىنىپتارى وتكىزىلدى. ۇيىمداستىرۋشىلار كەرى بايلانىس مۇمكىندىكتەرىن بارىنشا پىسىقتاپ، كورسەتىلىم كەزىندە تىڭدارماندار دارىسكەرلەرگە سۇراقتار قويدى.

ايتا كەتەتىن جايت، GRAND MUSIC ART بايقاۋى بەينەجازبالار بويىنشا وتكىزىلدى. حالىقارالىق بايقاۋعا قاشىقتان قاتىسۋ ورىنداۋشىلارعا زاماناۋي جاعدايدا ونەر كورسەتىپ، گەوگرافيالىق الشاقتىقتى ەڭسەرۋگە مۇمكىندىك بەردى. ەڭ باستىسى، دارىندى وقۋشىلاردىڭ بىلىكتىلىگى مەن كاسىبي شەبەرلىگىن ۇشتاۋعا جول اشىپ بەردى دەۋگە تولىق نەگىز بار.

سوڭعى جاڭالىقتار

مەرەكە قارساڭىندا ماراپاتتالدى

ايماقتار • بۇگىن، 13:58

6 مامىرعا ارنالعان ۆاليۋتا باعامى

ەكونوميكا • بۇگىن، 11:16

«چەلسي» فينالعا شىقتى

سپورت • بۇگىن، 10:48

ۇقساس جاڭالىقتار