مەملەكەت باسشىسى قاسىم-جومارت توقاەۆ «تاۋەلسىزدىك بارىنەن قىمبات» ماقالاسىندا ناۋرىز مەيرامىن اتاپ ءوتۋ تۇجىرىمداماسىن جاساپ, كوكتەم مەرەكەسىنىڭ مازمۇنىن بايىتا تۇسكەن ءجون ەكەنىن ايتقان بولاتىن. وسىعان وراي, «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن جامبىل وبلىستىق تاريحي-ولكەتانۋ مۋزەيىندە «امال كەلدى – جىل كەلدى» اتتى شارا ءوتتى. مادەني شارا بارىسىندا كوپشىلىك ۇلتتىق ناقىشتاعى كيىمدەرىن كيىپ, قولدارىنا ۇلتتىق تاعامدارىمىز بەن باۋىرساق, تاتتىلەرىن الىپ, كەنەن ازىرباەۆ اتىنداعى وبلىستىق فيلارمونيا انشىلەرىنىڭ سۇيەمەلدەۋىمەن «گۇل-گۇل جاينا» حالىق ءانىن شىرقاپ, تاريحي-ولكەتانۋ مۋزەيىنە بەت الدى. اتالعان مەرەكەلىك شارانى ەلىمىزگە بەلگىلى ونەر يەلەرى «تاراز تريوسى» ءان سالىپ اشىپ بەردى. مۇندا كوپشىلىك ءبىر-بىرىمەن اماندىقتا قاۋىشىپ, مەرەكەنىڭ ءمانى مەن ماعىناسىنا كەڭىنەن توقتالدى. ال «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىنىڭ ديرەكتورى نۇرلان بىقىباەۆ جينالعانداردى امال مەرەكەسىمەن قۇتتىقتاپ, مۇنداي مەرەكەلەردىڭ بولاشاق ۇرپاققا ۇلگى بولىپ قالۋىنا بارلىق ازاماتتىڭ اتسالىسۋى كەرەكتىگىن جەتكىزدى. ءان مەن جىردان شاشۋ شاشىلىپ, كوپشىلىك ءبىر-بىرىنە «جاسىڭ قۇتتى بولسىن!», «جاسىڭا جاس قوسىلسىن!» دەگەن تىلەكتەرىن ايتتى. سونىمەن قاتار اسقار توقپانوۆ اتىنداعى وبلىستىق قازاق دراما تەاترىنىڭ اكتەرلەرى امال مەرەكەسىنە بايلانىستى كورىنىس قويىپ, مەرەكەلىك شارانىڭ اجارىن اشتى. قىدىر بابا ەلدىڭ اماندىعىن تىلەپ, اق باتاسىن بەردى. بۇل رەتتە وبلىستىق تاريحي-ولكەتانۋ مۋزەيىنىڭ ديرەكتورى سەيىتجان ءىلياس كەلگەندەرگە العىس ايتىپ, جىلى لەبىزىن ءبىلدىردى. «مۇنداي مەرەكەلەردىڭ ءمانىن جوعالتپاۋ كەرەك. اۋىزبىرشىلىك پەن كىشىپەيىلدىلىككە, تاتۋلىق پەن باۋىرمالدىققا, ىزەتتىلىك پەن مەيىرىمدىلىككە باستايتىن, سالت-ءداستۇرىمىز بەن ادەت-عۇرىپتارىمىزدى ۇلىقتايتىن مۇنداي مەرەكەلەردىڭ اتالىپ ءوتۋى وسكەلەڭ ۇرپاققا ۇلگى بولارى ءسوزسىز», دەيدى «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىنىڭ عىلىمي قىزمەتكەرى ءلايلا تىلەۋبەردىقىزى.
جامبىل وبلىسى
