جاس ايتىس اقىندارى جىل باسى ناۋرىزدان باستاپ, الاش كوسەمى ءاليحان بوكەيحاننىڭ 155 جىلدىق, تۇڭعىش زاڭگەر جاقىپ اقباەۆتىڭ 145 جىلدىق جانە تۇڭعىش ماتەماتيك ءالىمحان ەرمەكوۆتىڭ 130 جىلدىق مەرەيتويلارىنا قاتىستى تاقىرىپتى جىرعا قوسىپ, ايتىستىڭ كورىگىن قىزدىردى.
ايتىستىڭ اقتاڭگەرى امانجول التاەۆ باستاعان قازىلار القاسىنىڭ شەشىمىمەن باس جۇلدە قاراعاندى قالاسىنىڭ اتىنان تۇسكەن تورەحان سوۆەتكە بۇيىردى. ءبىرىنشى ورىندى قارقارالىلىق بەكارىس وسپانوۆ يەلەنسە, ەكىنشى جۇلدە دوسكەي بوتپاي مەن نۇرلىبەك توكەنگە بەرىلدى. بۇل ەكى اقىننىڭ ەكەۋى دە بۇقار جىراۋ اۋدانىنىڭ نامىسىن قورعادى. ال ءۇشىنشى جۇلدەنى ساتباەۆ قالاسىنىڭ اقىنى ابزال ماقاش پەن تەمىرتاۋدا تۇراتىن شايىر جانارىس تىلەۋبەك قاناعات ەتتى.
سونىمەن بىرگە جەكەلەگەن اقىندارعا ارنايى جۇلدەلەر بەرىلدى. اتاپ ايتقاندا, تەمىرتاۋلىق ەركەعالي بەكبولات ءاليحان بوكەيحان اتىنداعى, قاراعاندىلىق نۇرسۇلتان رىمباي, ءالىمحان ەرمەكوۆ اتىنداعى, نۇرا اۋدانىنىڭ ءۇمىتى جاندوس باقىت ۇلى جاقىپ اقباەۆ اتىنداعى ارنايى جۇلدەلەرگە لايىقتى دەپ تانىلدى.
جاس اقىندار جىر ايتىسىن قاراعاندى وبلىستىق مادەنيەت, ارحيۆتەر جانە قۇجاتتاما باسقارماسى, وبلىستىق مادەني-ساۋىق جانە حالىق شىعارماشىلىعىنىڭ عىلىمي-ادىستەمەلىك ورتالىعى, سونداي-اق «ارقا» ايتىس اقىندارى مەن جىرشى-تەرمەشىلەر مەكتەبى ۇيىمداستىردى.
قاراعاندى
