ءباسپاسوز بەتتەرىندە بۇل قۇجاتتى جامبىلدىق قالامگەر-جۋرناليست مارقۇم ماقۇلبەك رىسداۋلەت تاۋىپ, 2009 جىلى وبلىستىق گازەت بەتىنە جاريالاعانى تۋرالى ايتىلىپ ءجۇر. قالاي دەسەك تە, بۇل جادىگەر – حالقىمىزدىڭ ەجەلدەن كەلە جاتقان عۇرىپتىق مەرەكەسى ناۋرىز مەيرامىن وتكەن عاسىر باسىندا ساقتاپ قالۋ ءۇشىن قابىلدانعان رەسمي قۇجات. سوندىقتان دا بولار, تۇرارتانۋشىلار بۇل قۇجاتتى, بىرىنشىدەن, حالقىمىزدىڭ بايىرعى قۇندىلىعىن ساقتاپ قالۋ جولىندا جاسالعان ۇلكەن قادام دەپ تۇسىنسە, ەكىنشى جاقتان, ۇلكەن قايراتكەردىڭ قالام ءىزى ءتۇسىپ, قولى قويىلعان ەستەلىك دەپ قارايدى.
زەرتتەۋشى وردالى قوڭىراتباەۆ ءبىر سۇحباتىندا اتالعان بۇيرىقتى ەرتەرەكتە تاشكەنت ارحيۆىنەن كەزدەستىرگەنىن, كوشىرمەسى وزىندە ساقتاۋلى تۇرعانىن ايتا وتىرىپ, ت.رىسقۇلوۆ تۇركىستان ورتالىق اتقارۋ كوميتەتىنىڭ توراعاسى بولىپ تۇرعان تۇستا تۇركى حالىقتارىنىڭ ءتىلىن مەملەكەتتىك ءتىل دەپ جاريالاۋ تۋرالى ماسەلە كوتەرىپ, سونىمەن قاتار ناۋرىزدى ءدىني مەرەكە دەپ قارسى شىققاندارعا ءوز ءۋاجىن ۇسىنىپ, «ناۋرىز – كوكتەم مەرەكەسى, حالىق ءوزى ءبارىبىر تويلايدى. ءبىز رەسمي ۇيىمداستىرساق, حالىق تا جىلى قابىلدايدى», دەپ تۇسىندىرگەن دەيدى.
جوعارىداعى بۇيرىقتىڭ ناتيجەسىندە, ورتالىق ازيادا العاش رەت 1920 جىلى ناۋرىزدىڭ 22-ءسى كۇنى ناۋرىز مەملەكەتتىك مەرەكە رەتىندە تۇركىستان رەسپۋبليكاسىنىڭ اۋماعىنا قاراستى قالالاردا, ۋەزدەردە, اۋىلداردا اتاپ وتىلگەن.
