بريفينگ بارىسىندا ءمالىم بولعانداي, ەلدە COVID-19 كوروناۆيرۋس ينفەكتسياسىنىڭ تاراۋىنىڭ الدىن الۋ ءۇشىن ءازىربايجان اۋماعىندا ەرەكشە كارانتين رەجيمى 2021 جىلدىڭ 1 ماۋسىمى, ساعات 1-گە دەيىن جالعاسادى.
ۇكىمەتتىڭ بۇل شەشىمى ءبىرىنشى كەزەكتە قوعامدىق كولىككە قاتىستى بولىپ وتىر. ونىڭ جۇمىسى ەل اۋماعىندا ناۋرىز مەرەكەسىنە, ناقتىراق ايتقاندا 20-29 ناۋرىز ارالىعىندا جانە ماۋسىم ايىنىڭ 1-نە دەيىن جەكسەنبى كۇندەرى توقتاتىلادى.
اتالعاندارمەن قوسا تويلار مەن تۋعان كۇندەر سياقتى بۇقارالىق جيىنداردى وكىزۋگە تىيىم سالىنادى. باكۋ مەتروپوليتەنىنىڭ جۇمىسى دا توقتاپ تۇرادى.
بريفينگ بارىسىندا مەترو قىزمەتىنىڭ جاندانۋى كارانتين رەجيمى كەزەكتى رەت جەڭىلدەتىلگەننەن كەيىن كۇن تارتىبىنە قويىلاتىنى ايتىلدى.
ايتا كەتەيىك, سوڭعى كۇندەرى ءازىربايجاندا كوروناۆيرۋس جۇقتىرۋ جاعدايلارى كوبەيىپ وتىر. ۆيرۋس جۇقتىرعان ناۋقاستار سانى اسىرەسە باكۋدە كوپ. بۇل قالادا بارلىق ناۋقاستاردىڭ 52,9%-ى ءجۇر. بۇدان ءارى ينفەكتسيا جۇقتىرعاندار سانى جاعىنان ابشەرون اۋدانى مەن سۋمگايىت قالاسى جانە گياندجا-گازاح ءوڭىرى تۇر.
وسىعان دەيىن ءازىربايجاندا كوروناۆيرۋستىڭ بريتاندىق شتامى تابىلعان بولاتىن.
بيلىك وكىلدەرىنىڭ ءمالىم ەتۋىنشە, اتالعان شتامنىڭ جۇقتىرعىش قاسيەتى زور بولعانىمەن ءازىربايجاندا قولدانىلىپ جاتقان ۆاكتسينا كوروناۆيرۋستىڭ بارلىق شتامدارىنا بىردەي ءتيىمدى.
