قوسىمشا ءبىلىمنىڭ بالا ومىرىندە, ونىڭ ادام, مامان بولىپ قالىپتاسۋىندا ءرولى زور. بۇل تۋرالى ءبىز باس باسىلىم بەتىنە «كولەڭكەدە قالعان قوسىمشا ءبىلىم» دەگەن تاقىرىپپەن شىققان كولەمدى ماتەريالىمىزدا كەڭىرەك جازعانبىز. ءبىلىم جانە عىلىم مينيسترلىگىنىڭ القا وتىرىسىندا قوسىمشا بىلىمدە اتقارىلعان ىستەر مەن الداعى مىندەتتەر تۋرالى ايتىلدى.
«جاقىندا قابىلدانعان زاڭ شەڭبەرىندە قوسىمشا ءبىلىم الۋعا كەڭ مۇمكىندىك بەرۋ ءۇشىن مەملەكەتتىك تاپسىرىس ورنالاستىرىلادى. بۇل دا كونكۋرس نەگىزىندە وتەدى. جەكەمەنشىك ۇيىمدارعا ورنالاستىرىلعاننان كەيىن قوسىمشا بىلىممەن قامتۋ دەڭگەيىن الدەقايدا ۇلعايتۋعا مۇمكىندىك تۋاتىنى ءسوزسىز. قوسىمشا ءبىلىم بەرۋ ۇيىمدارىن دامىتۋ بويىنشا كەيبىر وڭىردە بىرىكتىرۋ, وڭتايلاندىرۋ, جابۋ بويىنشا باستامالار ورىن الىپ جاتىر. مۇنداي باستامالاردى توقتاتىپ, بۇل ۇيىمداردى جاپپاي دامىتۋىمىز كەرەك», دەدى مينيستر.
PISA – ءبىلىم الۋشىلاردىڭ جەتىستىگىن حالىقارالىق باعالاۋ باعدارلاماسىنىڭ ناتيجەلەرى قازاقستاندىق بالالاردىڭ وقۋ ساۋاتتىلىعى تىم تومەندەپ كەتكەنىن كورسەتتى. وقۋشىلاردىڭ ساۋاتتىلىعىن ارتتىرۋدا كوركەم ادەبيەت كىتاپتارىن وقۋدىڭ ورنى ەرەك. ال ولاردىڭ مەكتەپتە كىتاپ وقۋعا دەگەن قىزىعۋشىلىعىن وياتاتىن ماماندار ەلەۋسىز قالىپ كەلدى. وسىعان دەيىن ءبىز «مەكتەپ كىتاپحاناشىلارىنىڭ مىندەتى نەگە ناقتىلانباعان؟» اتتى پروبلەمالىق ماقالامىزدا 4 جىل پەداگوگيكالىق وقۋ ورنىندا وقىپ ماماندانعان, 20 جىلدان بەرى مەكتەپتە بالالاردىڭ زەيىنىن اشۋمەن اينالىسىپ جۇرگەن كاسىپ يەسىنىڭ جارىمايتىن جالاقىعا جۇمىس ىستەپ جۇرگەنىن جازعانبىز. بيىل بۇل تۇيتكىلدىڭ ءتۇيىنى تارقاتىلماق. ماسەلە تۇبەگەيلى شەشىلمەگەنىمەن, سەڭ قوزعالدى دەۋگە بولادى. ۆەدومستۆو باسشىسى ا.ايماعامبەتوۆ اتالعان ماسەلەگە قاتىستى: «قازىرگى ۋاقىتتا «وقۋعا قۇشتار مەكتەپ» جوباسىن ىسكە قوسىپ جاتىرمىز. ونىڭ اياسىندا مەكتەپتەگى كىتاپحانالار قورىندا مەملەكەتتىك تىلدەگى كوركەم ادەبيەتتى ايتارلىقتاي جاڭارتۋ مىندەتى تۇر. سوندىقتان مۇنداي ماسەلەنى ءبىز بيىل شەشۋىمىز كەرەك. وسى رەتتە ءبىزدىڭ كىتاپحانادا ىستەيتىن ارىپتەستەرىمىز – كىتاپحاناشىلاردىڭ جالاقىسىن كوتەرۋ ماسەلەسى دە وتە وزەكتى. بۇل بويىنشا مەملەكەت باسشىسى ءتيىستى تاپسىرمانى بەرگەن بولاتىن. سوندىقتان وسى جۇمىستى بيىل جالعاستىرامىز», دەدى.
