سەنات سپيكەرى ماۋلەن اشىمباەۆتىڭ توراعالىعىمەن وتكەن پالاتا وتىرىسىندا دەپۋتاتتار «2005 جىلعى 25 قاراشاداعى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ اۆتوكولىك قۇرالدارىن جىمقىرۋعا قارسى كۇرەستەگى جانە ولاردى قايتارۋدى قامتاماسىز ەتۋدەگى ىنتىماقتاستىعى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قاراپ, قابىلدادى.
بۇل كەلىسىم تمد ەلدەرىنىڭ اۋماعىندا تىركەۋدەن شىعارىلعان جانە اپاتقا ۇشىراعان اۆتوكولىكتەر تۋرالى مالىمەتتەر جاريالاناتىن دەرەكتەردىڭ اقپاراتتىق بازاسىنىڭ جۇمىسىن قولداۋدى كوزدەيدى. مالىمەتتەرمەن جەدەل الماسۋ تاجىريبەسى دوستاستىققا مۇشە مەملەكەتتەردىڭ اۆتوكولىك ۇرلىعىمەن كۇرەس جانە ولاردى قايتارۋ جۇمىستارىندا بىرلەسىپ, بەلسەندى ارەكەت ەتۋگە مۇمكىندىك بەرەدى.
وتىرىس بارىسىندا قارالعان زاڭ جوبالارىنىڭ ءبىرى تاۋار بەلگىلەرىنە پاتەنت الۋ, قىزمەت كورسەتۋ بەلگىلەرى جانە تاۋار شىعارىلعان جەرلەردىڭ اتاۋلارىنا قاتىستى بولدى. بۇل جونىندەگى نورمالار بۇگىن قابىلدانعان «ەۋرازيالىق ەكونوميكالىق وداقتىڭ تاۋار بەلگىلەرى, قىزمەت كورسەتۋ بەلگىلەرى جانە تاۋارلار شىعارىلعان جەرلەردىڭ اتاۋلارى تۋرالى شارتتى راتيفيكاتسيالاۋ تۋرالى» زاڭدا جازىلعان.
وسى زاڭ ارقىلى ەندى قازاقستاندىقتارعا ەاەو ەلدەرى اۋماعىندا جۇمىس ىستەۋ ءۇشىن پاتەنت الۋ ءراسىمى جەڭىلدەيدى. ول ءۇشىن ازاماتتار ەاەو-عا مۇشە مەملەكەتتەردىڭ ءبىرىنىڭ پاتەنت بەرەتىن ۆەدومستۆوسىنا جۇگىنسە جەتكىلىكتى. وسىلايشا ەكونوميكالىق وداق اۋماعىندا ءوز تاۋار بەلگىسىن قورعاۋعا مۇمكىندىك الادى. سونداي-اق, جاڭا نورمالار ەاەو نارىعىنا ارنالعان وتاندىق تاۋار وندىرۋشىلەردىڭ قۇقىقتارىن قورعاۋ دەڭگەيىن ارتتىرا تۇسەدى.
سونىمەن قاتار بۇگىن سەناتورلار «قازاقستان رەسپۋبليكاسى مەن بولگاريا رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭدى قاراپ, قابىلدادى. بۇل قۇجات ارقىلى سوتتالعان ادامداردى ءارى قاراي جازاسىن ءوز ەلىندە وتەۋ ءۇشىن بەرۋگە مۇمكىندىك تۋاادى.
ال «ەۋرازيالىق ەكونوميكالىق وداققا مۇشە مەملەكەتتەردىڭ تەمەكى ونىمدەرىنە اكتسيزدەر سالاسىنداعى سالىق ساياساتىن جۇرگىزۋ قاعيداتتارى تۋرالى كەلىسىمدى راتيفيكاتسيالاۋ تۋرالى» زاڭ 2024 جىلدان باستاپ تەمەكى ونىمدەرىنە اكتسيزدەردىڭ ينديكاتيۆتىك مولشەرلەمەسىن قولدانۋدى قاراستىرادى. مۇنداي نورما ەاەو-عا مۇشە مەملەكەتتەردىڭ اۋماعىندا تەمەكى ونىمدەرىنىڭ اكتسيزدەرىنە سالىق سالۋدا بىرىڭعاي تاجىريبەنى قولدانۋدى قامتاماسىز ەتەدى.
ودان بولەك, سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا كەلىسىم كوميسسياسىنىڭ قۇرامىن بەكىتتى. بۇل قۇجات بويىنشا ءماجىلىستىڭ پىكىرىن قاراۋ جانە كەلىسۋ ءۇشىن پارلامەنتتىڭ كەلىسىم كوميسسياسىنىڭ قۇرامىنا سەناتتان ساۋلە ايتپاەۆا, اندرەي لۋكين جانە سۇلتانبەك ماكەجانوۆ ۇسىنىلدى.
وتىرىستا سەناتورلار دەپۋتاتتىق ساۋالدارىن دا جولدادى. دەپۋتات نۇرجان نۇرسيپاتوۆ قوس ازاماتتىق ماسەلەسىن كوتەرىپ, بۇل باعىتتاعى شارالاردى جۇيەلەۋ كەرەكتىگىن ايتتى. ال سەناتور سەرگەي ەرشوۆ اكتسيزدەردىڭ ءوسۋ ەسەبىنەن كوبەيگەن سالىق تۇسىمدەرىن حالىقتىڭ الەۋمەتتىك-وسال توپتارىنا جۇمساۋدىڭ ماڭىزى زور ەكەنىن جەتكىزدى. دەپۋتات بەكبولات ورىنبەكوۆ تاراز قالاسىندا سۋ تازالاۋ قۇرىلعىلارىنىڭ قۇرىلىسىن جۇرگىزۋ قاجەتتىگىن ءسوز ەتسە, سەناتور مۇرات باقتيار ۇلى ارال تەڭىزىنە قاتىستى ماسەلەگە نازار اۋداردى.
