«وقىتۋشىلارعا لايىقتى جالاقى تولەپ, ولاردىڭ قالىپتى جۇمىس اتقارۋى ءۇشىن جاعداي جاساۋ - جوعارى ءبىلىم ساپاسىن ارتتىرۋ ءۇشىن ماڭىزدى. مەملەكەت باسشىسى قاسىم-جومارت كەمەل ۇلى توقاەۆ ۇلتتىق قوعامدىق سەنىم كەڭەسىنىڭ وتىرىسىندا جوعارى وقۋ ورىندارىنداعى پەداگوگيكالىق-وقىتۋشىلىق قۇرامنىڭ جالاقىسىن ارتتىرۋعا قاتىستى تاپسىرما بەرگەن بولاتىن. ناتيجەسىندە 2019 جىلعى قىركۇيەكتە ءبىلىم جانە عىلىم مينيسترلىگىنە تىكەلەي باعىنىشتى جوو وقىتۋشىلارىنىڭ جالاقىسى 20 پايىزعا, كەيىن 2020 جىلعى قىركۇيەك ايىندا تاعى 20 پايىز ۇلعايتىلدى», دەپ جازدى مينيستر Facebook-پاراقشاسىندا.
دەگەنمەن, ونىڭ اتاپ وتۋىنشە, قابىلدانعان ءىس-شارالارعا قاراماستان جالاقى كولەمىن ءالى دە ارتتىرۋ قاجەت. بۇل رەتتە, بولعان جالاقىنىڭ بازاسىنىڭ تومەن بولۋىنا بايلانىستى, ءتىپتى جالاقىنى 20-40 پايىزعا ۇلعايتۋ دا جەتكىلىكسىز بولىپ وتىر. ماسەلەن, قازۇۋ-دا وقىتۋشىنىڭ ورتاشا جالاقىسى 108 مىڭ تەڭگە بولسا, ح. دوسمۇحامەدوۆ اتىنداعى اتىراۋ ۋنيۆەرسيتەتىندە 105 مىڭ تەڭگە, قورقىت اتا اتىنداعى قىزىلوردا ۋنيۆەرسيتەتىندە – 101 مىڭ تەڭگە, ال قاراعاندى يندۋستريالدى ۋنيۆەرسيتەتىندە 99 مىڭ تەڭگە. مۇنداي جالاقى مولشەرى وقىتۋشىلاردى اسا ىنتالاندىرا قويمايتىنى انىق. «كەيبىر جوعارى وقۋ ورىندارى وقىتۋشىلاردىڭ جالاقىسىن كوتەرۋ كەزىندە لاۋازىمدىق جالاقى مولشەرىن نەگىزگە العان. ال لاۋازىمدىق جالاقى مولشەرى وقىتۋشىلاردىڭ ءتۇرلى قوسىمشا اقىلاردى قوسا العانداعى ناقتى جالاقىسىنان تومەن ەكەنىن ايتا كەتكەن ءجون. باسقا جوعارى وقۋ ورىندارى جالاقىنى پەداگوگيكالىق جۇكتەمەنى كوبەيتۋ ارقىلى ارتتىردى. ناتيجەسىندە بىرقاتار وقۋ ورنىندا وقىتۋشى ستاۆكاسىنىڭ كولەمى 900 ساعاتقا دەيىن جەتتى», دەدى ول. اسحات ايماعامبەتوۆ وسىعان بايلانىستى مەملەكەت باسشىسىنىڭ تاپسىرماسىن ورىنداۋ ءۇشىن ەكى نورما بەكىتىلگەنىن ايتادى.
ء«بىرىنشى. 2021 جىلدىڭ قىركۇيەگىنەن باستاپ شتاتتاعى وقىتۋشىلار ءۇشىن مينيمالدى جالاقى مولشەرىن بەلگىلەۋ. ياعني, 2021 جىلدىڭ قىركۇيەگىنەن باستاپ بعم-گە ۆەدومستۆولىق باعىنىشتى جوعارى وقۋ ورنىندا شتاتتاعى وقىتۋشى ايىنا كەم دەگەندە 200 مىڭ تەڭگە, اعا وقىتۋشى – 230 مىڭ تەڭگە, قاۋىمداستىرىلعان پروفەسسور – 260 مىڭ تەڭگە; پروفەسسور 350 مىڭ تەڭگە (ۇلتتىق جوعارى وقۋ ورىندارىندا – 400 مىڭ تەڭگە) الۋى ءتيىس. بۇل جالاقىنىڭ ەڭ تومەنگى مولشەرى بولۋى ءتيىس. سونداي-اق ءار جوعارى وقۋ ورنى وقىتۋشىلاردىڭ بەلگىلى ءبىر جەتىستىكتەرى ءۇشىن باسقا دا ىنتالاندىرۋ تولەمدەرىن بەلگىلەپ, تولەي الادى», دەدى مينيستر.
ونىڭ اتاپ وتۋىنشە, ەكىنشى نورمادا پەداگوگيكالىق جۇكتەمەنىڭ ماكسيمالدى كولەمىن 1 ستاۆكا ءۇشىن 680 ساعاتتان اسىرماۋ كوزدەلگەن.
«ارينە, بۇل پەداگوگيكالىق جۇكتەمەسى اتالعان كورسەتكىشتەن تومەن جوو-لاردى (جىلىنا 450 نەمەسە 500 ساعات) ەشتەڭەگە مىندەتتەمەيدى. ياعني, ساعات سانىن بەلگىلەنگەن 680-كە دەيىن جەتكىزۋ مىندەتى تۇرعان جوق. وقىتۋشىعا بەرىلگەن 1 ستاۆكا كولەمى 700-900 ساعات نەمەسە ودان جوعارى بولاتىن جوعارى وقۋ ورىندارى ساعات سانىن 680-كە دەيىن تومەندەتۋى كەرەك. بۇل بۇيرىقتى ەرتە قابىلداپ جاتقانىمىزدىڭ وزىندىك سەبەبى بار: 2021 جىلدىڭ قىركۇيەگىنە دەيىن جوو باسشىلارىنا وزدەرىنىڭ شىعىستارىن قايتا جوسپارلاپ, وڭتايلاندىرۋ جانە كىرىستەرىن ۇلعايتۋ ءۇشىن ۋاقىت بەرەمىز. اتالعان شەشىم جوعارى وقۋ ورىندارىنداعى اكىمشىلىك-باسقارۋ پەرسونالى مەن پەداگوگيكالىق-وقىتۋشىلىق قۇرامنىڭ اراقاتىناسىن وزگەرتۋگە, باسقا دا ماڭىزى باسىم ەمەس شىعىستاردى قىسقارتۋعا جانە بيۋدجەتتەردىڭ شىعىنىن قايتا قاراۋعا ماجبۇرلەيتىنى انىق. ءبىز رەكتورلارمەن 2021 جىلدىڭ قىركۇيەگىنە دەيىن ءتيىستى جۇمىس جۇرگىزىلەتىنى تۋرالى كەلىسىمگە كەلدىك. پرەزيدەنتتىڭ بۇل تاپسىرماسىنىڭ ورىندالۋ بارىسىن جوو ديرەكتورلار كەڭەستەرى مەن ءبىلىم جانە عىلىم مينيسترلىگى باقىلاۋدا ۇستايتىن بولادى», دەدى مينيستر.
