قازاقستان • 17 ناۋرىز، 2021

سارمات جاۋىنگەرىنىڭ تانىستىرىلىمى ءوتتى

106 رەت كورسەتىلدى

اقتوبە وبلىستىق تاريحي-ولكەتانۋ  مۋزەيىنىڭ كورمە زالىندا تەمىر اۋدانى تاسقوپا ەلدى مەكەنىنىڭ جانىنداعى قورىمنان تابىلىپ، قايتا جاراقتاندىرىلعان سارمات تايپاسى جاۋىنگەرىنىڭ عىلىمي تانىستىرىلىمى ءوتتى دەپ حابارلايدى  Egemen.kz

عاجايىپ بىرەگەي ماتەريال 2019 جىلدىڭ جازىندا تاسقوپا قورعانىنا جۇرگىزىلگەن قازبا جۇمىستارى كەزىندە، وبانىڭ وڭتۇستىك باعىتىنداعى 5،7 مەتر تەرەڭدىكتەن تابىلدى. ارحەولوگتار وبانىڭ وتە ەجەلگى داۋىردە توناۋشىلىققا ۇشىراعانىن انىقتادى. ءا. مارعۇلان اتىنداعى ارحەولوگيا ينستيتۋنىڭ  ديرەكتورى باۋىرجان بايتاناەۆ، عىلىمي قىزمەتكەر ارمان بيسەمباەۆتىڭ كەڭەستەرى نەگىزىندە، رف عا ماتەريالدىق مادەنيەت تاريحى ينستيتۋتىنىڭ رەستاۆراتورى نيكولاي كۋرگانوۆ العاشقى تازالاۋ، كونسەرۆاتسيالاۋ جۇمىستارىن جۇرگىزدى. مۇندا شامامەن 2500 جىل بۇرىن ءومىر سۇرگەن سارمات تايپاسىنىڭ كوسەمى نە جاۋىنگەرى جەرلەنگەنى وباداعى مۇردەنىڭ كيىم قالدىقتارىنان تابىلعان التىن تۇيمەلەر،  بەلبەۋ قالدىقتارى، ساداق جەبەلەرى سالعان وقشانتاي، قانجار، نايزا ۇشى دالەل. التىنمەن اپتالىپ جەرلەنگەن سارمات جاۋىنگەرىنىڭ تەرىدەن جاسالعان بەلدىك قالدىقتارى جانىنداعى ساداق جەبەلەرىن سالاتىن وقشانتاي دا التىنمەن قاپتالعانى انىقتالدى. تۇيمەلەردە  ەجەلگى ادامداردىڭ نانىم-سەنىمىنە ءتان گريفونداردىڭ باستارى، التىن بالىق، كۇن بەينەلەنگەن.

قازاقستاننىڭ باتىس ايماعىندا ءومىر سۇرگەن سارمات تايپاسى كوسەمىنىڭ وباسى  وتاندىق ارحەولوگيانىڭ عانا ەمەس، الەمدىك تاريحقا قوسىلاتىن مول قازىنا دەپ باعالايدى ءا. مارعۇلان اتىنداعى ارحەولوگيا ينستيتۋتىنىڭ ديرەكتورى باۋىرجان بايتاناەۆ. عىلىمي دەرەكتەرگە سۇيەنە وتىرىپ،  جەرلەۋ ماتەريالدارى نەگىزىندە تاسقوپا كوسەمىنىڭ رەكونسترۋكتسياسىن  جەرگىلىكتى شەبەرلەر –بولات اتىراۋباەۆ پەن ەرقوساي ءابىلوۆ ازىرلەدى. سونداي-اق قورعاننان تابىلعان جەرلەۋ زاتتارى نەگىزىندە ساداق پەن قورامساق، جەبەلەر، ەكى بەلبەۋ،  شاعىن قالتاشا، قامشى كوشىرمەلەرى جاسالدى.  سارمات كوسەمىنىڭ شالبارى، جەيدەسى، اياق كيىمى، كۇرتەشەسى جانە باس كيىمى قايتا تىگىلدى.

«اقتوبە وبلىسىنىڭ كيەلى جەرلەرىنىڭ گەوگرافياسى»  ايماقتىق عىلىمي باعدارلاماسى اياسىندا جۇرگىزىلگەن  ارحەولوگيالىق زەرتتەۋلەردىڭ  تۇڭعىش پرەزيدەنت  ن. نازارباەۆتىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى»  باعدارلامالىق ماقالالارى نەگىزىندە كونە تاريحتى كەشەندى زەرتتەۋ اياسىندا جۇرگىزىلىپ وتىرعانىن ايتقان وبلىس اكىمى وڭداسىن ورازالين الداعى ۋاقىتتا دا وسى جۇمىستاردىڭ جالعاساتىنىن مالىمدەدى.  اتاپ ايتقاندا، اقتوبە وبلىسىنىڭ دوڭىزتاۋ-ءۇستىرت ايماعىنداعى ءدىني-عۇرىپتىق كەشەندەر،  مۇعالجار اۋدانىنداعى تولەۋبۇلاق ۇڭگىرىندەگى ەجەلگى پەتروگليفتەر،  حرومتاۋ اۋدانىنداعى ويسىلقارا جانە موڭعولساي قورىمدارىنا كەشەندى زەرتتەۋ جۇمىستارى جۇرگىزىلىپ، كيەلى جەرلەردىڭ ەنتسيكلوپەديالىق انقتامالىعى شىعارىلادى.

سوڭعى جاڭالىقتار

سينگاپۋردىڭ سوڭعى اۋىلى

الەم • بۇگىن، 17:55

پەتر يان ۇزدىكتەر قاتارىنا ەندى

جەكپە-جەك • بۇگىن، 16:05

ۇقساس جاڭالىقتار