«بىلتىر قۇرىلىس قارقىنىن ساقتاپ قانا قويماي, ايتارلىقتاي ۇلعايتتىق. بيىل الەۋمەتتىك تۇرعىن ۇيلەر مەن الەۋمەتتىك نىساندار سالۋدان رەكورد ورناتپاقپىز. قۇرىلىس جۇمىستارى ەلوردانىڭ بارلىق اۋداندارىندا پوليورتالىق قاعيداسى بويىنشا جۇرگىزىلىپ جاتىر. تۇرعىندارعا قاجەت نىسانداردىڭ بارلىعى جاقىن قاشىقتىقتا ورنالاسپاق.
بۇگىن قالانى ارالاۋ كەزىندە الماتى اۋدانىندا ورنالاسقان جەڭىلدىكپەن بەرىلەتىن تۇرعىن ءۇيدىڭ, سونىمەن بىرگە مەكتەپ قۇرىلىسى بارىسىمەن تانىستىم.
قالانى ءجيى ارالاپ تۇرامىن. سوندا عانا قۇرىلىس سالۋشىلار قۇرىلىس قارقىنىن باسەڭدەتپەي, ساپالى جۇمىس ىستەيدى, ال ءبىز جاعدايدى تەك قاعاز بەتىندە ەمەس, قۇرىلىس نىساندارىندا بولىپ جاتقان ناقتى بەينەنى كورەمىز. جۇمىسقا نەمقۇرايلى قارايتىن قۇرىلىس كومپانيالارىنىڭ قىزمەتىنەن باس تارتامىز. قۇرىلىس جۇمىستارى اياقتالعاننان كەيىن اۋماقتاردى اباتتاندىرۋ مەن كوگالداندىرۋعا نازار اۋدارۋ قاجەت.
وسىلايشا, مەملەكەت باسشىسىنىڭ تاپسىرماسى بويىنشا الەۋمەتتىك قولجەتىمدى تۇرعىن ءۇي سانى جوسپارلى تۇردە ۇلعايىپ كەلەدى. ەگەر 2018 جىلى ەلوردادا جەڭىلدىكپەن بەرىلەتىن 1100 پاتەر سالىنسا, 2019 جىلى – 2900, ال 2020 جىلى – 7 مىڭنان استام الەۋمەتتىك پاتەر سالىندى. بيىل وسى كورسەتكىشتى 10 مىڭ پاتەرگە دەيىن ۇلعايتۋدى جوسپارلاپ وتىرمىز.
مەكتەپتەر سالۋ كەزىندە, ەڭ الدىمەن مۇقتاجدىق بار جەرلەردى تاڭدايمىز: ول ەڭ الدىمەن - حالىق تىعىز ورنالاسقان جانە جاڭا سالىنىپ جاتقان اۋداندار. سونىڭ ىشىندە, ەلدى-مەكەندەر دە بار. ماسەلەن, وتكەن جىلى ميچۋرينو ەلدى-مەكەنىندە مەكتەپ سالىندى. بۇرىن وندا بىردە-ءبىر مەكتەپ بولماعان ەدى. بالالار مەن مۇعالىمدەر بەيىمدەلگەن بولمەدە وتىرۋعا ءماجبۇر بولدى.
بيىل بارلىعى 16 مەكتەپ سالامىز. بۇل – 40 مىڭنان استام وقۋشىنى قامتۋعا مۇمكىندىك بەرەدى. وتكەن جىلمەن سالىستىرعاندا قامتىلاتىن وقۋشى سانى 2 ەسەدەن استام كوبەيەدى», دەپ جازدى قالا اكىمى.
