جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ: «ەگەر ستۋدەنت جوعارى وقۋ ورنىنا گرانت بويىنشا 2017 جىلى ءتۇسىپ, 2020-2021 اكادەميالىق جىلى وقۋىن اياقتاسا, ول گرانتتى بۇرىن قابىلدانعان زاڭعا سايكەس وتەيدى. سوندىقتان بۇل رەتتە ايتارلىقتاي جاڭاشىلدىق جوق», دەپ ءتۇسىندىردى.
ايتا كەتەيىك, مەملەكەتتىك گرانت ارقىلى ءبىلىم بەرۋگە قاتىستى وزگەرىستەر ء«بىلىم تۋرالى» زاڭعا 2016 جىلى ەنگىزىلگەن ەدى. وسىلايشا, بىرنەشە جىل بۇرىن پارلامەنت ەنگىزگەن وزگەرىستەرگە سايكەس گرانت بويىنشا وقىعان ستۋدەنتتەر وقۋلارىن اياقتاعان سوڭ ماماندىعى بويىنشا مەملەكەتتىك مەكەمەلەردە 3 جىل جۇمىس ىستەۋگە مىندەتتى بولاتىن. تيىسىنشە, بۇل نورما 2017-2018 اكادەميالىق جىلدان باستاپ مەملەكەتتىك تاپسىرىس ەسەبىنەن جوعارى وقۋ ورىندارىنا تۇسكەن بارلىق ستۋدەنتكە قاتىستى قولدانىلادى.
2021 جىلدىڭ باسىندا گرانتتى وتەۋگە قاتىستى زاڭ تالاپتارى جەڭىلدەتىلدى. سوعان وراي جوو-دا گرانت ارقىلى ءبىلىم العان تۇلەكتەر گرانتتى ماماندىق بويىنشا بۇرىنعىداي تەك مەملەكەتتىك ۇيىمداردا عانا ەمەس, جەكەمەنشىك مەكەمەلەردە دە وتەي الادى.
«بۇعان دەيىن مەملەكەتتىك تاپسىرىس بويىنشا وقىعان ازاماتتار گرانتتى تەك مەملەكەتتىك ۇيىمداردا جانە 3 جىل كولەمىندە جۇمىسپەن وتەۋگە مىندەتتى بولاتىن. ەندى 2021 جىلدان باستاپ يكەمدى ءتاسىل قولدانىلادى. ياعني بيىلدان باستاپ تۇلەكتەر مەنشىك نىسانىنا قاراماستان كەز كەلگەن ۇيىمدا جانە مەملەكەتتىك تاپسىرىس بويىنشا تەگىن وقىعان جىل كولەمىنە سايكەس گرانتتى جۇمىسپەن وتەي الادى», دەدى ادىلەت تويباەۆ.
بۇدان بولەك, جۇمىسپەن وتەۋ مەرزىمى گرانت بويىنشا بارلىق 4 جىل كولەمىندە ەمەس, تەك بەلگىلى ءبىر ۋاقىت ارالىعىندا عانا وقىعاندارداردىڭ پايداسىنا قاراي قايتا قارالدى. مىسالى, ءبىلىم الۋشى جوعارى وقۋ ورنىنىڭ اقىلى بولىمىنە ءتۇسىپ, ءبىراز ۋاقىتتان كەيىن جاقسى ۇلگەرىمى ءۇشىن مەملەكەتتىك ءبىلىم گرانتىن يەلەنۋى نەمەسە كەرىسىنشە, گرانتتا وقىپ ءجۇرىپ, اقىلى بولىمگە اۋىسۋى مۇمكىن. بۇل جاعدايدا ازامات قانشا جىل گرانت ارقىلى وقىسا, گرانتتى ءدال سول مەرزىمگە سايكەس وتەي الادى.
