جاڭا جوبانىڭ تانىستىرىلىمىنا اقپارات جانە قوعامدىق دامۋ ءمينيسترى ايدا بالاەۆا, «سامۇرىق-قازىنا» ۇلتتىق ءال-اۋقات قورى» اق باسقارما توراعاسى احمەتجان ەسىموۆ, «قازاقتەلەكوم» اق باسقارما توراعاسى قۋانىشبەك ەسەكەەۆ جانە باق وكىلدەرى قاتىستى.
– جاڭا تەلەۆيزيالىق پلاتفورمانىڭ اشىلۋى – وتاندىق مەديا سالاداعى ايتۋلى وقيعا. قوعامعا ساپالى ءارى اشىق اقپارات جەتكىزۋ – ءبىزدىڭ قىزمەت سالاسىنداعى باستى مىندەتتەردىڭ ءبىرى. سونىڭ ىشىندە اسىرەسە, جاڭا تەلە-پلاتفورمانىڭ مەملەكەتتىك تىلگە باسىمدىق بەرەتىنى كوڭىل قۋانتادى. سونداي-اق جاڭا باستاما – وتاندىق مەديا سالاسىنىڭ باسەكەگە قابىلەتىن ودان ءارى ارتتىرۋعا ۇلكەن سەرپىن بەرەدى دەپ سەنەمىن. بۇل ورايدا, وسى جاڭا جوباعا باستاما كوتەرىپ, ونىڭ ىسكە اسۋىن قامتاماسىز ەتىپ وتىرعان – «سامرۇق-قازىنا» ءال-اۋقات قورى مەن «كازاقتەلەكوم» كومپانياسىنا العىسىمىزدى بىلدىرەمىز, – دەدى ا.بالاەۆا.
«قازاقتەلەكومنىڭ» «تۆ+» تەلەۆيزيالىق پلاتفورماسى زاماناۋي IPTV/OTT گيبريدتى كەشەنى نەگىزىندە قۇرىلعان. بۇل ەكى ستاندارت – IPTV جانە OTT ءوزارا بولەك قولدانعان كەزدە دە بىرەگەي ساپالى ۇسىنىستاردىڭ شوقتىعىن ۇسىناتىن جۇيە. ال ولاردىڭ ءبىر الاڭدا توپتاسۋى – ابونەنتكە وزىندىك, بىرەگەي, وڭتايلى تەلەۆيزيالىق پاكەتتى ء«وز قولىمەن» قۇرۋعا مۇمكىندىك بەرەتىن مۇلدەم جاڭا تەحنولوگياعا اينالدى.
– «تۆ +» تەلەۆيزيالىق پلاتفورماسىن بيىلعى قاڭتار ايىنان بەرى قولدانىپ كەلەمىن. پايدالانۋشى رەتىندە مەنىڭ زور قىزىعۋشىلىعىمدى وياتتى. وتە ىڭعايلى, ءاردايىم قولجەتىمدى ەكەنىنە كوز جەتكىزدىم. ساياسات, بيزنەس الەمىندە نە بولىپ جاتقانىن بىردەن ءبىلىپ وتىرۋعا ىڭعايلى. ۋاقتىلى كورە الماي قالعان باعدارلامانى قالاعان جاعدايدا قايتالاپ كورۋگە قولايلى ەكەن. شەتەلدە ءجۇرىپ تە وسى مۇمكىنشىلىكتەردى پايدالانۋعا بولادى. سوندىقتان بۇل پلاتفورمانى وتە قىزىقتى دەپ سانايمىن, – دەيدى ا.ەسىموۆ.
ونىڭ ايتۋىنشا, «سامۇرىق-قازىنا» ۇلتتىق ءال-اۋقات قورى قازاقستاندىق نارىقتا الدىڭعى قاتارلى ينفراقۇرىلىم قالىپتاستىرۋعا نيەتتى. «قازاقتەلەكوم» قىزمەتىنىڭ اياسىندا وسىنداي جاھاندىق جۇمىس جۇرگىزۋگە بارلىق مۇمكىندىكتەر بار. ولار ۇسىنعان ينفراقۇرىلىم نەگىزىندە بيزنەس پەن وندىرىسكە عانا ەمەس, جاپپاي تۇتىنۋشىلارعا دا ەڭ ساپالى جانە زاماناۋي ونىمدەر ۇسىنىلادى. سونداي-اق ا.ەسىموۆ بۇل جاڭا جوبا قازاقستاندىق مامانداردىڭ كۇشىمەن جاسالعانىن دا ەرەكشە اتاپ ءوتتى. «بۇل جوبا – «سامۇرىق-قازىنا» قورى توبىنا كىرەتىن كومپانيالار بۇكىل ەل كۇندەلىكتى قولداناتىن اۋقىمدى, جوعارى تەحنولوگيالى جانە تانىمال شەشىمدەردى ءوز بەتىنشە دامىتا الاتىندىعىنىڭ دالەلى», دەيدى ا.ەسىموۆ.
– «قازاقتەلەكوم» اكتسيونەرلىك قوعامى تەلەۆيزيا الەمىنە قادام باسقانىنا نەبارى 10 جىلدىڭ ءجۇزى بولدى. سولاي بولا تۇرا, ءبىز بەلسەندى دامي باستادىق. بۇگىندە ءبىز وسى سالاداعى ءىرى ويىنشىلاردىڭ ءبىرى سانالامىز. 860 مىڭ ابونەنتىمىز بار. سوندىقتان وسى جىلى ءبىز جاڭا جوبانى جۇزەگە اسىرۋدى ماقسات تۇتتىق. كەيىنگى جارتى جىلدا كوپ جۇمىس اتقاردىق. اۋقىمدى دايىندىق جۇمىستارىن قولعا الدىق. سونداي-اق «قازاقتەلەكومنىڭ» ينفراقۇرىلىمىن جەتىلدىرۋ ءۇشىن سوڭعى ەكى جىل بويى ءىرى ينۆەستيتسيا تارتىلدى. ەلباسى نۇرسۇلتان نازارباەۆتىڭ بىزگە بەرگەن تاپسىرمالارى دا تياناقتى ورىندالدى, – دەيدى ق.ەسەكەەۆ.
ماسەلەن, 2018 جىلى 12 قىركۇيەكتە «قازاقتەلەكوم» اكتسيونەرلىك قوعامى رەسپۋبليكانى تسيفرلاندىرۋ باعدارلاماسى اياسىندا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ شالعاي جاتقان اۋىلداردى كەڭ جولاقتى ينتەرنەتكە قوسۋ جوباسى قولعا الىندى. جوبا اياسىندا ەكى جارىم جىلدا 14514 شاقىرىم تالشىقتى-وپتيكالىق بايلانىس جەلىلەرى توسەلدى. 828 ەلدى مەكەندەگى 2496 مەملەكەتتىك مەكەمە كەڭ جولاقتى, جوعارى جىلدامدىقتى ينتەرنەتكە, ونلاين مەديتسيناعا, «تۆ+»-كە قول جەتكىزدى. مەملەكەتتىك مەكەمەلەردىڭ اراسىندا ەڭ الدىمەن مەكتەپتەرگە, اۋرۋحانالارعا, اكىمدىكتەرگە, پوليتسيا پۋنكتتەرىنە, ۆەتەرينارلىق كلينيكالارعا باسا نازار اۋدارىلدى.
– كەيبىر ادامداردىڭ تۇسىنىگىندە «قازاقتەلەكوم» – كونتەنت جەتكىزەتىن «قۇبىر» دەگەن ۇعىم قالىپتاسقان. بۇگىن ءبىز وسى قاساڭ پىكىردى جويعىمىز كەلەدى. ءبىز بۇل جاڭا جوبانى ۇزاق تەكسەردىك. ءتۇرلى سىناقتان وتكىزدىك. بۇگىننەن باستاپ ءوز ءونىمىمىزدى ساتىلىمعا شىعارامىز. وسىلايشا, ابونەنتتەرىمىزدىڭ قاتارى جىلدام كوبەيەدى دەگەن سەنىمدەمىز. شامامەن ءبىر جارىم جىلدىڭ كولەمىندە ءبىزدىڭ تەلەۆيزيامىزدى تاماشالايتىن 1-1,5 ملن ابونەنتىمىز بولادى دەپ جوسپارلاپ وتىرمىز, – دەيدى ق.ەسەكەەۆ.
بۇل تەلەۆيزيالىق پلاتفورماعا «قازاقستاندا جاسالعان» ايدارىمەن وتاندىق فيلمدەر مەن باعدارلامالاردىڭ دا جيىنتىعى كىرەدى. سوندىقتان جاڭا پلاتفورمانىڭ پايدا بولۋى – «قازاقتەلەكومنىڭ» عانا ەمەس, سونىمەن قاتار ونىڭ كوپتەگەن الەۋەتتى سەرىكتەسىنىڭ تاريحىنداعى جاڭا كەزەڭ دەۋگە بولادى.
«قازاقتەلەكوم» اق بولشەك بيزنەس ءبولىمىنىڭ باس ديرەكتورى يگور پوگرەبيتسكي ءىس-شاراعا قاتىسۋشىلارعا جاڭا ءونىمنىڭ تەحنيكالىق مۇمكىندىكتەرىن تانىستىردى. ونىڭ ايتۋىنشا, ءداستۇرلى قىزمەتتەردەن ايىرماشىلىعى – «تۆ +» بىرقاتار ەرەكشە ارتىقشىلىقتارعا يە. ماسەلەن, كورەرمەننىڭ ەفيردى ءوز بەتىنشە باسقارا الۋ قابىلەتى. ياعني بەينەماگنيتوفون سەكىلدى ءفيلمدى العا نەمەسە كەرى اينالدىرۋ مۇمكىندىكتەرى قاراستىرىلعان. ەكىنشى ماڭىزدى ارتىقشىلىعى – تەلەديدار كورۋگە بولاتىن گادجەتتى تاڭداۋ مۇمكىندىگى. ياعني سمارتفوننان, پلانشەتتەن نەمەسە Smart TV فۋنكتسياسى بار تەلەديداردان كورۋ مۇمكىندىگى بار. ەڭ باستىسى, ۇيدە ينتەرنەت بولۋى كەرەك.
– «تۆ+» جوباسى ارنانىڭ تەلەديدارلىق باعدارلاماسىنا ەمەس, كورەرمەن قاجەتتىلىگىنە ساي بەيىمدەلەدى. پايدالانۋشىنىڭ تەلەديدارى ەسكى ۇلگىدە بولسا دا, STB پريستاۆكاسىن پايدالانۋ ارقىلى تاماشالاۋعا بولادى. كورەرمەن نەنى پايدالانسا دا ساپا تومەندەمەيدى (HD نەمەسە 4K). جاڭا جوباعا قوسىلۋدىڭ ۋاقىتى كەلدى, – دەيدى ي.پوگرەبيتسكي.
ايتا كەتۋ كەرەك, «TV +» پلاتفورماسىنىڭ بار مۇمكىندىكتەرىن «قازاقتەلەكوم» ابونەنتتەرى عانا ەمەس, باسقا وپەراتورلاردىڭ تۇتىنۋشىلارى دا پايدالانا الادى. ينتەرنەتكە كىرىپ نەمەسە ارنايى قوسىمشانى ورناتىپ, 170-كە جۋىق ارنانى, مىڭداعان فيلم مەن تەلەحيكايانى كورۋگە بولادى. ال مازمۇننىڭ ساپاسى كەز كەلگەن ينتەرنەت جىلدامدىعىنا اۆتوماتتى تۇردە بەيىمدەلەدى. تاريفتىك جوسپاردىڭ قۇنى ايىنا 1700 تەڭگەدەن باستالادى.
