نۇرلان نىعماتۋليننىڭ ايتۋىنشا, رەسەيدە قىمبات مەتالداردى زاڭسىز ساتقاندار 3-7 جىلعا دەيىن باس بوستاندىعىنان ايىرىلادى. بەلارۋستە دە زاڭسىز التىن ىزدەۋشىلەر قىلمىستىق جاۋاپكەرشىلىككە تارتىلادى.
وسى ورايدا ءماجىلىس توراعاسى قازاقستاندا تەك اكىمشىلىك جاۋاپكەرشىلىك قاراستىرىلعانىن باسا ايتتى.
«سالدارىنان قىمبات باعالى مەتالداردى ۇرلاۋ دەرەگى ازايماي وتىر. ول جىلدان-جىلعا ءوسىپ كەلەدى. مىسالى, «قازاقالتىن» كاسىپورنىندا 2015-2020 جىلدارى 32 مىڭنان اسا زاڭسىز التىن ىزدەۋشىلەر انىقتالعان. 2019 جىلدىڭ اقپانىنان 2020 جىلدىڭ قىركۇيەگىنە دەيىن وسى كاسىپورىن 5 722 زاڭسىز التىن ىزدەۋشىنى پوليتسياعا تاپسىرعان. ونىڭ 80%-ى قايتادان زاڭ بۇزعان. بۇل دەرەك تەك ءبىر كاسىپورىنعا بايلانىستى», دەدى ءماجىلىستىڭ جالپى وتىرىسىندا.
ايتكەنمەن, تومەنگى پالاتانىڭ سپيكەرى نۇرلان نىعماتۋلين يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆقا شۇيلىكتى.
نۇرلان نىعماتۋليننىڭ ايتۋىنشا, مينيسترلىكتىڭ كىمدى قولداپ وتىرعانى تۇسىنىكسىز.
«بەيبىت باكىر ۇلى, ءسىزدىڭ جاۋابىڭىزدى ەستىدىم. بۇل سالادا دەكريميناليزاتسيا بولدى. الايدا نە مينيسترلىك, نە ۇكىمەت بۇل قىلمىس ءۇشىن جازانى قاتاڭداتۋ تۋرالى ۇسىنىس بەرگەن جوق. مينيسترلىك كىمنىڭ جاعىندا؟ ءسىز كىمدى قولداپ وتىرسىز؟ وتاندىق كاسىپورىننىڭ اكتسيونەرلەرى نەمەسە زاڭسىز التىن ىزدەپ جۇرگەندەرمەن بىرگەسىز بە؟», دەدى ءماجىلىس توراعاسى.
وسى تۇستا مينيستر بەيبىت اتامقۇلوۆ جازانىڭ جەڭىل, ايىپپۇلدىڭ وتە تومەن بولۋى سالدارىنان ەلىمىزدە زاڭسىز التىن ىزدەۋشىلەردىڭ سانى ارتقانىن مويىندادى.
ءماجىلىس توراعاسى بەيبىت اتامقۇلوۆقا بۇل قىلمىس ءۇشىن جازانى قاتاڭداتۋ كەرەكتىگىن ايتىپ: ء«سىز نەنى كۇتىپ ءجۇرسىز؟ نەگە ۇيىقتاپ وتىرسىز؟ يندۋستريا جانە ينفراقۇرىلىمدىق دامۋ مينيسترلىگى ۋاكىلەتتى ورگان رەتىندە قىمبات مەتالداردىڭ زاڭسىز اينالىمى ءۇشىن جازانى كۇشەيتۋگە مۇددەلى بولۋى كەرەك. ءسىز بۇل ماسەلە تۋرالى ايتىپ قويماي, زاڭعا تۇزەتۋ ەنگىزۋ تۋرالى باستاما كوتەرۋىڭىز قاجەت. ءبىز ءسىزدى قولدايمىز», دەدى ول.
جوعارىدا ايتىلعان ۇسىنىستى ىشكى ىستەر ۆيتسە-ءمينيسترى الەكسەي كالايچيدي دە قولداپ, كەلەسىدەي پىكىرگە توقتالدى.
ء«سىز دۇرىس ايتىپ وتىرسىز. بۇرىن قىلمىستىق كودەكستىڭ 210-بابى بويىنشا (قىمبات مەتالداردى زاڭسىز ساتقاندار – اۆتور) 7 جىلعا باس بوستاندىعىنا ايىرىلاتىن. بۇل قىلمىس بولىپ سانالاتىن. ارينە, مۇنداي ارەكەت ءۇشىن قىلمىستىق جاۋاپكەرشىلىككە تارتۋعا باستاماسى كوتەرىلسە, ونى ءبىز قولدايمىز», دەدى ىشكى ىستەر ۆيتسە-ءمينيسترى.
ءسوز سوڭىندا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءتيىستى زاڭداردى ءجىتى قاراپ, وعان تۇزەتۋ ەنگىزۋ باستاماسىن كوتەرۋگە ۋادە ەتتى.
