قازاقستاننىڭ كاسىپقوي فۋتبول ليگاسى سۋپەركۋبوك ويىنىن وتكىزۋ ءۇشىن تۇركىستان ءوڭىرىن بەكەرگە تاڭداپ العان جوق. ويتكەنى الداعى ۋاقىتتا بۇل ايماق نۇر-سۇلتان, الماتى قالالارىنان كەيىن ۇلتتىق قۇراما مەن حالىقارالىق ءىرى تۋرنيرلەردى قابىلدايتىن ءۇشىنشى قالاعا اينالاتىنى ءسوزسىز. سول ءۇشىن دە ليگا باسشىلىعى ماڭىزدى دودالار الدىندا تۇركىستاندا وسىنداي تۋرنير ۇيىمداستىرىپ, ستاديوننىڭ, ءوڭىردىڭ دايىندىعىن ءبىر تەكسەرىپ الماقشى بولسا كەرەك. ونىڭ ۇستىنە ەلىمىزدىڭ وزگە ايماقتارىنا قاراعاندا, ءدال قازىر تۇركىستاننىڭ اۋا رايى فۋتبول ويناۋعا ەڭ قولايلى ايماق بولىپ تۇر. سونىمەن قاتار ۋەفا تالاپتارىنا ساي سوعىلعان جاڭا ستاديوننىڭ اشىلۋ سالتاناتى ءدال وسى شاراعا ورايلاستىرىلدى.
بيىلدان باستاپ ەل چەمپيوناتىنا قاتىساتىن كوماندالاردىڭ سانىمەن قوسا, گەوگرافيالىق ايماعى دا كەڭەيىپ جاتقانى بارشاعا بەلگىلى. بىلتىر ءبىرىنشى ليگادا ءۇشىنشى ورىن الىپ, بيىل پرەمەر-ليگادا ونەر كورسەتۋگە مۇمكىندىك بەرىلگەن جەرگىلىكتى «ارىس» كلۋبى اتاۋىن وزگەرتىپ, ەل چەمپيوناتىندا «تۇران» دەگەن اتاۋمەن تۇركىستان وبلىسىنىڭ نامىسىن قورعايدى.
سونىمەن, سۋپەركۋبوك ويىندارىنا توقتالساق. بىلتىر پاندەمياعا بايلانىستى فۋتبولدان قازاقستان بىرىنشىلىگى ەكى رەت كەيىنگە شەگەرىلىپ, كەيىننەن ءبىر ايماقتا ۇيىمداستىرىلعان ەدى. ال قازاقستان كۋبوگى جولىنداعى جارىس كارانتينگە بايلانىستى وتكىزىلگەن جوق. ادەتتە سۋپەركۋبوك باسەكەسىن ەل چەمپيونى مەن قازاقستان كۋبوگىنىڭ جەڭىمپازى ساراپقا سالۋى كەرەك بولاتىن. بىراق قازاقستان كۋبوگى جارىسى بولماعاندىقتان, ۇيىمداستىرۋشىلار سۋپەركۋبوكتىڭ فورماتىن وزگەرتىپ, تۋرنيرگە ىشكى بىرىنشىلىكتە العاشقى ءتورت ورىن العان كوماندالاردى قاتىستىردى.
بۇعان دەيىن جازعانىمىزداي, ءتۋرنيردىڭ فينالىنا بىلتىرعى ەل چەمپيوناتىنىڭ قولا جۇلدەگەرى, سۋپەركۋبوكتىڭ بەس دۇركىن جەڭىمپازى «استانا» مەن 2020 جىلعى بىرىنشىلىكتىڭ كۇمىس مەدال يەگەرى «توبىل» كوماندالارى شىقتى. العاشقى جارتىلاي فينالدا ەلوردالىق ۇجىم قاراعاندىنىڭ «شاحتەرىنەن» 2:0 ەسەبىمەن باسىم تۇسسە, ەكىنشى جارتىلاي فينالدا قوستانايدىڭ كومانداسى بىلتىرعى قازاقستان چەمپيونى الماتىلىق «قايراتتى» ويىن سوڭىنداعى پەنالتي سەرياسىندا جەڭىپ كەتتى.
«توبىل» مەن «استانا» اراسىنداعى فينالدىق ماتچ تا وتە تارتىستى ءوتتى. جارتىلاي فينالداعى «قايراتقا» قارسى وتكەن ويىنداعىداي قوستانايلىقتار بۇل جولى دا كەزدەسۋدىڭ ەسەبىن ءبىرىنشى بولىپ اشتى. 14-مينۋتتا سەرىكجان مۇجىقوۆتىڭ بۇرىشتامادان اسىرعان پاسىنا ءبىرىنشى بولىپ جەتكەن قورعاۋشى سەرگەي مالىي باسپەن گول سوعىپ, كومانداسىن العا شىعاردى. گولدان كەيىن «توبىل» ويىنشىلارى كوبىنە قارىمتا شابۋىلعا يەك ارتىپ, قورعانىسقا باسا مəن بەرىپ, اسا ساقتىقپەن وينادى. ال «استانا» كەرىسىنشە, ءبىرىنشى تايم سوڭىنا دەيىن ەسەپتى تەڭەستىرۋ ءۇشىن قورعانىستى ۇمىتىپ, بۇكىل ۇجىم بولىپ العا ۇمتىلدى. بىراق ونىسىنان تۇك شىقپادى. «توبىلدىڭ» قورعاۋشىلارى مەن قاقپاشىسى الەكساندر موكين مارين توماسوۆ پەن تيگران بارسەگياننىڭ سوققىلارىنا لايىقتى قارسىلىق كورسەتتى. ءسويتىپ ءبىرىنشى تايمدا ەسەپ وزگەرىسسىز قالدى.
كەزدەسۋدىڭ ەكىنشى بولىگىندە دە استانالىقتاردىڭ باسىمدىعى بايقالىپ تۇردى. 45 مينۋت بويى «توبىلدىڭ» ايىپ الاڭىنا قاۋىپ ءتوندىرىپ, دۇركىن-دۇركىن شابۋىلداعانىمەن, «استانا» ويىنشىلارى الەكساندر موكين قورعاعان قاقپادان ساڭىلاۋ تابا المادى. ماتچ سوڭىنداعى كەزەكتى قارىمتا شابۋىلدىڭ بىرىندە «توبىل» قورعاۋشىسى سۇلتان ابىلعازى رومان مۇرتازاەۆقا قارسى ويىن ءتارتىبىن بۇزىپ, تورەشى قوستانايلىقتاردىڭ قاقپاسىنا ايىپ دوبىن بەلگىلەدى. گول سوعىپ, ەسەپتى تەڭەستىرۋ ءۇشىن بەرىلگەن سوڭعى مۇمكىندىك ەكەنىن تۇسىنگەن مارين توماسوۆ 90-مينۋتتا ايىپ دوبىن ءساتتى ورىنداپ, تارازى باسىن تەڭەستىرىپ كەتتى. ءسويتىپ كەزدەسۋ ويىن سوڭىنداعى پەنالتي سەرياسىنا ۇلاستى.
پەنالتي سەرياسىندا الەكساندر موكين رومان مۇرتازاەۆتىڭ سوققىسىن توسىپ, كومانداسىنا جەڭىس سىيلادى. «لوتەرەيادا» 5:4 ەسەبىمەن جەڭىسكە جەتكەن «توبىلدىڭ» اسىعى الشىسىنان ءتۇستى. وسىلايشا, گريگوري بابايان شاكىرتتەرى جاڭا فورماتتا ۇيىمداستىرىلعان بيىلعى قازاقستان سۋپەركۋبوگىنىڭ تۇڭعىش جەڭىمپازى دەگەن اتاققا يە بولدى. بۇعان دەيىن وتكىزىلگەن سۋپەركۋبوكتىڭ ءۇش رەت فينالىنا شىققان «توبىل» ۇشەۋىندە دە باس جۇلدە ءۇشىن وتكەن ويىندا جەڭىلىپ, كۋبوكتان قۇر قالعان-دى. مىنە, بيىل جىلدى ءساتتى باستاپ, العاشقى سۋپەركۋبوگىنا قول جەتكىزدى. سونىمەن قاتار بۇل – باس باپكەر گريگوري باباياننىڭ دا «توبىلعا» كەلگەلى بەرى ەڭ العاشقى كۋبوگى.
پەنالتي سەرياسىندا جولى بولماعان «استانا» ءتۋرنيردىڭ كۇمىس جۇلدەسىن قاناعات تۇتتى. ال ءۇشىنشى ورىن ءۇشىن وتكەن ويىندا الماتىنىڭ «قايراتى» قاراعاندىنىڭ «شاحتەرىمەن» كەزدەسىپ, 2:1 ەسەبىمەن جەڭىسكە جەتتى. باس جۇلدەنى ولجالاعان «توبىل» كلۋبى قازاقستان سۋپەركۋبوگى مەن 25 ملن تەڭگە يەلەنسە, فينالعا شىققان «استانا» 15 ميلليون تەڭگە الدى. قولا جۇلدەگەر اتانعان «قايراتقا» 5 ميلليون تەڭگە تاپسىرىلدى.
وسىلايشا سۋپەركۋبوك ويىنىمەن قازاقستاننىڭ فۋتبول ماۋسىمى اشىلدى. فۋتبولدان قازاقستان چەمپيوناتى 13 ناۋرىز كۇنى باستالادى. سەنبى كۇنى «قايرات» – «جەتىسۋ», «تۇران» – «استانا» جانە «اتىراۋ» – «شاحتەر» كوماندالارى باق سىناسا, جەكسەنبى كۇنى «قايسار» – «تاراز», «كاسپي» – «اقتوبە», «توبىل» – «اقجايىق», «ورداباسى» – «قىزىلجار» كلۋبتارى جاسىل الاڭدا جولىعادى.
