وبلىستىق سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ءمالىم ەتكەنىندەي, ىندەت جۇقتىرعانداردىڭ 39,6 پايىزى جرۆي بەلگىلەرى بويىنشا قارالعان كەزدە بەلگىلى بولدى.
سونداي-اق 39,4 پايىزى – بۇرىن اۋىرعاندارمەن قارىم-قاتىناستا بولعاندار. ياعني ءۇي وشاعىندا وقشاۋلانۋ ءتارتىبى ساقتالماعاندىقتان, كوۆيد كەمى ءۇش-ءتورت ادامعا جۇعادى. ناۋرىزدا كۆي جۇقتىرعاندارمەن بايلانىستا بولعان 1075 ادام مەديتسينالىق باقىلاۋعا الىندى.
ىندەت جۇقتىرعانداردىڭ 37,4 پايىزى – جۇمىس ىستەيتىندەر, 21,2 پايىزى – زەينەتكەرلەر, 17,3 پايىزى – جۇمىسسىزدار, 10,7 پايىزى – وقۋشىلار. وقۋ جىلى باستالعالى بارلىعى 522, ءۇشىنشى توقساندا, 11 قاڭتاردان بەرى 307 وقۋشىدان ىندەت شىقتى. 23 اقپان مەن 8 ناۋرىز ارالىعىندا 16 مەكتەپتەگى 25 سىنىپ كارانتينگە جابىلدى.
«الدا كورىسۋ كۇنى, سودان كەيىن ناۋرىز مەيرامى كەلە جاتىر. سوندىقتان وسى مەرەكەلەر كەزىندە ەڭ الدىمەن ساقتىقتى ۇمىتپاي, ءىس-شارالاردى ونلاين وتكىزۋ كەرەك», دەدى ن.مۇستاەۆ.
وسىعان وراي ءوڭىر باسشىسى ع.ەسقاليەۆ مونيتورينگتىك توپتار جۇمىسىن كۇشەيتۋدى تاپسىردى.
