– ەكەۋمىز دە شالقاردىڭ تۋماسىمىز, ءبىر مەكتەپتەن ءبىلىم الدىق, ءبىر-ءبىرىمىزدى بالا كەزدەن تانيمىز دەسەك تە بولادى. وسى تانىستىعىمىز ەسەيگەن شاقتا ماحابباتقا ۇلاسىپ, وتاۋ قۇردىق. كوپ بالالى وتباسى اتانۋدىڭ اتا-اناعا جۇكتەر جاۋاپكەرشىلىگى دە مول. جۇبايىم ەكەۋمىز كۇندەلىكتى تىرلىكتە كەزىگەتىن قيىندىقتارعا مويىماي, بارىنە تۇسىنىستىكپەن قاراۋعا تىرىسامىز. بىزگە بالالاردىڭ شات كۇلكىسىن كورۋدەن اسقان قۋانىش جوق, بايلىعىمىز دا وسى – سوڭىمىزدان ەرگەن كىشكەنتايلارىمىز. ء«ار بالانىڭ ءوز نەسىبەسى بار» دەمەكشى, كوز الدىمىزدا امان ءجۇرىپ, ەسەيسە بولدى,– دەيدى 30 جاستاعى كوپ بالالى انا.
كەيدە كوپ بالالى وتباسىلارمەن تىلدەسكەندە ولاردىڭ تاراپىنان ءبىر مۇقتاجدىعى ايتىلىپ, ءبىر سالەمدەمەسىن جەتكىزەتىن بولىپ مىندەت ارقالاپ قايتاتىنسىڭ. بۇل جولعى كەيىپكەرلەرىمىزدەن بارعا قاناعات, جوققا سابىر تىلەگەن قاراپايىمدىلىقتى كوردىك. ايىمنىڭ اسپازدىق ماماندىعى بار. بىراق تۇرمىس قۇرعالى وسى اللا سىيلاعان بوپەلەرىنىڭ تاربيەسىمەن ۇيىندە وتىر. سولاردىڭ ساباقتارىنا قارايدى, بالاباقشاعا اپارادى, وندا ۇيىمداستىرىلاتىن ءتۇرلى شارالارعا قاتىسىپ, بالالارىن قۋانتادى. قايىرىمدىلىق اكتسيالارىنا دا ءوز ۇلەستەرىن قوسۋدى اتا-انالىق بورىشتارىنا سانايدى.
ايىم – «بالاسى اتقا شاپسا, ۇيدە وتىرىپ تاقىمىن قىسقان» ىلكىدەگى التىن قۇرساقتى انالاردىڭ جۇرناعى ەكەنى داۋسىز. «اعا, ءبىزدىڭ وتباسى تۋرالى جازساڭىز بالالارىم-
نىڭ جەتىستىكتەرىن دە قالدىرماڭىزشى...» دەپ ءوتىندى. بالا جەتىستىگى – اتا-انا قۋانىشى دەگەن وسى.
مەكتەپكە باراتىن بەسەۋى دە وقۋ وزاتتارى, سپورتتان جاقسى كورسەتكىشتەرى بار. ۇلكەنى نازىم بوس ۋاقىتىندا وقۋشىلار سارايىنداعى قولونەر ۇيىرمەسىنە قاتىسادى. ول ۇساق مونشاقتارمەن توقۋعا كىشكەنتايىنان بەيىم ەكەن. قازىر سول قابىلەتىن ۇيىرمەگە قاتىسىپ, شىڭداپ ءجۇر. ءانۋار ەسىمدى ۇلدارى №1 شالقار بالالار مەن جاسوسپىرىمدەر سپورت مەكتەبىندە گرەك-ريم كۇرەسىنەن ۇيىرمەگە قاتىسادى, ال گۇلبار-
شىن ەسىمدى قىزدارى №2 بالالار مەن جاسوسپىرىمدەر سپورت مەكتەبىندە دزيۋدومەن شۇعىلدانادى. سپورتقا يكەمدى وسى ەكەۋى اۋداندىق, وبلىستىق, رەسپۋبليكالىق سايىستاردا بىرنەشە مارتە جۇلدەگەر اتانىپ, مەدالدار يەلەنگەن. ەگىز قىزدارى مەكتەپىشىلىك ءبىلىم بايگەلەرىندە جاقسى ناتيەجەلەر كورسەتىپ, وزات وقۋشىلار قاتارىندا تۇر.
№6 ورتا مەكتەبىنىڭ 3-سىنىبىندا وقيتىن دزيۋدوشى گۇلبارشىن «مەن بولاشاقتا كىم بولامىن؟» دەگەن تاقىرىپتا جازعان شىعارماسىندا «ەڭ الدىمەن ادامگەرشىلىگى مول جاقسى ادام, ءبىلىمدى وقۋشى, ەلىمنىڭ پاتريوتى بولعىم كەلەدى...», دەپ باستاپ, ون ساۋساعىنان ونەرى تامعان شەبەر بولعىم كەلەدى دەپ ويىن تۇيىندەپتى. ويتكەنى بۇل اۋلەتتىڭ ارعى اتالارىندا ىسمەرلىك قاسيەت بار ەكەن. وسى شىعارماسى وتكەن جىلى «قازاقستاننىڭ 100 ۇزدىك دارىندى وقۋشىسى» اتتى رەسپۋبليكالىق بايقاۋدىڭ ماتەريالدار جيناعىنا ەنىپ, ەلىمىزدەگى «Bilim-orkenieti» ۇلتتىق يننوۆاتسيالىق عىلىمي-زەرتتەۋ ورتالىعى بەكىتكەن «قازاقستان رەسپۋبليكاسىنىڭ دارىندى وقۋشىسى» اتتى توسبەلگىسى مەن كۋالىگىن يەلەنىپتى.
وقۋعا زەيىندى, ونەرگە قۇشتار ورەندەردىڭ اكەسى ازامات حاديمجان قازىر «كازتەلەراديو» اق-نىڭ شالقار تەلەورتالعىندا جۇمىس ىستەيدى. ەرگە لايىقتى ءىستىڭ قاي-قايسىنا دا قولىنىڭ ەپتىلىگى بار 36 جاستاعى اكە بالالارىنىڭ ارماندارى ورىندالاتىنىنا سەنەدى.
مۇحتار مىرزالين,
قازاقستان جۋرناليستەر وداعىنىڭ مۇشەسى.
اقتوبە وبلىسى,
شالقار اۋدانى
