بىلىكتى باسشى، ءبىلىمدى مامان

ايماقتار • 05 ناۋرىز، 2021

بىلىكتى باسشى، ءبىلىمدى مامان

36 رەت كورسەتىلدى

بۇگىنگى تاڭدا جامبىل وبلىسىنىڭ سۋارمالى جەرلەرى شۋ جانە تالاس ترانسشەكارالىق وزەندەرىنىڭ سۋلارىمەن قامتاماسىز ەتىلەدى. قازىرگى كەزدە وبلىس اۋماعىندا 156 گيدروتەحنيكالىق قۇرىلىس بار. وبلىستاعى جەر ءۇستى سۋ رەسۋرستارى شۋ، تالاس جانە اسا وزەندەرىنىڭ باسسەيندەرىندە شوعىرلانعان. بۇل رەتتە ءوڭىر اۋىل شارۋاشىلىعىنا قاجەتتى سۋ قورىن كورشى قىرعىز رەسپۋبليكاسىندا ورنالاسقان «كيروۆ» سۋ قويماسىنان الادى. ال سۋدىڭ ءبولىنۋى، جايىلۋى، يگەرىلۋى سياقتى ماسەلەلەردىڭ ءبارى دە وبلىس بويىنشا شۋ-تالاس باسسەيندىك ينسپەكتسياسىنىڭ مىندەتىنە كىرەدى. اتالعان ينسپەكتسيانىڭ باسشىسى گۇلميرا يماشەۆا بۇگىندە وڭىردەگى وسىنداي ەڭ ءبىر كۇردەلى سالانى باسقارىپ وتىرعان بىلىكتى مامان. سونداي-اق ءوزى دە قىرۋار شارۋانىڭ بەل ورتاسىندا ءجۇر.

حاميت ەسامان

كوكتەم كەلىپ، كۇن جىلىنعاندا بۇل مەكەمەنىڭ جۇمىسى ءتىپتى قىزا تۇسەدى. كورشى مەملەكەتتەن تىرشىلىك كوزىن تارتۋ، ونى ۇيلەستىرۋ جۇمىستارىنىڭ ءوزى باسشىعا ۇلكەن جاۋاپكەرشىلىك جۇكتەيدى. بۇل رەتتە گۇلميرا يماشەۆا وسى سالاداعى تالاي جىلعى تاجىريبەسىن پايدالانىپ، ءاربىر ماسەلەنىڭ وڭ شەشىلۋىنە ىقپال ەتىپ كەلەدى. سالاداعى ۇزاق جىلعى ەڭبەك ءوتىلى گۇلميرا ساعىنبايقىزىن بۇل كۇندە بىلىكتى باسشى، ءبىلىمدى مامان رەتىندە تانىتقان.

ول 1987 جىلى جامبىل گيدرومەليوراتيۆتىك-قۇرىلىس ينستيتۋتىن ينجەنەر-قۇرىلىسشى ماماندىعى بويىنشا بىتىرگەن. نازىك جاندىلار كوپ بارا بەرمەيتىن ماماندىقتىڭ يەسى اتانعان كەيىپكەرىمىز سول جىلداردان بەرى تالاي باسپالداقتان ءوتىپ، تاجىريبە جينادى. ەڭ باستىسى ەلگە قىزمەت ەتۋ دەگەن ابىرويلى جولدى تاڭدادى. ءارى اعاسى، سۋ سالاسىنىڭ بىلىكتى مامانى، ۇزاق جىلدار بويى «جامبىلۆودستروي» اكتسيونەرلىك قوعامىنىڭ پرەزيدەنتى، وبلىستىق ءماسليحاتتىڭ دەپۋتاتى بولعان بەرىكشال يماشەۆتىڭ ومىرلىك ەڭبەك جولىن جالعاستىردى.

گۇلميرا يماشەۆا 1988-2010 جىلدار ارالىعىندا شۋ-تالاس باسسەيندىك ينسپەكتسياسىنىڭ تەحنيگى، ينجەنەرى، اعا مامانى، جەتەكشى مامانى، باس مامانى جانە ءبولىم باسشىسى قىزمەتتەرىن اتقارعان. سونداي-اق 2010 جىلدان 2018 جىلعا دەيىن ەلىمىزدىڭ اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ ساراپشىسى، باس ساراپشىسى، سۋ رەسۋرستارىن پايدالانۋدى رەتتەۋ باسقارماسىنىڭ باسشىسى بولعان. قىزمەتتىڭ قاي ساتىسىندا جۇرسە دە تالاپشىل، ىسكەرلىك قاسيەتىمەن ەرەكشەلەندى. ال 2018 جىلى ەلىمىزدىڭ ەكولوگيا، گەولوگيا جانە تابيعي رەسۋرستار مينيسترلىگىنىڭ سۋ رەسۋرستارى كوميتەتى شۋ-تالاس باسسەيندىك ينسپەكتسياسىنىڭ باسشىسى بولىپ تاعايىندالعان. سودان بەرى وسى سالانىڭ ىستىعىنا كۇيىپ، سۋىعىنا توڭىپ كەلەدى. كاسىبىنە ادال بىلىكتى باسشىنىڭ بارلىق كەزەڭدە دە كۇردەلى ماسەلەنىڭ شەشىمىن تاۋىپ، ءتيىستى شارالاردى قابىلداعانى دا ەلدىڭ ەسىندە.

ماسەلەن، جىل سايىن قىرعىز تاراپىنىڭ مەملەكەتارالىق پايدالانۋداعى سۋ شارۋاشىلىعى كانالدارى ارقىلى سۋ بەرۋدىڭ كەلىسىلگەن كەستەلەرىن ساقتاماۋى سالدارىنان جانە سوڭعى جىلداردىڭ سۋ تاپشىلىعى كەزەڭىنە بايلانىستى جامبىل وبلىسىنىڭ ديقاندارى سۋدى تولىعىمەن الا الماۋدا. بۇل ءوز كەزەگىندە ءوڭىر تۇرعىندارىن الاڭداتقان ماسەلە بولىپ وتىر. وسى ماسەلەگە دە بىلەك سىبانا كىرىسكەن گۇلميرا يماشەۆا ماسەلەنىڭ شەشىلۋى ءۇشىن ءتيىستى كەلىسسوزدەر جۇرگىزۋدە.

«شۋ-تالاس باسسەيندىك ينسپەكتسياسى قىزمەتىنىڭ اۋماقتىق سالاسى نەگىزىنەن شۋ وزەنىنىڭ باسسەينىنە كىرمەيتىن مويىنقۇم، قورداي جانە شۋ اۋداندارىنىڭ ءبىر بولىگىن قوسپاعاندا جامبىل وبلىسىنىڭ اۋماعىن، كورشى تۇركىستان وبلىسى سوزاق اۋدانىنىڭ اۋماعىن جانە تۇركىستان قالاسى اۋماعىنىڭ ءبىر بولىگىن، سونداي-اق قىزىلوردا وبلىسىنىڭ جاڭاقورعان جانە شيەلى اۋداندارى اۋماقتارىنىڭ ءبىر بولىگىن، سونىمەن قاتار الماتى وبلىسى جامبىل اۋدانى اۋماعىنىڭ ءبىر بولىگىن قامتيدى. جالپى، شۋ-تالاس گيدروگرافيالىق باسسەينىنىڭ اۋدانى 160،3 مىڭ شارشى شاقىرىمدى قۇرايدى. مەكەمە ەلىمىزدىڭ سۋ كودەكسىن، ۇكىمەتتىڭ قاۋلىلارىن جۇزەگە اسىرۋدا، سۋ رەسۋرستارىن ءتيىمدى پايدالانۋداعى مەملەكەتتىك باقىلاۋدى جاقسارتۋ بارىسىندا ۇنەمى ىزدەنىستە»، دەيدى ينسپەكتسيا باسشىسى.

سونداي-اق ول جىل سايىنعى قىسقى جانە كوكتەمگى كەزەڭدەردە سۋ تاسقىنى قاۋپىنىڭ الدىن الۋ، ونى بولدىرماۋ ماقساتىندا وبلىستىق جانە رەسپۋبليكالىق دەڭگەيدەگى ءىس-شارالاردى ۇيىمداستىرۋدا ايانباي ەڭبەك ەتۋدە. بىلىكتى ماماننىڭ ەڭبەگىن بيلىك تە جوعارى باعالاپ، ول ءار جىلدارى سۋ شارۋاشىلىعىن دامىتۋ، سۋ رەسۋرستارىن ءتيىمدى پايدالانۋ جانە قورعاۋ جۇمىستارىنا سۇبەلى ۇلەس قوسقانى ءۇشىن ەلىمىزدىڭ اۋىل شارۋاشىلىعى مەن ەكولوگيا، گەولوگيا جانە تابيعي رەسۋرستار مينيسترلىگىنىڭ، سۋ رەسۋرستارى كوميتەتىنىڭ قۇرمەت گراموتالارى جانە العىس حاتتارىمەن ماراپاتتالعان. سونداي-اق گۇلميرا ساعىنبايقىزىنا «سۋ شارۋاشىلىعىنىڭ ۇزدىگى» توسبەلگىسى مەن «استانا 20 جىل» مەرەكەلىك مەدالى، «قر ەكولوگيا سالاسىنا 30 جىل» مەدالى، «قر تاۋالسىزدىگىنە 25 جىل» مەرەكەلىك مەدالى جانە «قر كونستيتۋتسياسىنا 25 جىل» مەرەكەلىك مەدالى بەرىلگەن.

جامبىل وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز