ايماقتار • 02 ناۋرىز، 2021

سقو-دا سۋ تاسقىنى قاۋپى كۇشەيدى

12 رەت كورسەتىلدى

سولتۇستىك قازاقستان وبلىسىندا ءۇش سۋ قويماسى بولسا، سونىڭ ەكەۋى – سەرگەەۆ جانە پەتروپاۆل سۋ قويمالارى شامامەن 90 %-عا دەيىن تولعان.

بۇگىن سقو وڭىرلىك كوممۋنيكاتسيالار قىزمەتىنىڭ بريفينگىندە توتەنشە جاعدايلار دەپارتامەنتىنىڭ ماماندارى كوكتەمگى سۋ تاسقىنىنىڭ الدىن الۋعا قاتىستى وڭىردە اتقارىلىپ جاتقان جۇمىسپەن تانىستىردى. مەتەورولوگيالىق بولجام بويىنشا جانە ىلعال قورىن سارالاي كەلە ماماندار بيىل سقو-دا كوكتەمدە سۋ تاسقىنى بولادى دەگەن بولجام جاساپ وتىر.

«كۇزگى ىلعال قورى كەي جەرلەردە نورمادان 36%-عا ارتىق. قار قالىڭدىعى جىلداعىداي بولعانىمەن، توپىراق 60-150 سم ارالىعىندا قاتقان. سەرگەەۆ سۋ قويماسى 88،1%-عا تولىپ، مۇز قالىڭدىعى 70 سم-گە جەتكەن. پەتروپاۆل سۋ قويماسى 89%-عا تولعان، مۇز قالىڭدىعى – 41 سم»، دەيدى سقو تجد ءبولىم باستىعى سەرىك ناۋرىزباەۆ.

ارنايى قىزمەتتەردىڭ كوكتەمگى سۋ تاسقىنىنا ازىرلىگىن تەكسەرۋ ماقساتىندا 4-5 ناۋرىز ارالىعىندا «كوكتەم-2021» رەسپۋبليكالىق كوماندا-شتابتىق جاتتىعۋى وتەدى. جاعدايدى باقىلاۋدا ۇستاۋ ءۇشىن دەپارتامەنتتە ارنايى شتاب تا قۇرىلعان. «قازىر سقو-دا 6 مىڭنان استام تۇرعىنى بار 79 ەلدى مەكەندى كوكتەمدە سۋ باسۋ قاۋپى بار.

ونىڭ 30-ى وزەندەردىڭ، 13-ءى كولدەردىڭ تاسۋىنان، قالعانى ەرىگەن قار سۋىنان زارداپ شەگۋى مۇمكىن. تاعى 92 ەلدى مەكەندى باقىلاۋدا ۇستاپ وتىرمىز. سۋ تاسقىنىمەن كۇرەسكە 484 ادامنان قۇرالعان ارنايى توپتار جاساقتالدى. ولاردىڭ قاراماعىندا 155 تەحنيكا، 8 ءجۇزۋ قۇرالى جانە 83 موتوپومپا بار.

كۇردەلى جاعداي تۋىندايتىن بولسا قوسىمشا 2 مىڭعا جۋىق ادام، 1،5 مىڭعا جۋىق تەحنيكا تارتىلادى»، - دەيدى سەرىك ناۋرىزباەۆ. بۇگىنگە دەيىن ەلدى مەكەندەردەن 780 تەكشە مەتر قار شىعارىلدى. بۇل جۇمىس ءالى دە جالعاسپاق.

 

سوڭعى جاڭالىقتار

ۇقساس جاڭالىقتار