ايماقتار • 02 ناۋرىز، 2021

اتىراۋلىق اسكەريلەر ارداگەرلەر تۇراتىن ءۇيدىڭ اۋلاسىن تازارتىپ بەردى

80 رەت كورسەتىلدى

اتىراۋ قالالىق قورعانىس ىستەرى جونىندەگى بىرىككەن باسقارمانىڭ اسكەري قىزمەتشىلەرى ەكىنشى دۇنيەجۇزىلىك سوعىستىڭ ارداگەرلەرى تۇراتىن ۇيلەردىڭ اۋلاسىن قاردان تازارتىپ بەردى، دەپ حابارلايدى Egemen.kz.

ء«بىز بۇگىنگى بەيبىت ءومىر ءۇشىن مايدان دالاسىنان ورالعان ارداگەرلەردى ەشقاشان نازاردان تىس قالدىرمايمىز. ارداگەرلەرگە تەك مەرەكە كۇندەرى عانا ەمەس، ءاردايىم كومەك كورسەتۋگە تىرىسامىز. كوكتەم ماۋسىمى باستالىسىمەن ولار تۇراتىن ءۇيدىڭ اۋلاسىن رەتكە كەلتىرۋ تۋرالى شەشىم قابىلدادىق» دەيدى قورعانىس ىستەرى جونىندەگى بىرىككەن باسقارمانىڭ باستىعى، پودپولكوۆنيك باتىرحان قازاقوۆ.

ەكىنشى دۇنيەجۇزىلىك سوعىسقا قاتىسقان ارداگەرلەردىڭ قاتارىندا اسكەري ۇشقىش، زاپاستاعى كاپيتان ايدىن ايباروۆ تا بار. بيىل 100 جاسقا تولاتىن ارداگەر اسكەري قىزمەتكەرلەرمەن كەزدەسكەنىنە قۋانىپ قالدى. سوعىس جىلدارىنان ەستەلىك ايتىپ، اسكەري قىزمەتشىلەردى تۋعان كۇنىنە شاقىردى. عاسىر جاساعان مايدانگەردىڭ كوڭىلى سەرگەك، قيمىلى شيراق. بويىن تىك ۇستايدى.  

ال، ارداگەر سەرجانت زاكاريا سۇلتانوۆ سوعىسقا ءوز وتىنىشىمەن اتتانىپتى. الدىمەن ورىنبور مەن باشقۇرتستاندا اسكەري دايىندىقتان وتكەن. سودان كەيىن شاڭعى باتالونىنىڭ قۇرامىندا ۋفادا قۇرىلعان موتواتقىشتار بريگاداسىنىڭ قاتارىنا قوسىلعان. بەلارۋسسيا مەن شىعىس پرۋسسياداعى دۇربەلەڭ شايقاستاردا اياعىنان ەكى رەت جاراقاتتانعان. الايدا وجەت مىنەزدى جىگىت سوندا دا مايدان دالاسىن، قارۋلاستارىن تاستاماعان.

«ەكى رەت جاراقاتتانعاننان كەيىن مەنى كالينينگراد وبلىسىنداعى گارنيزوندىق قىزمەتكە تاعايىندادى. سول قالادا جەڭىستى قارسى الدىم. كەيىن تۋعان جەرگە ورالدىم. قازىر مەنىڭ جادىمدا مايدان دالاسىنان ەستەلىكتەر مەن جاراقاتتارىم قالدى» دەيدى سوعىس ارداگەرى زاكاريا سۇلتانوۆ.

 

سوڭعى جاڭالىقتار

ۇقساس جاڭالىقتار