قازاقستاندىق دەلەگاتسيا وكىلدەرى – ۇلتتىق اكادەميالىق كىتاپحانا مەن وڭىرلىك كىتاپحانالار جەكە ەكسپوزيتسيالىق الاڭدا قازاق ادەبيەتى مەن مادەنيەتىن ناسيحاتتادى. كورمەدە ەل تاۋەلسىزدىگىنىڭ 30 جىلدىعىنا, مەرەيتويلىق داتالارعا ارنالعان كىتاپتار, ەلباسى نۇرسۇلتان نازارباەۆ پەن ەل پرەزيدەنتى قاسىم-جومارت توقاەۆتىڭ ەڭبەكتەرى, تاريحي جانە مۇراعاتتىق قۇجاتتار, زاماناۋي باسىلىمدار, سونداي-اق, 2021 جىلداعى مەرەيتوي يەلەرىنىڭ – ىبىراي التىنسارين, جامبىل جاباەۆ, مۇقاعالي ماقاتاەۆ, ت.ب. اۆتورلاردىڭ كىتاپتارى قويىلدى.
«ەلدىك ەكسپوزيتسيا قازاقستان تاۋەلسىزدىگىنىڭ 30 جىلدىعىنا ارنالعان جانە بىرقاتار قازاقستاندىق ۇيىمنىڭ كۇشىمەن جاساقتالعان. ستەندتىڭ قالىپتاسۋىنا قازاقستان رەسپۋبليكاسىنىڭ كىتاپ پالاتاسى مەن قازاقستان جازۋشىلار وداعى ىقپال ەتتى», دەپ حابارلادى قازاقستاننىڭ بەلارۋس رەسپۋبليكاسىنداعى ەلشىلىگى.
ەل پاۆيلونىنىڭ سالتاناتتى اشىلۋ ءراسىمى بەلارۋس رەسپۋبليكاسىنىڭ اقپارات ءمينيسترى يگور لۋتسكيدىڭ, مەملەكەت قايراتكەرى, ديپلومات, بەلارۋس رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى ماكسيم رىجەنكوۆتىڭ, قازاقستان رەسپۋبليكاسىنىڭ بەلارۋس رەسپۋبليكاسىنداعى توتەنشە جانە وكىلەتتى ەلشىسى اسقار بەيسەنباەۆتىڭ, بەلارۋس رەسپۋبليكاسى ۇلتتىق كىتاپحاناسىنىڭ ديرەكتورى رومان موتۋلسكيدىڭ, «زۆيازدا» باسپا ءۇيىنىڭ ديرەكتورى الەكساندر كارليۋكەۆيچتىڭ, بەلارۋس رەسپۋبليكاسى جازۋشىلار وداعى توراعاسىنىڭ ورىنباسارى ەلەنا ستەلماحتىڭ جانە بەلارۋستەگى قازاق دياسپوراسىنىڭ قاتىسۋىمەن ءوتتى.
شارا بارىسىندا بەلارۋس ۇلتتىق كىتاپحاناسىندا قازاق ادەبيەتى مەن مادەنيەتى ورتالىعى اشىلدى. ايتا كەتەيىك, ۇلتتىق اكادەميالىق كىتاپحانا مادەنيەت جانە سپورت مينيسترلىگىنىڭ قولداۋىمەن, سىرتقى ىستەر مينيسترلىگىمەن جانە قازاقستاننىڭ شەت ەلدەردەگى ەلشىلىكتەرىمەن بىرلەسىپ, الەمنىڭ ۇلتتىق جانە باسقا دا كىتاپحانالارىندا قازاق ادەبيەتى مەن مادەنيەتى ورتالىقتارىن اشۋ حالىقارالىق جوباسىن ءساتتى جۇزەگە اسىرۋدا.
بۇگىندە الەمنىڭ 38 ەلىندە, ماسەلەن, كورەيا, قىرعىز رەسپۋبليكاسى, فينليانديا, ۆەنگريا, رەسەي فەدەراتسياسى, ارمەنيا, مالايزيا, تۇركيا, فرانتسيا, جاپونيا, شۆەتسيا, ماكەدونيا, بولگاريا, چەحيا, يتاليا ەلدەرىندە, سونداي-اق نيۋ-يورك كوپشىلىك كىتاپحاناسى, اقش كونگرەسىنىڭ كىتاپحاناسىندا ورتالىقتار اشىلىپ, جۇمىس ىستەپ تۇر.
كەزدەسۋ اياسىندا قازاقستان مەن بەلارۋس ۇلتتىق كىتاپحانالارى اراسىندا ءوزارا مادەني جانە كىتاپحانالىق ىنتىماقتاستىق, حالىقارالىق كىتاپ الماسۋ, تاجىريبە جانە ماماندار الماسۋ, تسيفرلى, ەلەكتروندى ءوزارا ءىس-قيمىل ماسەلەلەرى قامتىلاتىن مەموراندۋمعا قول قويىلدى.
كورمەنىڭ اشىلۋ راسىمىندە قازاقستان رەسپۋبليكاسىنىڭ توتەنشە جانە وكىلەتتى ەلشىسى اسقار بەيسەنباەۆ: «مينسك تورىندەگى كەرەمەت عيماراتتا وسىنداي ەكى ەلدىڭ ءىس-شاراسىنا قاتىسىپ وتىرعانىما قۋانىشتىمىن. بۇل عيمارات – جاي عانا كىتاپحانا ەمەس, ارحيتەكتۋرانىڭ عاجايىپ تۋىندىسى. بەلارۋس رەسپۋبليكاسى ۇلتتىق كىتاپحاناسىمەن ءبىز جاقسى قارىم-قاتىناستامىز. ءارتۇرلى مەيرامدار مەن ايتۋلى كۇندەردى بىرگە اتاپ ءوتۋ تاماشا داستۇرگە اينالدى. وتكەن جىلى ءال-ءفارابيدىڭ 1150 جىلدىعى مەن ابايدىڭ 175 جىلدىعىنا بايلانىستى ءتۇرلى ءىس-شارالاردى بىرلەسىپ وتكىزدىك. بۇل ءۇشىن بەلارۋس رەسپۋبليكاسى ۇلتتىق كىتاپحاناسىنىڭ ديرەكتورى رومان موتۋلسكيگە العىس ايتقىم كەلەدى. بيىل قازاقستان ءوز تاۋەلسىزدىگىنىڭ 30 جىلدىعىن اتاپ وتۋدە. مىنە, ەلىمىزدىڭ ۇلتتىق اكادەميالىق كىتاپحاناسى بەلارۋس رەسپۋبليكاسى ۇلتتىق كىتاپحاناسىندا قازاق ادەبيەتى مەن مادەنيەتى ورتالىعىن اشىپ جاتىر. بۇل ەكى ەل اراسىنداعى رۋحاني قارىم-قاتىناستى ودان ءارى نىعايتارى ءسوزسىز», دەدى.
ايتا كەتەيىك, ەل دەلەگاتسياسى بەلارۋس ۇلتتىق كىتاپحاناسىنا 300-دەن استام كىتاپ الىپ بارعان.
