ەشكىمگە ۇقسامايتىن ءومىرى, تايتالاس تاعدىرى بار. تاۋ تۇلعالى, قازاقتىڭ دالاسىنداي كەڭ پىشىلگەن, ءوزى وسكەن قاراتاۋداي قايىسپايتىن قايسار تۇلعا بولاتىن. جىلدار جىلجىپ الىستاعان سايىن, وسىنداي ادامداردىڭ جوقتىعى كوڭىلىڭە قىلاۋ, جۇرەگىڭە جاماۋ تۇسىرەدى. ويتكەنى كەشەگى ت.رىسقۇلوۆ, ب.مومىش ۇلى, س.زيمانوۆ, ش.مۇرتازا, ءو.جولداسبەكوۆ سىندى ۇلت تۇلعالارىنىڭ نوقتاعا باسى سىيمايتىن تاعدىرى ۇلتجاندىلىقتىڭ ۇلگىسى بولىپ قالا بەرەدى.
ول 1949 جىلى شىمكەنت قالاسىنداعى سىپاتاەۆ اتىنداعى قازاق ورتا مەكتەبىن التىن مەدالمەن ءبىتىردى. وعان جاراتقان وزگەگە ۇقسامايتىن تاعدىر بەردى. ۇلت كادرلارىن ىرىكتەۋ كەزەڭى ونىڭ «تار جول, تايعاق كەشۋ» جولىن ايقىنداپ بەردى. ول ءومىر مايدانىنا قورقاقتاماي, جالتاقتاماي كىردى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ مەحانيكا-ماتەماتيكا فاكۋلتەتىنە وقۋعا ءتۇسۋ – تالانتتى ادامنىڭ تاعدىرىنا جازىلعان باقىت. قۋانىشى دا, قيىندىعى دا مول ستۋدەنتتىك جىلدار ەرتە ەسەيتتى. تابيعي دارىن, بىلىمگە قۇمارلىق, دارا مىنەز ونى وقشاۋ كورسەتتى. سوتسياليستىك ەڭبەك ەرى, كسرو عىلىم اكادەمياسىنىڭ اكادەميگى ي.ارتوبولەۆسكيدىڭ كوزىنە ءتۇستى. يۆان يۆانوۆيچ العىر جىگىتتىڭ بويىنان عىلىمعا, ونىڭ ىشىندە مەحانيكاعا دەگەن قىزىعۋشىلىقتى تانىدى.
ومىربەك ارسلان ۇلى 1986 جىلعى جەلتوقسان وقيعاسى بولماي تۇرعاندا, ودان التى اي بۇرىن رەكتورلىق قىزمەتىنەن بوساعان بولاتىن. دەگەنمەن, جۇمىستان بوساعانىمەن بەدەلى ءالى تۇسە قويماعان اكادەميكتى جانشۋ, تاپتاۋ ساياساتى جۇرگىزىلدى. 1989 جىل ەدى. ومەكەڭنىڭ ەڭسەسى ءتۇسىپ, بىرەۋلەر كۇندەپ, بىرەۋلەر قاشقاقتاپ جۇرەتىن كۇندەر بولاتىن. بىرگە قىزمەتتەس بولعان, دوس-ءىنى رەتىندە ۇستازىمىزعا قولداۋ كورسەتۋ قاجەت دەپ شەشتىم. ۋنيۆەرسيتەتتىڭ ستۋدەنت جاستارى اراسىندا بەدەلىم دە جوعارى ەدى. سوندىقتان بەلسەندى جاستارمەن كەزدەسىپ, پىكىر الىستىم. ءو.جولداسبەكوۆتى جوعارعى كەڭەستىڭ دەپۋتاتتىعىنا كانديدات رەتىندە ۇسىنۋ تۋرالى وي تاستادىم. قىز-جىگىتتەر بۇل ۇسىنىستى قولدادى. ەندىگى ماسەلە, وسى ۇسىنىسقا كەلىسە مە, كەلىسپەي مە؟ مۇنىڭ ءوزى ءبىر حيكايا. ومەكەڭە جاستار ءسوزىن جەتكىزدىم. ول بۇعان بىردەن قىزىعۋشىلىق تانىتقان جوق. جان-جاعىنان جالا جابىلىپ جاتقان كۇندەر عوي. مىنەزىن جاقسى بىلەمىن, ەكى-ءۇش كۇندەي ويلانىپ بارىپ, حابارلاساتىنى بار. بۇل جولى دا سولاي بولدى. تەلەفون شالىپ, «كەزدەسەيىك» دەدى.
– باقىتجان, وتكەن جولى ايتقان اڭگىمەڭنىڭ نەگىزى بار ما؟ ويلانسام, قاجەت سەكىلدى. بۋىنسىز جەرگە پىشاق ۇرىپ جۇرمەيمىز بە؟ وتە المايتىن بولساق, دەپۋتاتتىققا ءتۇسۋدىڭ نە كەرەگى بار؟ ەسەپ-قيسابىڭدى ايتشى, – دەدى.
– ومىربەك ارسلان ۇلى, ۋنيۆەرسيتەتتىڭ بۇكىل جاستارى ءسىزدى قولداپ وتىر. كەزىندە ءسىز جاستاردى قولدادىڭىز, ستۋدەنتتەردىڭ جاعدايىن كوتەردىڭىز, ەندى ولار ءوزىڭىزدى قولداعىسى كەلەدى. مەن سول جاستاردىڭ ءوتىنىشى بويىنشا سىزگە ۇسىنىس جاسادىم عوي, – دەدىم.
ويلانىپ قالدى. سودان سوڭ «تاۋەكەل» دەدى. توعىز كانديداتتىڭ ىشىنەن توپ جارىپ, اكادەميك اعامىز دەپۋتات اتاندى. وسىنداي دا كۇندەر بولعان. 1995 جىلدان ءومىرىنىڭ سوڭىنا 1999 جىلعا دەيىن پارلامەنت ءماجىلىسىنىڭ دەپۋتاتى ءارى الەۋمەتتىك-مادەني دامۋ كوميتەتىنىڭ جانە ءوزى قۇرعان ەڭبەك پارتياسىنىڭ قۇرمەتتى توراعاسى بولدى. ول عىلىمي اتاق-داڭقتان كەندە ەمەس ەدى. مۇنىڭ ءبارى كۇرەسپەن, عىلىمي-پەداگوگتىك, رەكتورلىق مەكتەپ ارقىلى قالىپتاستى. سوندىقتان دا 90 جىلدىق تورقالى تويىندا ونىڭ ادامي قىرلارى تۋرالى ايتقان ءجون بولار دەپ شەشتىم.
ءو.جولداسبەكوۆتىڭ ومىردەگى سىيلاس, سىرلاس شاكىرتى, ءىزباسارى, ءىنى-دوسى رەتىندە مەنىڭ دە ازاماتتىق كوزقاراسىم قالىپتاستى. كوپ نارسەنى ۇيرەندىم, جۇرەگىمە ءتۇيدىم. وعان قاراپ وي تۇزەۋگە, بوي تۇزەۋگە تىرىستىم. ساناداعى ساۋلە سونبەيدى. ومەكەڭمەن بىرگە قىزمەتتەس بولىپ جۇرگەن كۇندەر دە, 1986 جىلدىڭ جەلتوقسانىندا قاتار «قۇلاپ», ۇيقىسىز وتكەن تۇندەر دە كوزدەن كەتپەيدى, جۇرەكتە سويلەيدى.
ون التى جىل قاراشاڭىراق – قازاق مەملەكەتتىك ۋنيۆەرسيتەتىن ءو.جولداسبەكوۆ باسقارعان جىلداردى جوعارى وقۋ ورنىنىڭ قالىپتاسقان, اتاعى شىققان كەزەڭى بولدى دەپ بىلەمىن. قازمۋ قالاشىعىنىڭ سالىنۋى سونىڭ ايعاعى. كەزىندە رەكتورلار تەمىرباي دارقانباەۆ, اسقار زاكارين تۇسىندا يدەيا رەتىندە كوتەرىلگەنىمەن ونى 0-دىك تسيكلدەن باستاپ, وقۋ عيماراتتارى مەن ستۋدەنت جاتاقحانالارىن سالۋ ونىڭ ىسكەرلىگى مەن تاباندىلىعى ارقاسىندا جۇزەگە استى. ستۋدەنتتەر قالاشىعى شويىن شارباقپەن قورشالدى. مۇنداي ۇلان-عايىر جوبانى جۇزەگە اسىرۋ ءۇشىن وعان ساياسي قولداۋ دا قاجەت ەدى. قازاقستان كومپارتياسى ورتالىق كوميتەتىنىڭ ءبىرىنشى حاتشىسى د.قوناەۆتىڭ قابىلداۋىنا جازىلىپ, وزىنە ءتان دايەكتەرىمەن قازمۋ قالاشىعىنىڭ قاجەتتىگىن, عىلىم مەن رۋحانياتتاعى ورنىن دالەلدەدى. اكادەميك-عالىم رەتىندە ءبىرىنشى حاتشى بۇل ۇسىنىسقا قولداۋ ءبىلدىردى. وسىلاي بۇگىنگە دەيىن جالعاسىپ كەلە جاتقان قۇرىلىس باستالىپ كەتتى.
ول ي.ارتوبولەۆسكيدىڭ عىلىمي مەكتەبى ارقىلى قازاقستانداعى مەحانيزمدەر مەن ماشينالار تەورياسى مەكتەبىن قالىپتاستىردى. جازىق جانە كەڭىستىكتىك جوعارى ساناتتى مەحانيزمدەر تەورياسىنىڭ ىرگەتاسىن قالادى. اۆتورلىق كۋالىكتەر جانە پاتەنتتەرمەن قورعالعان جۇك كوتەرگىش گرەيفەرلىك مەحانيزمدەر مەن مانيپۋلياتورلىق قۇرىلعىلاردىڭ تاجىريبەلىك جانە سىناقتىق ۇلگىلەرىن جاسادى.
ءو.جولداسبەكوۆتىڭ ءۇش قىرىن ايتقىم كەلەدى. ءبىرىنشى, وتانسۇيگىش, پاتريوت ادام ەدى. مۇنى قازاق عىلىمىن وداققا جانە الەمگە تانىتۋ جولىنداعى جانقيارلىق ەڭبەگىنەن كورەمىن. اتاقتى عالىم قازاقستان عىلىمىنىڭ وربيتاسىنان ەرتە شىعىپ كەتكەن ەدى. مىسالى, 1976 جىلى ممت سالاسىنىڭ بۇكىلوداقتىق سەزىن الماتىدا وتكىزدى. بۇل ءۇشىن د.قوناەۆتىڭ الدىنا باردى. اتاقتى ۇستازى ي.ارتوبولەۆسكيدى يلاندىرۋ وڭاي ما؟ بۇل الەم عالىمدارى الماتىعا كوز تىكتى دەگەن ءسوز. اتالعان سەزد قازاقستانداعى ماشينالار مەن مەحانيزمدەر تەورياسىنىڭ ورنىققانىنىڭ دالەلىنە اينالدى. ال 1981 جىلى كسرو عىلىم اكادەمياسىنىڭ اكادەميگى ا.لاۆرەنتەۆ پەن اكادەميك ءو.جولداسبەكوۆتىڭ بەلسەندى ارالاسۋىمەن تەوريالىق جانە قولدانبالى مەحانيكا سالاسىنىڭ بۇكىلوداقتىق V سەزى ءوتتى.
ءومىردىڭ ۇمىتىلماس ساتتەرى كوپ. قازاقستاننىڭ تۇڭعىش پرەزيدەنتى ن.ءا.نازارباەۆ استانانى سارىارقا توسىنە كوشىرۋ تۋرالى جوعارعى كەڭەستىڭ ءحىىى شاقىرىلىمى دەپۋتاتتارىنىڭ الدىندا ءسوز سويلەپ, ۇسىنىس ايتقان بولاتىن. ەلوردانىڭ سارىارقا توسىنە, ەركە ەسىل بويىنا قونىس اۋدارۋىن قولداعان جوعارعى كەڭەس دەپۋتاتىنىڭ بىرەگەيى دە ءو.جولداسبەكوۆ بولدى. سول كەزدەگى ايتقان ءسوزىن حالىق ءالى ۇمىتا قويعان جوق.
– نۇرسۇلتان نازارباەۆ – ءومىر كورىگىنەن, دومنا كورىگىنەن وتكەن ۇلتىمىزدىڭ ءىرى ساياسي تۇلعاسى. پرەزيدەنت ۇسىنىسىن قولداۋ قاجەت, – دەگەن ەدى سول كۇندەردە ءو.جولداسبەكوۆ. – قازاق جەرىنىڭ قاي ءوڭىرى بولسىن – اتا قونىسىمىز. ەل دەگەندە ەمىرەنىپ, جۇرت دەگەندە جۇمىلىپ تىرلىك ەتەيىك, بۋىنسىز جەرگە پىشاق ۇرىپ, التىاۋىز بولمايىق. كوتەرىلگەن شاڭىراققا ارقايسىمىز التىن ۋىق بولىپ قادالايىق. ءسويتىپ ۇرپاق الدىنداعى قارىزىمىز بەن پارىزىمىزدى ادال اتقارايىق. مەن تاۋەلسىزدىك العان حالقىما پايدام تيە مە دەپ كەلدىم. مانساپ ىزدەپ جۇرگەنىم جوق, – دەگەن ساليقالى ءسوزىن ايتتى.
وتانشىلدىق رۋح دەگەن وسى ەمەس پە؟ جاڭا استاناعا كەلىپ دەپۋتاتتىق قىزمەتىن جالعاستىردى. الەۋمەتتىك سالاداعى كوپتەگەن زاڭنىڭ قابىلدانۋىنا ىقپال ەتتى. «كوشى-قون تۋرالى» زاڭ دا قازاق تىلىندە جازىلدى. زاڭ باستاماشىسى دەپۋتات ءا.ىسقاق بولعانىمەن, ونى ۇسىنىپ, قولداعان ءو.جولداسبەكوۆ ەدى. سول ءسوزدى تاعى ءبىر جۇرەك ەلەگىنەن وتكىزىپ كورەلىك. ء«بىزدىڭ حالىق نە كورمەدى؟ كەشەگى اشتىق, قۋعىن-سۇرگىن, ناۋبەتتىڭ ءبارىن باسىنان كەشىردى عوي. وسىنداي زوبالاڭنىڭ قۇربانى بولعان حالىق تاۋ اسىپ, شەتەلدى جاعالادى. ۇلتىن, ۇرپاعىن ساقتاپ قالدى. ەلىمىز ەگەمەندىك العان كەزدە تۋعان جەرىنە دەگەن ساعىنىشى, ماحابباتى جەتەكتەپ كەلگەن حالىقتى قولدايىق, سىرتقا تەپپەيىك». زامان, ۋاقىت ءبارىن رەتتەدى. سول زاڭ اياسىندا تۋعان وتانىنا 1 ملن-نان استام قانداسىمىز كەلىپ, ەل تىرەگىنە اينالدى. پرەزيدەنت ق.ك.توقاەۆ قۇلاققا تۇرپىدەي ءتيىپ جۇرگەن «ورالمان» دەگەن ءسوزدى «قانداستار» دەپ سول كەزدە كەتكەن ولقىلىقتى تۇزەدى.
ەكىنشى قىرى – عىلىمعا ادالدىق. ء«ومىر ءسۇرۋ – ءومىر بويى وقۋ» دەيتىن. سوندىقتان دا جوعارى مەكتەپتە بولسىن, عىلىمدا بولسىن عىلىمي ويلاردىڭ بيىگىندە جۇرەتىن. بىراق بوس قيالدىڭ ادامى ەمەس, ىسكەر, يدەياسىن جۇزەگە اسىرا الاتىن بىرەگەي جان ەدى. «عىلىم ارامدىقتا ەمەس, ادالدىقتا دامىسا, مەملەكەت نىعايادى, ەل ءوسىپ, وركەندەيدى. حالىقتىڭ ءال-اۋقاتى وسەدى» دەپ ايتقانىن تالاي ەستىدىك. ادەمى سۇحباتتارىنىڭ كۋاسى بولدىق. عالىم رەتىندە جان-جاقتى, ەنتسيكلوپەديست ادام بولاتىن. زامان, ۋاقىت, عىلىم ماقساتىن تەز سەزىنەتىن. 1973 جىلى ۋنيۆەرسيتەتتە ءبىر كۇندە ءۇش كافەدرا اشتى. قانداي كافەدرالار دەيسىز عوي؟ تابيعات قورعاۋ, بيوفيزيكا جانە ميكروبيولوگيا. قازىر وسى ماماندىقتارعا ەلىمىز ءزارۋ بولىپ وتىر.
...1981 جىلى الماتى قالاسىندا وتكەن تەوريالىق جانە قولدانبالى مەحانيكا تەورياسى بويىنشا بۇكىلوداقتىق سەزگە دەلەگات بولىپ قاتىستىم. سول كۇندەر كورىنىسى ءالى دە كوز الدىمدا تۇر. سوندا ەستەن كەتپەس ەكى بايانداما بولدى. ءبىرى – كسرو عىلىم اكادەمياسىنىڭ اكادەميگى, ەكى مارتە سوتسياليستىك ەڭبەك ەرى, اتوم عىلىمدارىنىڭ «اتاسى» ۆ.ماكەەۆتىكى, ەكىنشىسى – ۇعا اكادەميگى, تەوريالىق جانە قولدانبالى مەحانيكا سالاسىنىڭ ۇيىم-
داستىرۋشىسى ءو.جولداسبەكوۆتىڭ بايانداماسى ەدى. ولار عىلىمي-تەحنيكالىق جەتىستىكتەردى مەملەكەت دامۋى ءۇشىن پايدالانۋ باعىتىن ۇستاندى. ۆ.ماكەەۆ اسكەري عىلىم ماسەلەسىن كوتەرسە, ءو.جولداسبەكوۆ حالىق شارۋاشىلىعىنداعى عىلىم ءرولى تۋرالى باياندادى.
قازاقستانداعى عىلىمي باسەكەلەستىك ورتانى قالىپتاستىرعان دا ءو.جولداسبەكوۆ. مىنا ءبىر دەرەكتى ايتقىم كەلەدى. 1992 جىلى مەحانيكا جانە ماشينا جاساۋ ينستيتۋتىن قۇردى. ۇعا جانىنان قۇرىلعان ينستيتۋتتىڭ ءبىرىنشى ديرەكتورى دا ءوزى ەدى. ول عىلىمي-زەرتتەۋ ينستيتۋتىنا تالانتتى عىلىمي-ينجەنەرلەردى توپتاستىردى. ينستيتۋتتىڭ مەحانيكا جانە ماشينا جاساۋ جانە ساندىق تانۋ مەتودى كافەدراسىن باسقارۋعا تەحنيكا عىلىمدارىنىڭ دوكتورى جايلاۋ ماسانوۆتى قىزمەتكە شاقىردى. بۇعان عىلىمي ورتا باس شايقاستى. ونىڭ سەبەبى دە بار-دى. ويتكەنى ءار ىرگەلى عالىمنىڭ وزىندىك عىلىمي مەكتەبى بولادى. ج.ماسانوۆ مەحانيكا سالاسىنىڭ تاعى ءبىر كورنەكتى وكىلى, اكادەميك جاقان ەرجانوۆتىڭ شاكىرتى بولاتىن. «عىلىمدا باسەكەلەستىك ورتا بولۋى كەرەك. ماسەلە, ەكى مەكتەپتىڭ تايتالاسۋىندا ەمەس, بۇل مەحانيكا عىلىمىنىڭ دامۋى ءۇشىن كەرەك», دەگەن-ءدى سوندا. راسىندا, سول جىلدارى ينستيتۋت قىزمەتكەرلەرىنىڭ عىلىمي-زەرتتەۋلەرى وداقتىق عالىمداردىڭ نازارىنا ىلىكتى. ومەكەڭدە تازا عىلىم مەن تازا عالىمدى تانيتىن كەرەمەت قاسيەت بار ەدى. قازمۋ-دە ءبىر فيزيك عالىم بولدى. ول دوكتورلىق ديسسەرتاتسيا قورعاۋدىڭ الدىندا جۇرگەن. بىراق ۋنيۆەرسيتەتتىڭ كەيبىر عالىمدارى ونى قورعاۋ كەزىندە «قۇلاتپاق» بولادى. سوندىقتان ۇمىتكەرگە قورعاۋعا شىقپاۋ تۋرالى ۇسىنىس جاسايدى. بۇل ءسوز رەكتور ءو.جولداسبەكوۆكە جەتەدى. سوندا ول: «عىلىم جولىنداعى ادامنىڭ جاقتاستارى دا, قارسىلاستارى دا كوپ بولادى. ءوز باعىنان كورسىن. عىلىمي كەڭەسكە بارسىن. ناتيجەسىن سايلاۋ كورسەتەدى», دەپ اراشا تۇسەدى. سول فيزيك تەلەمەديتسينا بويىنشا دوكتورلىق ديسسەرتاتسياسىن ابىرويمەن قورعاپ شىعادى.
ءۇشىنشى قاسيەتى – شىنشىلدىق. 1986 جىلدىڭ جەلتوقسانى ۇلتقا اۋىر ءتيدى. ءو.جولداسبەكوۆتىڭ تاعدىرىنداعى ەڭ ءبىر قيىن كەزەڭ ەدى. ستۋدەنت-جاستاردىڭ جەلتوقسان كوتەرىلىسىنەن كەيىن ورتالىق ءوش الۋ پروتسەسىن باستادى. ءوز ەلىمىزدە, ءوز جەرىمىزدە جوعارى وقۋ ورىندارىندا جەرگىلىكتى ۇلتتىڭ وكىلدەرى كوبەيىپ كەتتى دەپ, بايبالام سالىندى. بۇل ناعىز شوۆينيستىك ساياسات بولاتىن. بيلىك بۇكىل قازاق حالقىن ۇلتشىلدار قاتارىنا قوسىپ, قارا كۇيە جاقتى. قازاقستان كومپارتياسى ورتالىق كوميتەتىنىڭ XVI سەزىندە بۇل ءسوزدى وزگە ەمەس, ءوز رەسپۋبليكامىزدىڭ يدەولوگى ايتتى. «قاينايدى – قانىڭ, اشيدى – جانىڭ» دەگەن اباي ءسوزى جان كۇيگەندىكتەن ايتىلعان عوي. ماسكەۋدە شىعاتىن ورتالىق گازەتتەر وتقا ماي قۇيىپ, ءورتتى قاۋلاتىپ جىبەردى. «يزۆەستيا» گازەتىندە سول جىلدىڭ 24 قاڭتارىندا ۆ.شەپوتكيننىڭ «شىرماۋىق» دەگەن ماقالاسى شىقتى. قازاق ستۋدەنتتەرىن ايىپتاۋ جاپپاي جۇرگىزىلدى. ءو.جولداسبەكوۆتى «قىلمىسكەر» رەتىندە قاماۋعا الۋ ءۇشىن كۇنى-ءتۇنى دالەل ىزدەپ باقتى. ءساۋىر ايىندا ۋنيۆەرسيتەتتە پارتيا كوميتەتىنىڭ وتىرىسى ءوتتى. كۇن تارتىبىندە ءبىر-اق ماسەلە. ول – كوممۋنيست ءو.جولداسبەكوۆتىڭ جەكە ماسەلەسى ەدى. بىراق كوممۋنيستەر ونى قورعاپ قالدى. اياعىندا الماتى قالالىق پارتيا كوميتەتىنىڭ بيۋروسى ارىستاي ازاماتتى پارتيادان شىعارىپ تىندى. بىراق بۇل ءىس جولداسبەكوۆتىڭ جانىن جارالاعىنىمەن, ساعىن سىندىرا العان جوق. ول ءوز جاۋاپكەرشىلىگىن ءوزى ارقالايتىن. ۋنيۆەرسيتەت ۇجىمىن وزىنە قالقان جاسامادى. ءوزىن قورعاۋ ءۇشىن جوعارعى جاققا حات جازعىزعان جوق. بۇقپانتايلاپ ءومىر سۇرگىسى كەلمەيتىن. ءوزىنىڭ باتىر, ازاماتتىق تۇلعاسىنا ساي بولدى. ءوزى دە بيلىككە جارامساقتانعان جوق. پاراسات مايدانىندا ادامي قاسيەتىمەن تانىلا ءبىلدى. ۇنەمى جاقسىلىق جاسايتىن قايراتكەر ەدى. ءبىراز ادامدى قورعادى, قولدادى, جوعارى لاۋازىمدى قىزمەتتەرگە قويدى.
ماسكەۋدەن باس پروكۋراتۋرا جانە باسقا دا تەرگەۋ ورىندارىنان كوپتەگەن تەرگەۋشى كەلىپ, ءو.جولداسبەكوۆتى سوتقا تارتۋ ءۇشىن دالەل ىزدەدى, كوپ جالا جابىلدى. «پولشادان اكەلگەن 200 مىڭ سومنىڭ جيھازى جوق ەكەن» دەپ جەردەن جەتى قويان تاپقانداي قۋاندى. ال ءو.جولداسبەكوۆ بولسا 200 مىڭ سومعا جيھاز الىنعانىن, بىراق ونىڭ ءبارى دەكاندار مەن كافەدرا مەڭگەرۋشىلەرىنىڭ كابينەتىندە تۇرعانىن ايتتى. تەكسەرۋشىلەردىڭ اۋزىنا قۇم قۇيىلدى. بيلىك ءبارىبىر قاتىگەزدىك تانىتتى. ونى ۇستازدىق قىزمەتتەن قۋدى. اقىرى جالانى شىندىق جەڭدى. ول قازاقستاندا ۇلتتىق ينجەنەرلىك اكادەميانى قۇردى. ءوزى اكادەميانىڭ ءبىرىنشى پرەزيدەنتى بولدى. ونى قالىپتاستىردى, ىرگەسىن قاتايتتى. ومەكەڭ قۇرعان اكادەميا بۇگىن دە ابىرويمەن جۇمىس ىستەپ تۇر. ونىڭ قۇرامىندا عىلىمي-تەحنيكالىق پروگرەستى دامىتىپ جۇرگەن ۇلتىمىزدىڭ اتاقتى عالىمدارى بار. ۇلتتىق ينجەنەرلىك اكادەميا قازاقستانداعى ءىرى, بەدەلدى جانە ىرگەلى عىلىمي-ينجەنەرلىك ويدى ۇيلەستىرۋشى بىرلەستىككە اينالىپ وتىر.
ءو.جولداسبەكوۆ ءوز زامانىنان وزا تۋعان جاڭا فورماتسياداعى تۇلعا ەدى. جاڭا عاسىردىڭ وي-جۇيەسىن, عىلىمي مەكتەبىن قالىپتاستىردى. ول ءبىر اۋىز سوزبەن ومىرلىك فيلوسوفياسىن جەتكىزگەن ادام: «اينالايىندار, مەنىڭ قاستاسۋعا ۋاقىتىم جوق, مەن دوس ىزدەپ جۇرگەن اداممىن...».
باقىتجان جۇماعۇلوۆ,
سەنات دەپۋتاتى,
ۇعا اكادەميگى,
ۇلتتىق ينجەنەرلىك اكادەمياسىنىڭ پرەزيدەنتى
