ناقتى ستاتيستيكاعا سۇيەنسەك, بۇگىندە 329 كاسىپورىن ىسكە قوسىلىپ, 12 مىڭنان استام جاڭا جۇمىس ورنى قۇرىلدى. وسى اتالعان ءوندىرىس ورىندارىن قۇرۋ ءۇشىن 360 ملرد تەڭگەگە جۋىق ينۆەستيتسيا تارتىلدى.
بۇل جەردە ەكى يندۋستريالىق ايماقتى ەرەكشە اتاپ وتۋگە بولادى. ول – «بوزارىق» پەن «جۇلدىز» ءوندىرىس الاڭى. قالا اكىمدىگى اۋىل شارۋاشىلىعى ونىمدەرىن قايتا وڭدەۋگە ايرىقشا باسىمدىق بەرىپ وتىر. وسىعان بايلانىستى تاعام ونەركاسىبىنە نەگىزدەلگەن «بوزارىق» يندۋستريالىق ايماعى اشىلدى. بۇل ءوندىرىس الاڭىنىڭ اۋماعى – 132 گا. مۇندا 20 كاسىپورىن ورنالاسۋعا ءتيىس. قازىرگى تاڭدا «التاي فۋد» ءوندىرىس ورنى عانا قۇرىلىسىن اياقتاپ, ءونىم شىعارىپ جاتىر. كاسىپورىن ءتاتتى مارمەلادتار وندىرەدى. بيزنەس جوبانى ىسكە اسىرۋعا ينۆەستورلار 500 ملن تەڭگە قارجى قۇيدى.
ال «جۇلدىز» يندۋستريالىق ايماعى قۇرىلىس ونىمدەرىن شىعارۋعا نەگىزدەلگەن. ءوندىرىس الاڭى 306 گەكتار جەرگە جايعاسقان. جوسپارعا سايكەس مۇندا 72 كاسىپورىن بوي كوتەرۋگە ءتيىس. وسى ماقساتقا وراي 235 ملرد تەڭگە ينۆەستيتسيا تارتۋ كوزدەلگەن. ءوندىرىس ايماعى تولىق قۋاتىنا كوشسە, 4 635 ادام جۇمىسپەن قامتىلادى. ال بۇگىنگى تاڭدا مۇندا 8 كاسىپورىن جۇمىس ىستەپ تۇر.
ولاردىڭ ۇشەۋى بىلتىر ىسكە قوسىلدى. بۇل وندىرىستەر – اۆتوكلاۆتى گازدى بەتون شىعاراتىن «Sauran Brikcs», پۆح قۇبىرلارىن وندىرەتىن «پوليترەيد كازاحستان» جانە تەمىربەتون بۇيىمدارىن جاسايتىن «Altyn Land» جشس.
قالادا قازىر قۇرىلىس سالاسى قارقىن الىپ كەلەدى. پايدالانۋعا بەرىلەتىن كوپقاباتتى تۇرعىن ۇيلەر جىلدان جىلعا ارتىپ وتىر. ودان بولەك الەۋمەتتىك نىسانداردىڭ قۇرىلىسى دا كوپتەپ سالىنىپ جاتىر. مىنە, وسى عيماراتتاردىڭ بارىنە قۇرىلىس ماتەريالدارى قاجەت. ال قۇرىلىس كومپانيالارىنىڭ سۇرانىسىن تولىق قاناعاتتاندىرۋ وتاندىق قۇرىلىس ونىمدەرىن كوبەيتۋ ارقىلى جۇزەگە اساتىنى بەلگىلى. سوندىقتان دا جەرگىلىكتى اتقارۋشى بيلىك قۇرىلىس يندۋسترياسىن وركەندەتۋگە ەرەكشە ءمان بەرىپ وتىر.
«جۇلدىز» يندۋستريالىق ايماعىندا ەندى ىسكە قوسىلاتىن كاسىپورىندار ءالى كوپ. سول سەبەپتى قۇرىلىس زاتتارىن ءوندىرۋ جاعىنان شىمكەنت كەلەشەكتە كوش باستايدى دەگەن ءۇمىت بار. سونداي-اق قالا اكىمدىگى اۋىل شارۋاشىلىعى ونىمدەرىن قايتا وڭدەۋ مەن تاماق ونەركاسىبىنە ايرىقشا دەن قويا باستادى. وعان وسى سالاداعى كەيىنگى جىلدارى جەتكەن جەتىستىكتەر كۋا. سونىڭ ءبىر مىسالى «بوزارىق» يندۋستريالىق ايماعىندا قولعا الىنىپ جاتقان ينۆەستيتسيالىق جوبالار بولسا, ەكىنشىدەن ەلىمىزدەگى ەڭ ءىرى جىلىجاي كەشەندەرىنىڭ ءبىرى دە وسى مەگاپوليستە اشىلدى.
دەي تۇرعانمەن اتالعان ءوندىرىس الاڭدارىندا بۇگىندە تاڭدا شەشىمىن كۇتكەن ماسەلەلەر بارشىلىق ەكەن. ول جونىندە يندۋستريالىق ايماقتارعا جاۋاپتى مەكەمە باسشىسى مارات سەيداليەۆ ايتىپ بەردى. «بوزارىقتا» قوسالقى ستانسا سالىنىپ جاتىر. ونىڭ قۇرىلىسى بىتپەي كاسىپورىندار ىسكە قوسىلا المايدى. سەبەبى ەلەكتر قۋاتى جەتپەيدى. ال قوسالقى ستانسا قۇرىلىسى قاشان اياقتالاتىنى بەلگىسىز. قازىر جەر تەلىمىن راسىمدەۋ جۇمىستارى ءجۇرىپ جاتىر. ودان كەيىن جوباسى جاسالىپ, مەملەكەتتىك ساراپتامادان وتۋگە ءتيىس. بىرنەشە گاز تاراتۋ قوندىرعىلارى دا قولدى بولىپ كەتتى. سۋعا كەلسەك, قازىر مەردىگەر كومپانيا مەن ەنەرگەتيكاعا جاۋاپتى باسقارما اراسىندا سوت بولىپ جاتىر. دەگەنمەن يندۋستريالدى ايماقتا قۇرىلىس جۇمىستارى توقتاعان جوق. وعان قاجەتتى 100 كۆت ەلەكتر قۋاتى جەتكىلىكتى. وندىرىسكە 1000 كۆت-دان جوعارى ەلەكتر ەنەرگياسى قاجەت. ال بۇل قۋاتتى بەرەتىن تەك قوسالقى ستانسا عانا. «جۇلدىز» يندۋستريالىق ايماعىندا دا جارىق تاپشى. ول ەلەكتر ەنەرگياسىن جانىنداعى «وڭتۇستىك» ارنايى ەكونوميكالىق ايماعىنان الىپ وتىر. «جۇلدىزدى» تولىق ەلەكتر قۋاتىمەن قامتاماسىز ەتۋ ءۇشىن وزىندەگى 80 مۆت قوسالقى ستانساسىن جاڭعىرتىپ, قۋاتتىلىعىن 160 مۆت-عا كوتەرۋ قاجەت. وسى ماقساتتى ىسكە اسىرۋ ءۇشىن جاڭعىرتۋ جوباسى جاسالدى. ول بيىل شىلدەدە مەملەكەتتىك ساراپتامادان ءوتىپ بىتۋگە ءتيىس», دەيدى م.سەيداليەۆ.
شىمكەنت
