سۋرەت: primeminister.kz
ءوز سوزىندە پرەمەر-ءمينيستردىڭ ءبىرىنشى ورىنباسارى ر.سكليار القا وتىرىسى ەلىمىزدەگى ساياسي ترانسفورماتسيا مەن جاڭا كونستيتۋتسيانى ازىرلەۋ اياسىندا ءوتىپ جاتقانىن تىلگە تيەك ەتتى.
«جاڭا كونستيتۋتسيا جوباسى قوعامنىڭ بەلسەندىلىگى مەن ساياسي مادەنيەتىن ارتتىرۋ شارالارىن كوزدەيتىن, مەملەكەتىمىزدىڭ دامۋىنىڭ ساپالىق جاڭا دەڭگەيىن بەلگىلەيتىن تۇجىرىمدامالىق جاڭا قۇجات بولىپ سانالادى», دەدى ر.سكليار.
جيىندا قاتىسۋشىلار مەملەكەت باسشىسىنىڭ تاپسىرمالارىنىڭ ورىندالۋى بويىنشا الداعى كەزەڭگە ارنالعان باسىم باعىتتاردى ايقىندادى.
تەمىرجول سالاسىندا ءىرى ينفراقۇرىلىمدىق جوبالار جۇزەگە اسىرىلدى. اتاپ ايتقاندا, دوستىق – مويىنتى ۋچاسكەسى مەن الماتى ستانساسىنىڭ اينالما تەمىرجول جەلىسى ىسكە قوسىلدى, 1,5 مىڭ شاقىرىمنان استام جول جاڭارتىلدى, شامامەن 320 ملن توننا جۇك تاسىمالداندى.
اۆتوموبيل جولدارى سالاسىندا 13 مىڭ شاقىرىمعا جۋىق جولدا قۇرىلىس جانە جوندەۋ جۇمىستارى جۇرگىزىلدى. قىزىلوردا – جەزقازعان (قىزىلوردا وبلىسى اۋماعىنداعى), قالباتاۋ – مايقاپشاعاي, ۇزىناعاش – وتار جوبالارى اياقتالدى.
ازاماتتىق اۆياتسيا سالاسىندا ۇشۋ قاۋىپسىزدىگى بويىنشا يكاو ستاندارتتارىنا سايكەستىك دەڭگەيى 95,7%-عا جەتتى. ەلىمىزدەگى اۋەجايلار 30 ملن-نان استام جولاۋشىعا قىزمەت كورسەتتى, حالىقارالىق مارشرۋتتار جەلىسى كەڭەيتىلىپ جاتىر.
بيىلعا ارنالعان جوسپارلار اياسىندا تەمىرجول سالاسىندا «داربازا – ماقتاارال», «مويىنتى – قىزىلجار» جەلىلەرىنىڭ قۇرىلىسى, «التىنكول – جەتىگەن», «بەينەۋ – ماڭعىستاۋ» ۋچاسكەلەرىن جاڭعىرتۋ جۇمىسىن اياقتاۋ, سونداي-اق «باقتى – اياگوز» جوباسىن جالعاستىرۋ كوزدەلگەن. بۇدان بولەك, ۆوكزالداردى جاڭعىرتۋ جۇمىسىن اياقتاۋ, جولاۋشىلار مەن جۇك ۆاگوندارى پاركىن ودان ءارى جاڭارتۋ جوسپارلانىپ وتىر.
اۆتوجول سالاسىندا جالپى ۇزىندىعى 11 مىڭ شاقىرىمدى قامتيتىن جول قۇرىلىسى مەن رەكونسترۋكتسيالاۋ جۇمىستارى جالعاسادى. اتاپ ايتقاندا, «قىزىلوردا – جەزقازعان» اۆتوجولىندا ( ۇلىتاۋ وبلىسى اۋماعىندا) جۇمىس جۇرگىزىلەدى. «ورتالىق – باتىس» جوباسىن جۇزەگە اسىرۋدىڭ بەلسەندى كەزەڭى باستالادى. سونىمەن قاتار «قاراعاندى – جەزقازعان», «اقتوبە – قىزىلوردا», «بەينەۋ – سەكسەۋىل» جوبالارىن باستاۋ جوسپارلانعان.
مۋلتيمودالدى تاسىمالدى دامىتۋ ماقساتىندا اقتاۋ مەن قۇرىق پورتتارىنىڭ ينفراقۇرىلىمىن جاڭعىرتۋ, ونىڭ ىشىندە ايلاقتاردى رەكونسترۋكتسيالاۋ, ءتۇبىن تەرەڭدەتۋ جۇمىسىن اياقتاۋ كوزدەلگەن.
اۋە حابتارى مەن اۆياتسيالىق ينفراقۇرىلىمدى دامىتۋ اياسىندا استانا مەن شىمكەنتتە ەكىنشى ۇشۋ-قونۋ جولاقتارىن سالۋ, الماتى اۋەجايىنىڭ ىشكى رەيستەر تەرمينالىن جانە اقتاۋ اۋەجايىنىڭ پەررونىن رەكونسترۋكتسيالاۋ, اتىراۋ قالاسىندا جاڭا تەرمينال سالۋ, پاۆلودار اۋەايلاعىن جاڭعىرتۋ, ارقالىق اۋەجايىن قالپىنا كەلتىرۋ, سونداي-اق كاتون-قاراعاي, زايسان, كەندىرلى كۋرورتتىق ايماقتارىنداعى اۋەجايلار قۇرىلىسىن اياقتاۋ جوسپارلانىپ وتىر.
جىل سوڭىنا دەيىن وتاندىق اۋە كومپانيالارى 9 جاڭا اۋە كەمەسىن ساتىپ الىپ, اۋە پاركىنىڭ سانىن شامامەن 118 بىرلىككە دەيىن ۇلعايتۋدى ماقسات ەتتى. بۇل جولاۋشىلار تاسىمالى سىيىمدىلىعىن ارتتىرۋعا, جاڭا حالىقارالىق باعىتتاردى اشۋعا, رەيستەر جيىلىگىن كوبەيتۋگە جول اشادى.
القا وتىرىسىنىڭ قورىتىندىسىندا رومان سكليار كولىك-لوگيستيكا سالاسىن ودان ءارى دامىتۋ بويىنشا قوسىمشا مىندەتتەردى ايقىنداپ, ناقتى تاپسىرما بەردى.
