شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, وڭىردە 22 اقپاننان باستاپ «قىزمەتتىك قارۋ» جەدەل الدىن الۋ شاراسى جۇرگىزىلۋدە. ارنايى قۇرىلعان 26 توپ قىزمەتتىك قارۋ ۇستايتىن زاڭدى تۇلعالارعا تەكسەرۋ جۇرگىزدى. ولاردىڭ قاتارىنا كۇزەت اگەنتتىكتەرى, ينكاسساتسيا قىزمەتى جانە «قازپوشتا» اق جاتادى. ماماندار اتالعان مەكەمە قىزمەتكەرلەرىنە قىزمەتتىك قارۋ مەن وق-ءدارىنى ساقتاۋ جانە قولدانۋ تارتىپتەرىن ءجىتى ءتۇسىندىردى.
«شارا بارىسىندا ساقشىلار 170-تەن استام وبەكتىنى تەكسەردى. قىزمەتتىك قارۋ مەن وق-ءدارىنىڭ جەتىسپەۋ نەمەسە بەكىتىلگەن شەكتەن ارتىق بولۋ فاكتىلەرى تىركەلگەن جوق. دەسە دە قارۋدى ساقتاۋ ءتارتىبىن بۇزعانى ءۇشىن قر اقبتك-ءنىڭ 484 بابىنا سايكەس 6 اكىمشىلىك حاتتاما تولتىرىلعان», دەدى شقو پد باستىعى ساعات ماديەۆ.
ايتا كەتەيىك, «قىزمەتتىك قارۋ» جەدەل الدىن الۋ شاراسى 5 ناۋرىزعا دەيىن جالعاسادى.
