پارلامەنت • 27 اقپان، 2021

سەناتورلار ەقىۇ پارلامەنتتىك اسسامبلەياسىنىڭ سەسسياسىنا قاتىستى

30 رەت كورسەتىلدى

قازاقستان رەسپۋبليكاسى پارلامەنتىنىڭ دەلەگاتسياسى ەقىۇ پارلامەنتتىك اسسامبلەياسىنىڭ قىسقى وتىرىسىنا قاتىستى. اتالعان ءىس-شارا 24-26 اقپان كۇندەرى بەينەكونفەرەنتسيا بايلانىسى ارقىلى وتكىزىلدى. سەناتور عۇمار دۇيسەمباەۆ اسسامبلەيانىڭ ەكونوميكا ماسەلەلەرى، عىلىم، تەحنولوگيا جانە قورشاعان ورتا جونىندەگى جالپى كوميتەتىنىڭ وتىرىسىندا ءسوز سويلەدى.

دەپۋتات ءوز سوزىندە تابيعات وزگەرىستەرى كەزىندە سۋ رەسۋرستارىنىڭ جاعدايى بۇكىل الەم ەلدەرى ءۇشىن كۇن تارتىبىندەگى اسا ماڭىزدى ماسەلە ەكەنىن اتاپ ءوتتى. ول قازىرگى تاڭدا قازاقستان ترانسشەكارالىق وزەندەردىڭ سۋ رەسۋرستارىن پايدالانۋدا ايتارلىقتاي ماسەلەلەرگە تاپ بولىپ وتىرعانىن دا جەتكىزدى. سونداي-اق، ارال تەڭىزىنىڭ تارتىلۋى ورتالىق ازيا ەلدەرىندە تۇراتىن 70 ميلليون ادامنىڭ ءومىر ءسۇرۋ ساپاسىن مەن تۇرمىس جاعدايىنا كەرى اسەرىن تيگىزۋدە.

«ورتالىق ازيا مەملەكەتتەرى حالىقارالىق ۇيىمدارمەن بىرلەسىپ، ارال باسسەينىندەگى ەكولوگيالىق جانە الەۋمەتتىك-ەكونوميكالىق داعدارىستى ەڭسەرۋ ءۇشىن ارەكەت ەتۋدە. ايماق ەلدەرى قۇرعان حالىقارالىق ارالدى قۇتقارۋ قورى جۇمىس ىستەيدى. وسى رەتتە ارالدى قالپىنا كەلتىرۋگە ەقىۇ ءوز ۇلەسىن قوسادى دەپ سەنەمىز جانە ۇيىمعا مۇشە مەملەكەتتەردى حالىقارالىق ارالدى قۇتقارۋ قورىنا كومەك قولىن سوزۋعا شاقىرامىز. ويتكەنى بۇل - تەك ورتالىق ازيانىڭ عانا ەمەس، بۇكىل الەمدىك قاۋىمداستىقتىڭ پروبلەماسى»، دەدى عۇمار دۇيسەمباەۆ.

سونىمەن قاتار سەسسيا اياسىندا دەموكراتيا، ادام قۇقىقتارى جانە گۋمانيتارلىق ماسەلەلەر جونىندەگى جالپى كوميتەتتىڭ وتىرىسى ءوتتى. وعان سەنات دەپۋتاتتارى قايرات قوجامجاروۆ پەن اقمارال ءالنازاروۆا قاتىستى.

قايرات قوجامجاروۆ بيىلعى 10 قاڭتاردا قازاقستاندا وتكەن پارلامەنت سايلاۋىنا مونيتورينگ جۇرگىزۋگە بايقاۋشىلار ميسسياسىن جىبەرگەنى ءۇشىن ەقىۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنا جانە پارلامەنتتىك اسسامبلەياسىنا العىس ءبىلدىردى. سونداي-اق، ول سايلاۋدىڭ اشىق ءارى ءادىل وتكەنىن اتاپ ءوتتى.

«سايلاۋعا مونيتورينگ جۇرگىزۋ جۇمىسىنا 398 حالىقارالىق بايقاۋشى قاتىستى. ونىڭ 323-ءى 10 حالىقارالىق ۇيىمنان، 76-سى 31 ەلدەن كەلگەن ماماندار. بيىلعى سايلاۋدىڭ نەگىزگى ەرەكشەلىگى رەتىندە ونىڭ پارتيالىق ءتىزىم بويىنشا جانە جاڭا زاڭنامالىق جاعدايدا وتكەنىن ايتۋعا بولادى. بيىل ءبىزدىڭ پارلامەنتتىك تاجىريبەمىزدە العاش رەت پارتيالىق تىزىمگە ايەلدەر مەن 29 جاسقا دەيىنگى جاستارعا ارنالعان 30 پايىزدىق كۆوتا ەنگىزىلدى. مۇنداي باستاما پارلامەنت پەن جەرگىلىكتى وكىلدى ورگانداردىڭ جۇمىسىندا ايەلدەر مەن جاستاردىڭ بەلسەندىلىگىن ارتتىرۋ ءۇشىن قولعا الىنىپ وتىر»، دەدى قايرات قوجامجاروۆ.

ودان بولەك، سەناتور قازاقستان پرەزيدەنتىنىڭ ساياسي پارتيالار ءۇشىن پارلامەنت ماجىلىسىنە وتۋگە مۇمكىندىك بەرەتىن شەكتى كورسەتكىشتى جەتى پايىزدان بەسكە دەيىن تومەندەتۋ جونىندە ايتقانىن جانە سايلاۋ بيۋللەتەنىنە «بارىنە قارسىمىن» دەگەن گرافانى قوسۋ ماسەلەسىن كوتەرگەنىن تىلگە تيەك ەتتى.

 

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار