جامبىلدىڭ 175 جىلدىق مەرەيتويىن وتكىزۋ جونىندەگى مەمكوميسسيانىڭ العاشقى وتىرىسى ءوتتى

رۋحانيات • 25 اقپان، 2021

جامبىلدىڭ 175 جىلدىق مەرەيتويىن وتكىزۋ جونىندەگى مەمكوميسسيانىڭ العاشقى وتىرىسى ءوتتى

35 رەت كورسەتىلدى

قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ توراعالىعىمەن جامبىل جاباەۆتىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ العاشقى وتىرىسى ءوتتى، دەپ حابارلايدى اقوردانىڭ ءباسپاسوز قىزمەتى.

دينار كەرىم

قازاقستان پرەزيدەنتى مەرەيتويلىق ءىس-شارالاردىڭ جوعارى ۇيىمداستىرۋشىلىق جانە مازمۇندىق دەڭگەيىن قامتاماسىز ەتۋ ءۇشىن «جامبىل جاباەۆتىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا قۇرۋ تۋرالى» ارنايى جارلىق قابىلداعانى بەلگىلى. وتىرىستى اشقان مەملەكەتتىك حاتشى ۇلى جىراۋ، دالا گومەرى اتانعان جامبىل جاباەۆتىڭ رۋحاني مۇرالارى الەمدىك مادەنيەتتىڭ التىن قورىنا ەنگەنىن اتاپ ءوتتى. جامبىل جاباەۆ ءوزىنىڭ عيبراتتى عۇمىرىندا ادامي قاسيەتتەردى ارداقتاۋدى، وتانعا دەگەن ىڭكارلىكتى جانە قارا قىلدى قاق جارعان ادىلەتتىلىكتى جىرىنا ارقاۋ ەتىپ ءوتتى.

بۇگىنگى تاڭدا ونىڭ شىعارماشىلىعى قوعامنىڭ رۋحاني جاڭعىرۋى جولىندا ەرەكشە وزەكتى بولىپ وتىر. ق.كوشەرباەۆ بىلتىر ۇلى ابايدىڭ 175 جىلدىق جانە ءال-ءفارابيدىڭ 1150 جىلدىق مەرەيتويلارىن جوعارى دەڭگەيدە لايىقتى اتاپ وتىلگەنىنە توقتالىپ، ۇلى جىراۋدىڭ مەرەيتويى دا ۇرپاقتىڭ ساناسىنا ۇلاعات بولار تاعىلىمدىق جانە تانىمدىق ءىس-شارالار ارقىلى جالعاساتىنىن ايتتى.

وتىرىس بارىسىندا مادەنيەت جانە سپورت ءمينيسترى ا.رايىمقۇلوۆانىڭ، الماتى جانە جامبىل وبلىستارىنىڭ اكىمدەرى ا.باتالوۆ پەن ب.ساپارباەۆتىڭ، قازاقستان جازۋشىلار وداعىنىڭ باسقارما توراعاسى ۇ.ەسداۋلەتتىڭ جامبىل جاباەۆتىڭ 175 جىلدىعى اياسىندا وتكىزۋگە جوسپارلانعان ءىس-شارالار تۋرالى اقپاراتتارى تىڭدالدى.

تالقىلاۋ قورىتىندىسى بويىنشا مەملەكەتتىك كوميسسيا مەرەيتويلىق ءىس-شارالاردىڭ جالپىرەسپۋبليكالىق جوسپارىن ماقۇلدادى جانە بەكىتتى. مەرەيتويلىق جىل ىشىندە رەسپۋبليكا بويىنشا 500-گە جۋىق الەۋمەتتىك، يميدجدىك، عىلىمي، تانىمدىق ءىس-شارالار وتكىزىلەدى.

بۇدان بولەك، اقىن ومىرىنەن دەرەكتى فيلم ءتۇسىرۋ، ولەڭدەرىنىڭ جاڭا جيناقتارىن شىعارۋ، ايتىستار مەن ادەبي كونكۋرستاردى، كىتاپ كورمەلەرىن ۇيىمداستىرۋ، مەرەيتويلىق مونەتا، پوشتا ماركاسىن ازىرلەۋ جانە باسقا دا شارالار وتكىزۋ كوزدەلىپ وتىر. مەملەكەتتىك حاتشى ۇكىمەتكە جالپىرەسپۋبليكالىق جوسپاردىڭ ساپالى ورىندالۋىن جانە مەرەيتويلىق ءىس-شارالاردىڭ اقپاراتتىق تۇرعىدان جان-جاقتى سۇيەمەلدەنۋىن قامتاماسىز ەتۋدى تاپسىردى.

وبلىستاردىڭ، نۇر-سۇلتان، الماتى، شىمكەنت قالالارىنىڭ اكىمدەرىنە جامبىل جاباەۆتىڭ مەرەيتويىن مەرەكەلەۋ جونىندەگى وڭىرلىك جوسپارلاردى ازىرلەپ، بەكىتۋدى جانە ولاردىڭ ورىندالۋىن قاداعالاۋدى مىندەتتەدى.

تالقىلاۋ قورىتىندىسى بويىنشا مەملەكەتتىك كوميسسيا مەرەيتويلىق ءىس-شارالاردىڭ جالپىرەسپۋبليكالىق جوسپارىن بەكىتتى.