كورشىنىڭ كوپ-كورىم كومەگى

قوعام • 25 اقپان، 2021

كورشىنىڭ كوپ-كورىم كومەگى

14 رەت كورسەتىلدى

قايىرىمدىلىق قولىن سوزىپ، جاناشىرلىق قۇشاعىنا الۋ – حالقىمىزدىڭ ىقىلىم زاماننان بەرى بويىنا بىتكەن ىزگى قاسيەتتىڭ ءبىرى. تاياۋدا پەتروپاۆل قالاسىنداعى كيروۆ اتىنداعى زاۋىت ۇجىمى كوكشەتاۋداعى شوقان ءۋاليحانوۆ اتىنداعى ۋنيۆەرسيتەتپەن بىرلەسىپ الەۋمەتتىك جاعىنان از قامتىلعان وتباسىلاردىڭ ستۋدەنتتەرىنە سوڭعى ۇلگىدەگى نوۋتبۋكتەردى تابىس ەتتى، دەپ حابارلايدى Egemen.kz.

بايقال ءبايادىل

جاستاردىڭ جانىن جادىراتقان باعالى سىيلىققا ءبىلىم بەرۋ گرانتىنىڭ جالپى كونكۋرسى بويىنشا جوعارى وقۋ ورنىنا تۇسكەن ستۋدەنتتەر لايىق دەپ تانىلدى. بۇل اراداعى باستى ماقسات – ءبىلىمدى جاستارعا قولداۋ كورسەتۋ. ەكىنشى ءبىر قىرى جاستار اراسىندا ادامگەرشىلىك قاسيەتتەردى ناسيحاتتاپ، ايرىقشا ءماندى ماڭىزىن ۇعىندىرۋ. زاۋىت وكىلدەرىنىڭ ايتۋلارىنا قاراعاندا، مۇنداي ءىس-شارالار وتكىزۋ بەرىك داستۇرگە اينالعان ەكەن. وسى ءبىر قايىرىمدىلىققا نەگىزدەلگەن قادام ارقىلى الەۋمەتتىك ماسەلەلەردى شەشۋ بارىسىندا بەلسەندىلىك تانىتىپ، وزگەگە ونەگە بولۋدا.

– بار جاقسىلىق وسەمىن دەگەن، ءبىلىم الامىن دەگەن جاستارعا جاسالۋى كەرەك، – دەيدى زاۋىت ديرەكتورىنىڭ ورىنباسارى قايرات الىبەكوۆ، – بۇعان دەيىن ءتورت وبلىستا الەۋمەتتىك جاعىنان از قامتاماسىز ەتىلگەن وتباسىلارعا ارقيلى پلانشەتتەر مەن نوۋتبۋكتەر ساتىپ اپەردىك. الداعى ۋاقىتتا اۋعان سوعىسى ارداگەرلەرىنىڭ وتباسىلارىنا كومەك كورسەتپەكشىمىز.

باعالى سىيلىققا يە بولعان ستۋدەنتتەر ءماز-مەيرام. جامان تۇماۋ جايلاعالى قاشىقتىقتان وقۋ جۇيەسىنە اۋىسقان ولار «بۇل جابدىقتار بىزگە ابدەن قاجەت ەدى» دەيدى.

– سوڭعى ۇلگىدەگى تەحنيكالاردى ءبىلىم الۋ جولىندا پايدالانامىز، – دەيدى ۋنيۆەرسيتەت ستۋدەنتى ۆەرا نۋرىشەۆا، – كورشى وبلىستاعى قايىرىمدى جانداردىڭ كومەگىن ىلتيپاتپەن ايتا جۇرەتىن بولامىز. وسىنداي ۋاقىتتا اقجارقىن اعالاردىڭ، ەل بولاشاعىن ويلايتىن ازاماتتاردىڭ جاناشىرلىق جاساعانى قانداي جاقسى.

كورشىنىڭ كومەك قولىن سوزۋى قۇپتارلىق ءىس. كورشىسى جاقسىنىڭ كوشى ىركىلمەيدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز