سقو دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, پەتروپاۆل قالالىق كوپبەيىندى اۋرۋحاناسىنىڭ جاراقات بولىمشەسىنە سوڭعى ون شاقتى كۇندە ۇسىك شالعان 13 ادام جۇگىنگەن. ولاردىڭ بەسەۋى اۋرۋحاناعا جاتقىزىلدى.
«بەس ادامنىڭ جاعدايى ناشار. 3-4 دارەجەلى ۇسىك العان. ياعني, سۋىقتىڭ اسەرىنەن جۇمساق ەت, سۇيەك پەن بۋىن زاقىمدالعان. مۇنداي جاعدايدا امپۋتاتسيا جاساپ, دەنەنىڭ زاقىمدالعان مۇشەسىن كەسۋگە تۋرا كەلەدى. ۇسىك شالعان قالعان ناۋقاستاردى قاجەتتى ءدارى-دارمەكتى جازىپ, ۇيلەرىنە ەمدەلۋگە جىبەردىك», دەيدى پەتروپاۆل قالالىق كوپبەيىندى اۋرۋحانانىڭ جاراقات بولىمشەسىنىڭ مەڭگەرۋشىسى ۆالەري گريباشوۆ.
جالپى «قازگيدرومەتتىڭ» مالىمەتىنشە, 25 اقپاندا ءوڭىردىڭ كەي جەرلەرىندە بۇرقاسىن بولماق. سولتۇستىك-باتىستان جەل سوعادى, كەي جەرلەردە ەكپىنى سەكۋندىنا 15-20 مەترگە دەيىن جەتپەك. اۋا رايىنىڭ بۇزىلۋىنا وڭتۇستىكتەن ويىسقان تسيكلون سەبەپ. اياز بەن بوران اپتانىڭ سوڭىنا دەيىن ساقتالماق. اۋا تەمپەراتۋراسى كۇندىز -18, تۇندە كەي جەرلەردە -38 گرادۋسقا دەيىن تومەندەمەك.
