جوسپاردا 9 باعىت بويىنشا 36 ءىس-شارا قاراستىرىلعان. ولاردىڭ بارلىعى اعا بۋىن ازاماتتارىنىڭ ءومىر ءسۇرۋ ساپاسىن, ءومىر ۇزاقتىعىن ارتتىرۋعا, الەۋمەتتىك جانە پسيحولوگيالىق سالاماتتىلىققا, الەۋمەتتىك ومىرگە تارتۋعا جانە ت. ب. باعىتتالعان.
قۇجات «اعا بۋىن ازاماتتارىنىڭ قۇقىقتارىن ساقتاۋ جانە قادىر-قاسيەتىن قامتاماسىز ەتۋ», «اعا بۋىن ازاماتتارىنىڭ ماتەريالدىق جاعدايى», «اعا بۋىن ازاماتتارىنىڭ جۇمىسپەن قامتىلۋىن ارتتىرۋ», «قارت ادامدارى بار وتباسىلاردى قولداۋ» جانە ت. ب. باعىتتاردى قامتيدى.
مىسالى, «بوس ۋاقىتتى ۇيىمداستىرۋ ءۇشىن جاعداي جاساۋ» باعىتى اياسىندا ەلىمىزدىڭ بارلىق وڭىرلەرىندە بەلسەندى ۇزاق ءومىر ءسۇرۋ ورتالىقتارىن اشۋ, قارت ادامدار ءۇشىن مادەني-بۇقارالىق ءىس-شارالار وتكىزۋ, قارتتار كۇنىن مەرەكەلەۋگە ارنالعان ءىس-شارالار وتكىزۋ جانە ت. ب. جوسپارلانۋدا.
ۇلتتىق جوسپاردى ازىرلەۋ كەزىندە ءمادريدتىڭ قارتايۋ ماسەلەلەرى جونىندەگى حالىقارالىق ءىس-قيمىل جوسپارىنىڭ ۇسىنىستارى ەسكەرىلدى. وندا قارت ادامداردىڭ تەك الەۋمەتتىك قامتاماسىز ەتىلۋىنە عانا ەمەس, سونىمەن قاتار زياتكەرلىك جانە وندىرىستىك تاجىريبە يەسى, قوعام دامۋىنىڭ بەلسەندى قاتىسۋشىلارى رەتىندە سۇرانىسقا يە بولۋىنا باعىتتالعان شارالار قاراستىرىلعان.
بۇگىنگى تاڭدا قازاقستان بۇۇ انىقتاعان 7 پايىزدىق شەكتى ەڭسەرىپ, حالقى قارتايعان ەلدەرگە جاتقىزىلدى. ەلىمىزدىڭ 8 ايماعىنا قارتايۋ پروتسەسى ءتان.
ماسەلەن, ەلدىڭ سولتۇستىك-شىعىسىندا جانە ورتالىق قازاقستاننىڭ ءبىر بولىگىندە جاعداي ەۋروپا ەلدەرىمەن ۇقساس, ياعني حالىقتىڭ از تابيعي ءوسىمى جانە كوشى-قوننىڭ تەرىس سالدوسى سەبەبىنەن جاس ادامدارمەن سالىستىرعاندا ەگدە ادامدار سانىنىڭ تەز وسۋىنە بايلانىستى حالىقتىڭ قارتايۋى ورىن الادى.
رەسپۋبليكانىڭ وڭتۇستىك جانە باتىس وڭىرلەرىندە, سونداي-اق نۇر-Cۇلتان قالاسىندا بالا تۋدىڭ ءوسۋى ەسەبىنەن 15 جاسقا دەيىنگى حالىق ۇلەسىنىڭ ۇلعايۋى بايقالادى, ناتيجەسىندە حالىقتىڭ قارتايۋ كورسەتكىشى تومەندەيدى.
ءىس-شارالار جوسپارىمەن enbek.gov.kz سايتىندا تانىسۋعا بولادى.
