وتكەن جىلى 34 مىڭنان استام حالقى بار 4 شاعىن اۋدانعا كارىز جۇيەسى قوسىلدى. بۇل جونىندە قالا اكىمى مۇرات ايتەنوۆ ەسەپتى جيىندا باياندادى.
– كارىز جۇيەسىندەگى ۇلكەن ماسەلە قۇبىر سالۋ ەمەس, شايىندى سۋ تازارتۋ كەشەنىندە. قالادا كارىز سۋىن تازالايتىن جالعىز كەشەن بار. ونىڭ قۋاتتىلىعى 150 مىڭ مەتر كۋب, ال ناقتى قاجەتتىلىك 360 مىڭ مەتر كۋب. شاعىن اۋداننىڭ بارلىعىن كاناليزاتسياعا قوسۋعا قۋاتى جەتپەيدى. بۇل ماسەلەنى شەشۋ بويىنشا دا بەلگىلى ءبىر جوسپار بويىنشا ارەكەت ەتىپ وتىرمىز, – دەدى قالا اكىمى.
بيىل 18 مىڭ حالىق تۇراتىن تۇرعىن ءۇي الاپتارى كارىزگە قوسىلىپ, كورسەتكىشى 52,3 پايىزدان 54 پايىزعا ارتادى. 2025 جىلعا دەيىن بۇل كورسەتكىش 75 پايىزعا جەتەدى.
سونىمەن قاتار, شاھار باسشىسى قالاداعى توزىعى جەتكەن جىلۋ قۇبىرلارىن كەزەڭ-كەزەڭىمەن اۋىستىرۋ قاجەتتىگىن ايتىپ ءوتتى. وسى ماقساتتا وتكەن جىلى 15 نىساندا قۇرىلىس جانە جوندەۋ جۇمىستارى جۇرگىزىلىپ, جىلۋ قۇبىرلارىنىڭ توزۋ دەڭگەيى 42,7 پايىزدان 38 پايىزعا تومەندەدى.
بيىل توزىعى جەتكەن 41 شاقىرىم جىلۋ قۇبىرى جوندەلىپ, قۇبىرلاردىڭ توزۋ دەڭگەيى 38 پايىزدان 37 پايىزعا تومەندەيدى.
