الماتى وبلىسىنىڭ سپورت مەكتەپتەرىنە 22 اۆتوكولىك بەرىلدى

شارادا الدىمەن وڭىردەگى سپورت سالاسىنىڭ وتكەن جىلعى دامۋى، سپورتشىلاردىڭ جەتكەن جەتىستىكتەرى تۋرالى بەينەروليك كورسەتىلىپ، جەڭىستى جولدارى تانىستىرىلدى. جينالعان قاۋىمعا العاشقى بولىپ ءسوز ارناعان وبلىس اكىمى اماندىق باتالوۆ سپورت سالاسىنا كورسەتىلىپ وتىرعان قولداۋلار جايلى قىسقاشا ايتىپ، سپورتشىلارعا شەبەرلىك، ەرىك-جىگەر، كۇش-قايرات تىلەدى:

- قازىرگى كەزدە بارلىق جاستاعى ازاماتتار اراسىندا بۇقارالىق سپورتتى دامىتۋعا باسا نازار اۋدارىلىپ كەلەدى. ءبىز ءاربىر اۋدان ورتالىعىندا زاماناۋي سپورت كەشەندەرىن سالىپ جاتىرمىز. وتكەن جىلى قاراساي جانە ەسكەلدى اۋداندارىندا دەنە شىنىقتىرۋ-ساۋىقتىرۋ كەشەندەرى اشىلدى. جاقىن ارادا كوكسۋ اۋدانى بالپىق بي اۋىلىنداعى سپورت كەشەنى اشۋعا دايىن. «اۋىل ەل-بەسىگى» باعدارلاماسى بويىنشا بالقاش، الاكول، ۇيعىر، اقسۋ، رايىمبەك اۋداندارىندا 5 وسىنداي كەشەن سالىنىپ جاتىر. بۇل جالپى تۇرعىنداردى، جاستاردى بۇقارالىق سپورتقا، دەنە شىنىقتىرۋعا كوپتەپ تارتۋعا مۇمكىندىك بەرەدى. 2020 جىلى وبلىستا سپورت سالاسىن دامىتۋعا 18،3 ملرد. تەڭگە  بولدىك. جۋىردا تالدىقورعان قالاسىندا ورتا ازيادا تەڭدەسى جوق وليمپيادالىق ستاندارتقا ساي «تالدىقورعان» ورتالىق باسسەينىن ىسكە قوسامىز. مۇندا بالالارىمىزدىڭ باسسەيندە ەمىن-ەركىن جاتتىعۋىنا مۇمكىندىك تۋادى. بۇل عيماراتتا الەم چەمپيوناتتارىن وتكىزۋگە بولادى. سول سياقتى ءبىز سپورت مەكتەپتەرىن اشىپ، شتات بەرىپ، بۇگىن ارنايى كولىك ساتىپ اپەرىپ وتىرمىز. ماتەريالدىق-تەحنيكالىق بازانى جاقسارتۋ شارالارى سپورتشى جاستاردىڭ جاقسى ناتيجەگە جەتۋىنە ىقپال ەتەدى دەپ ويلايمىن. ەلىمىزدىڭ كوك تۋى ارقاشان بيىكتە جەلبىرەسىن. ىستەرىڭىز ءساتتى بولىپ، العا قويعان ماقسات-مۇراتتارىڭىزعا جەتە بەرىڭىزدەر، - دەگەن ا. باتالوۆ بۇدان ءارى ماراپاتتاۋ راسىمىنە كوشىپ، ۇزدىك سپورتشىلارعا قۇرمەت گراموتاسى مەن العىس حاتتارىن، ارنايى ديپلومدار جانە 300 مىڭنان 2 ملن. تەڭگەگە دەيىنگى اقشالاي سەرتيفيكاتتار تاپسىردى. ماراپات العاندار قاتارىندا مما سپورتىنان قر حالىقارالىق دارەجەدەگى سپورت شەبەرى، 3 دۇركىن الەم چەمپيونى ارداق نازاروۆ، كاسىپقوي بوكسشىلار جانقوش تۇراروۆ پەن ايدوس ەربوسىن ۇلى، تاربيەلەنۋشى سپورتشىلارى حالىقارالىق جارىستاردا جوعارى ناتيجەلەرگە قول جەتكىزگەنى ءۇشىن بىرقاتار جاتتىقتىرۋشىلار - ساداق اتۋدان  نيگماتۋللا سايديەۆ، ۆەلوسپورتتان سانات تالاسپاەۆ پەن ءسابيت تايمەنكەنوۆ، ايەلدەر كۇرەسىنەن ادىلەت ەرماكوۆ، پاۋەرليفتينگتەن داۋرەن ەلۋباەۆ، شاحماتتان قۋانىش جارقىمباەۆ، سول سياقتى ۆەلوسپورتتان قر-نىڭ 2020 جىلعى چەمپيونى باقىتجان بەكتەنوۆ، 10 جاسقا دەيىنگى جاسوسپىرىمدەر اراسىندا شاحماتتان وتكەن ونلاين الەم چەمپيوناتىنىڭ كۇمىس جۇلدەگەرى ەلناز قالياحمەت، يندورحوككەيدەن ايەلدەر اراسىنداعى قر چەمپيونى ۆيكتوريا لوبانوۆا، باسكەتبولدان ايەلدەر اراسىندا قر چەمپيونى ديانا بۋشمەلوۆا جانە باسقا دا بىرقاتار ازاماتتارعا قۇرمەت كورسەتىلدى.

وبلىستاعى بالالار مەن جاسوسپىرىمدەر سپورت مەكتەپتەرىنە بارلىعى 22 شاعىن اۆتوبۋس كولىگىنىڭ كىلتى بەرىلدى. وسى باسقوسۋدا سپورت سالاسىن اقپارات قۇرالدارىندا ناسيحاتتاپ جۇرگەن جۋرناليستەر دە ماراپات الدى.

جيىن بارىسىندا ارداق نازاروۆ پەن ۆيكتوريا لوبانوۆا ءسوز الىپ، ارىپتەستەرىن مەرەكەلى كۇنمەن قۇتتىقتاپ، بولاشاقتا جەتىسۋ وڭىرىنەن الەم چەمپيوندارى كوپتەپ شىعۋىنا تىلەكتەستىگىن ءبىلدىردى.

اتاپ وتسەك، تەك وتكەن جىلدىڭ قورىتىندىسى بويىنشا وبلىس سپورتشىلارى بارلىعى 853 جۇلدەگە يە بولعان. سونىڭ ىشىندە 292-ءسى – التىن، 258-ءى – كۇمىس، 303-ءى – قولا مەدال. جىل ىشىندە 20 حالىقارالىق سپورت شەبەرى، 124 سپورت  شەبەرى، 375 سپورت شەبەرلىگىنە كانديدات، 166 ءبىرىنشى رازريادتى سپورتشى دايىندالدى. ءوڭىر سپورتشىلارى توكيوداعى XXXII جازعى وليمپيادا ويىندارىنا قاتىسۋعا 7 ليتسەنزيا ۇتىپ العان. ولاردىڭ اراسىندا ساداق اتۋدان سانجار مۋساەۆ، دەنيس گانكين، يلفات ابدۋللين، جەڭىل اتلەتيكادان ايمان راتوۆا، گرەك-ريم كۇرەسىنەن اسحات ديلمۋحامەدوۆ، ۆەلوسپورتتان سەرگەي پونومارەۆ، اۋىر اتلەتيكادان زۋلفيا چينشانلو بار.