كوروناۆيرۋس • 24 اقپان، 2021

ىندەتتىڭ تارالۋىن توسقاۋىل تىزگىندەيدى

9 رەت كورسەتىلدى

جۇقپالى ىندەتتىڭ جاپپاي تارالۋى باسەڭدەگەنمەن، بوساڭسۋعا ءالى ەرتە. ويتكەنى قاۋىپتى ۆيرۋستان زارداپ شەككەن ناۋقاستاردىڭ جاعدايى وڭىرلەردەگى الدىن الۋ مەن ساقتىق شاراسىنا نەمقۇرايلى قاراۋعا بولمايتىنىن كورسەتكەندەي.

ماسەلەن، الماتى وبلىسىندا كوروناۆيرۋس ىندەتىنە شالدىققانداردىڭ جالپى سانى 9 781 ادامعا جەتتى. ونىڭ ىشىندە 3 976 ناۋقاستىڭ قاۋىپتى ۆيرۋس­تى تاسىمالداۋشى ەكەنى انىقتالدى. قۋانىشتىسى، دەر كەزىندە جاسالعان شارالار ىندەتتىڭ جاپپاي تارالۋىنا توسقاۋىل بولىپ، ناۋقاستاردىڭ ساۋىعىپ شىعۋىنا جاردەمىن تيگىزدى. وسى جەردە جەتىسۋلىق دارىگەرلەر مەن سانيتارلىق قادا­عالاۋ قىزمەتى ماماندارىنىڭ ەڭ­بە­­­گىنە ەرەكشە ريزاشىلىق بىلدىرگەن ورىندى.

قازىر وڭىردەگى ەپيدەميالىق جاعداي تۇراقتى. وبلىس «جاسىل ايماقتا». سوڭعى ەكى اپتا ارالىعىنداعى ىندەت­تىڭ انىقتالۋ دەڭگەيى 0،8 پايىزدان تو­مەن­دەپ، 0،6 پايىزدى قۇرادى. جاع­داي­دىڭ تۇراقتانۋى شەكتەۋ شارالارىن جەڭىلدەتۋگە مۇمكىندىك بەرىپ وتىر.

– مەشىتتەردىڭ 30 پايىزعا دەيىن جاماعات جيناۋىنا رۇقسات ەتىلدى. ياعني قۇلشىلىق ورىندارىندا 100 ادامنان اسپايتىن توپپەن ناماز وقۋعا بولادى. ونىڭ ىشىندە اۋىلدىق جەرلەردە جۇما نامازى وقىلادى، بىراق ادام سانى 150 كەلۋشىدەن اسپاۋى ءتيىس دەگەن تالاپ بار. ال كارانتين تالاپتارىنا سايكەس ورىن سانى 50-دەن اسپايتىن قوعامدىق تاماقتانۋ نىساندارى جۇ­مىس ىستەپ جاتىر. سونىمەن قاتار ايال­دامالار مەن قوعامدىق كولىكتەردە ازاماتتاردىڭ جاپپاي جينالۋىن بولدىرماۋ ماقساتىندا ادام سانى 250 جۇمىسشىدان اساتىن جۇمىس ورىندارىنا قىزمەتكەرلەردى تاسىمالداۋ ءۇشىن مەكەمەنىڭ قىزمەتتىك كولىگىن پايدالانۋ ۇسىنىلادى. شتات كەستەسىندە 30-دان اساتىن قىزمەتكەر بولسا، ولاردىڭ 50 پايىزى قاشىقتان جۇمىس ىستەۋى ءتيىس. ءبىز وسىنداي شارا ارقىلى ىندەتتىڭ تارالۋىن توقتاتا الامىز، – دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسحات شاراپيەۆ.

كوروناۆيرۋسپەن كۇرەسكە جاپپاي جۇمىلعان وبلىس دارىگەرلەرى تۋرالى ايت­قاندا اۋىلداعى اق جەلەڭدى ابزال جانداردىڭ ەڭبەگىنە ەرەكشە توقتالۋى­مىز كەرەك سياقتى. ويتكەنى پاندەميا كەزىندە شالعايداعى ەمحانالاردىڭ مۇم­كىندىگى مەن مامانداردىڭ بىلىكتىلىگى ءبىرىنشى سىنعا تۇسكەنى بەلگىلى. بۇل ەمحا­نا­لارداعى جاعداي ورتالىقتاعىداي جو­عا­رى دەڭگەيدە بولماسا دا، ناۋقاسقا كو­مەك بەرۋ تۇرعىسىنان العاندا ەرلىككە بەرگىسىز ەڭبەك جاسالعانى انىق. سونداي ۇجىمنىڭ ءبىرى – تالعار اۋدانى پانفيلوۆ اۋىلىنداعى اۋرۋحانانىڭ دارى­گەرلەرى. ىندەتتىڭ ءبىرىنشى تولقى­نىن­دا پروۆيزورلىق ورتالىق قىزمەتىن اتقارعان مەديتسنالىق مەكەمە قازىر ينفەكتسيالىق بولىمشە رەتىندە جۇمىسىن جالعاستىرۋدا. مۇندا 60 توسەكتىك ورىن بار. وسى ساتتە كوروناۆيرۋس ىندەتىنە شالدىققان 49 ناۋقاس ەم قابىلداپ جاتىر.

– ءبىزدىڭ اۋرۋحانا ءبىر جىل بۇرىن كوروناۆيرۋس ىندەتىمەن كۇرەسۋ ماقساتىندا قايتا جاساقتالىپ، جەدەل قىزمەت كور­سە­تۋگە كىرىستى. دەمەك، اۋىلداعى اۋرۋحا­نا رەتىندە توقتاۋسىز جۇمىس ىستەپ، جىلعا جۋىق ۋاقىت بويى قاۋىپتى ۆيرۋسپەن كۇ­رە­سىپ كەلەمىز. بىلتىر ناۋرىز ايىنان باستاپ قىركۇيەكتىڭ ورتاسىنا دەيىن پروۆيزورلىق بولىمشە بولدىق. ودان بەرى ينفەكتسيالىق بولىمشە رەتىندە ناۋ­قاس­تاردى ەمدەۋدەمىز. بۇگىندە بو­لىم­شە­دە­گى 49 ناۋقاسقا ۆيرۋستى وكپە قابىنۋ دەگەن دياگنوز قويىلىپ، ەم-شارا جاسالۋدا. ولاردىڭ اراسىندا 7 ناۋقاستىڭ پتر تالداۋىنىڭ قورىتىندىسى وڭ ناتي­جە كورسەتتى، ولار وقشاۋلانعان. ال جاعدايى اۋىر 5 ناۋقاستى اۋداندىق اۋرۋ­­حانانىڭ جانساقتاۋ بولىمىنە جو­نەلت­تىك، – دەيدى پانفيلوۆ اۋىلدىق اۋرۋ­حا­ناسى باس دارىگەرىنىڭ ورىنباسارى زۋحرا تىلەپبەرگەنوۆا.

بۇل بولىمشەدە العاشقى كومەك كور­سەتۋگە قاجەتتى مەديتسينالىق قۇرال-جاب­­دىق­تىڭ بارلىعى بار. مۇندا وك­پەنى جاساندى جەلدەتەتىن 3 اپپارات پەن 8 وتتەگى كوندەنساتى ىسكە قوسىلعان. ءدارى-دارمەك قورى دا جەتكىلىكتى. بو­لىمشەدەگى 8 بىلىكتى دارىگەر مەن 12 مەيىربيكە ادام جانىنا اراشا تۇسۋگە ار­قاشان دايىن. جالپى، وسى شاعىن بولىمشەدە وتكەن مەرزىمدە 619 ناۋقاس ەمدەلىپ، ىندەتتەن قۇلان تازا ايىعىپ شىققان ەكەن.

 

الماتى وبلىسى

 

سوڭعى جاڭالىقتار

«كيىك جاپپاي قىرىلىپ جاتىر»..

ايماقتار • بۇگىن، 14:15

پنەۆمونيادان 5 ادام قايتىس بولدى

كوروناۆيرۋس • بۇگىن، 10:00

شقو-دا تۇرعىندار ەۆاكۋاتسيالاندى

ايماقتار • 09 ءساۋىر، 2021

تاسقىن قاۋپى اۋەدەن زەرتتەلدى

ايماقتار • 09 ءساۋىر، 2021

الماتىدا تاۋ باۋرايى وتقا وراندى

ايماقتار • 09 ءساۋىر، 2021

ۇقساس جاڭالىقتار