بۇل كۇندە وڭىردە كارانتين تالاپتارى الىنعانىمەن, ءالى دە بولسا تۇرعىنداردىڭ قاۋىپسىزدىك شارالارىن ۇستانۋى, تارتىپكە باعىنۋى كەرەكتىگى ءجيى ايتىلۋدا. قازىرگى كەزدە وڭىردەگى كوپتەگەن اۋداندا وتتەگى ستانساسىنىڭ جوقتىعى وزەكتى ماسەلەگە اينالعان. اتالعان ماسەلەنى وبلىستىق قوعامدىق كەڭەستىڭ توراعاسى امزەبەك جولشىبەكوۆ تە كوتەردى. ماسەلەن, بۇگىندە وبلىستاعى ەمدەۋ مەكەمەلەرىندە توسەكتىك قورى جەتكىلىكتى. مەكەمەلەر مەن ءدارىحانالاردى ءدارى-دارمەكپەن قامتۋ, ىندەتكە قارسى ەكپە ەگۋ جۇمىستارى دا ايتارلىقتاي قارقىندى جۇرگىزىلۋدە. ءبىرىنشى كەزەڭدە وبلىسقا سپۋتنيك V ۆاكتسيناسىنىڭ 1 مىڭ دوزاسى جەتكىزىلىپ, بارلىق ەمدەۋ مەكەمەلەرىنە تاراتىلعان. بۇل دا قاۋىپتى ىندەتتىڭ الدىن الۋ ماقساتىندا قابىلدانعان شەشىم. دەگەنمەن «جامان ايتپاي, جاقسى جوق», تۇرعىندار وتكەن جىلعىداي قاۋىپتى ىندەت قاھارىنا قايتا مىنگەن جاعدايدا وتتەگى ستانسالارىنىڭ جوقتىعىنا الاڭداۋلى.
«وبلىس بويىنشا تەك تاراز قالاسىندا عانا, ونىڭ وزىندە بار-جوعى 4 ەمدەۋ مەكەمەسىندە عانا وتتەگى ستانساسى بار. بىلتىر ىندەت ۋشىققان كەزدە ناۋقاستاردىڭ دەنى وتتەگى جەتىسپەۋشىلىگىنەن كوز جۇمعانى بەلگىلى. سول كەزدە مەديتسينالىق مەكەمەلەر كۇنىنە 170-180 وتتەگى باللونىن الماستىرىپ وتىرۋعا ءماجبۇر بولعان ەدى. بەتى اۋلاق, ەگەر سول جاعداي تاعى قايتالاناتىن بولسا, شالعاي اۋداندارعا تاراز قالاسىنان وتتەگى باللوندارىن دەر كەزىندە جەتكىزىپ وتىرۋ مۇمكىن ەمەس. وسىنى بىلە تۇرا الىستاعى اۋداندار نەگە وتتەگى ستانسالارىمەن قامتىلماي وتىر؟», دەيدى مەديتسينا عىلىمدارىنىڭ دوكتورى, وبلىستىق قوعامدىق كەڭەستىڭ مۇشەسى ساعىندىق وردابەكوۆ.
شىنىندا دا, اۋدانداردا وتتەگى باللوندارىنىڭ جەتىسپەۋشىلىگى ۇلكەن ماسەلە. بىلتىر تالاي ادامنىڭ تاعدىرى وسىعان بايلانىستى بولعانى جاسىرىن ەمەس. بۇل ورايدا, وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ اتالعان ماسەلە بويىنشا بيۋدجەتتەن ارنايى قارجى ءبولىنىپ, قازىرگى تاڭدا ەكى اۋدانعا وتتەگى ستانساسىن ورناتۋ جۇمىسى قولعا الىنىپ وتىرعانىن ايتتى.
«بيۋدجەت ەسەبىنەن الىنعان مەديتسينالىق اپپاراتتان بولەك, دەمەۋشىلىك كومەك ەسەبىنەن دە 122 وتتەگى كونتسەنتراتورى, 14 وكپەنى جاساندى جەلدەتۋ اپپاراتى الىنىپ, ولار وڭىردەگى ەمدەۋ ۇيىمدارىنا بەرىلدى. قازىر مەركى, شۋ اۋداندارى كومپيۋتەرلىك توموگرافيا اپپاراتىمەن قامتىلسا, جاقىندا وسىنداي جابدىق قورداي اۋدانىنا دا بەرىلەتىن بولادى», دەيدى باسقارما باسشىسى.
سونداي-اق قاۋىپتى ىندەتتىڭ بەتى قايتپاي تۇرعاندا, كوپشىلىكتىڭ توي, جيىن سياقتى ادەتتەردەن تىيىلماي وتىرعانى دا وزەكتى ماسەلە. ماسەلەن, جۋىردا عانا جۋالى اۋدانىندا كوكپار ۇيىمداستىرىلىپ, وعان 200-دەن استام ادام قاتىسقان. سول سياقتى, كۇن سايىن جۇزدەگەن ادامعا كوپشىلىكتى جيناپ, توي, اس بەرۋ سياقتى شارالاردى ۇيىمداستىرعانى ءۇشىن ايىپپۇل سالىنۋدا. تاراز قالاسىنداعى قوعامدىق كولىكتەردە دە مەديتسينالىق ماسكاسىز ءارى-بەرى جۇرگەندەر كوپ. بۇل رەتتە وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نەيليا مۋليكوۆا جەكەلەگەن ادامدار مەن زاڭدى تۇلعالارعا سانيتارلىق تالاپتاردى ساقتاماعانى ءۇشىن 20 ملن تەڭگەدەن اسا ايىپپۇل سالىنعانىن, ونىڭ بيۋدجەت ەسەبىنە وندىرىلگەنىن جەتكىزدى.
قازىرگى كەزدە اۋدانداردا وتتەگى ستانسالارىنىڭ جەتىسپەۋشىلىگى, كوپشىلىكتىڭ قاۋىپسىزدىك شارالارىن ساقتاماۋى كۇردەلى ماسەلە. ءتىپتى تالاپ پەن تارتىپكە باعىنباۋ ىندەتتىڭ قايتا ءورشي تۇسۋىنە الىپ كەلۋى مۇمكىن. ەگەر اركىم قاۋىپسىزدىكتى وزىنەن باستاسا, ول وزىنە دە, وزگەگە دە پايدالى بولماق.
جامبىل وبلىسى
