2018-2020 جىلدارى باعدارلاما اياسىندا ۇلتتىق بانكتىڭ جالپى قارجىلاندىرۋ كولەمى 1 ترلن تەڭگەگە دەيىن جەتەدى دەپ كۇتىلگەن بولاتىن. اتاپ ايتقاندا, قارجى اگروونەركاسىپ كەشەنىندەگى (600 ملرد تەڭگەگە دەيىن), وڭدەۋ ونەركاسىبىندەگى (400 ملرد تەڭگەگە دەيىن) باسىم جوبالاردى قارجىلاندىرۋعا باعىتتالۋى ءتيىس-ءتىن. وسىلايشا مىڭنان استام ءتۇرلى ازىق-ت ۇلىك جانە حالىق تۇتىناتىن تاۋارلار وندىرەتىن كاسىپورىن قولداۋعا يە بولۋى كەرەك. «قاراپايىم زاتتار ەكونوميكاسى» بۇل مەجەنى ويداعىداي باعىندىردى.
2021 جىلعى 5 اقپانداعى جاعداي بويىنشا باعدارلاما ىسكە قوسىلعاننان بەرى ەكىنشى دەڭگەيلى بانكتەرگە كاسىپورىنداردان جالپى سوماسى 1 ترلن 82,5 ملرد تەڭگەگە 1 404 ءوتىنىم كەلىپ تۇسكەن. ونىڭ 970-ءى ماقۇلدانعان (802,9 ملرد تەڭگە). بۇدان بولەك, «دامۋ» قورىنا كرەديتتەردىڭ پايىزدىق مولشەرلەمەسىن سۋبسيديالاۋعا قاتىستى سوماسى 474 ملرد تەڭگە بولاتىن 686 ءوتىنىم تۇسكەن. ولاردىڭ بارلىعى ماقۇلداندى. سونىمەن قاتار «دامۋ» قورى وتاندىق كاسىپكەرلەردىڭ بانكتەگى كرەديتىنە كەپىلدىك بەرەتىن وپەراتور بولىپ سانالادى. اتالعان قۇرال بويىنشا 23,5 ملرد تەڭگەگە جانە 54,6 ملرد تەڭگە مولشەرىندەگى جالپى نەسيە قورجىنىنا بارلىعى 222 كەپىلدىك شارتى ماقۇلدانعان. قاراستىرىلعان 1 ترلن تەڭگەنىڭ 574,86 ملرد تەڭگەسىنە «دامۋ» قورى مەن اگرارلىق نەسيە كورپوراتسياسى جەلىسى بويىنشا كرەديت بەرىلدى.
«ىسكە قوسىلعان ساتتەن باستاپ, «قاراپايىم زاتتار ەكونوميكاسى» باعدارلاماسىنىڭ جەڭىلدىكپەن كرەديت بەرۋ تەتىگى بىرنەشە رەت وزگەرتىلىپ, بۇگىندە اناعۇرلىم ۇتىمدى نۇسقاسىن تاپتى. وزگەرىستەر جەتى رەت توپتالىپ ەنگىزىلدى. وسى بويىنشا حالىق تۇتىناتىن تاۋارلار مەن ازىق-ت ۇلىك تۇرلەرىن كوبەيتۋ كوزدەلدى. سونداي-اق تۇزەتۋلەر شەڭبەرىندە قاراجات قايتا ءبولىندى, مولشەرلەمەلەر تومەندەتىلدى, قارجىلاندىرۋ كولەمى ارتتى, سۋبسيديالاۋ مەرزىمدەرى ۇزاردى. بۇل رەتتە «بايتەرەك» حولدينگىنىڭ ەنشىلەس ۇيىمى – قازاقستاننىڭ دامۋ بانكى وپەراتور رەتىندە قوسىلدى. بانك مەملەكەتتىك كوميسسيانىڭ ۇسىنىمى نەگىزىندە تەك قانا ينفراقۇرىلىمدىق جانە يمپورتتى الماستىرۋعا باعىتتالعان جوبالاردى قارجىلاندىرادى. اتالعان مۇمكىندىكتەر وتاندىق تاۋار وندىرۋشىلەردىڭ «قاراپايىم زاتتار ەكونوميكاسىنىڭ» ءبىر بولىگىنە اينالىپ, ۇلتتىق ەكونوميكانىڭ نەگىزىن نىعايتۋدى كوزدەيتىن كۇردەلى ءارى ماڭىزدى مىندەتتەردى شەشۋىنە جول اشتى», دەلىنگەن «بايتەرەك» ۇلتتىق باسقارۋشى حولدينگى تاراتقان حابارلامادا.
ەسكە سالا كەتەيىك, «قاراپايىم زاتتار ەكونوميكاسى» باعدارلاماسىن «بايتەرەك» ۇلتتىق باسقارۋشى حولدينگىنىڭ ەنشىلەس ۇيىمى – «دامۋ» كاسىپكەرلىكتى دامىتۋ قورى ەكىنشى دەڭگەيلى بانكتەر مەن اگرارلىق نەسيە كورپوراتسياسى ارقىلى جۇزەگە اسىرادى. باعدارلاما بويىنشا مەملەكەت 10 جىلعا دەيىنگى مەرزىمگە قورلاندىرۋ, سۋبسيديالاۋ شارالارىن جۇرگىزەدى. سونىڭ ەسەبىنەن كليەنتتەر 6 پايىزدىق جەڭىلدەتىلگەن مولشەرلەمەگە يە بولادى. سونداي-اق كاسىپكەرلەر اينالىم قاراجاتىن تولىقتىرۋعا 3 جىلعا دەيىن قارجىلاندىرۋ الا الادى. سىياقى مولشەرلەمەسى 15 پايىزدى قۇرايدى, ونىڭ 9 پايىزىن مەملەكەت سۋبسيديالايدى. بۇل كليەنت ءۇشىن تۇپكى مولشەرلەمەنى 6 پايىزعا دەيىن تومەندەتۋگە مۇمكىندىك بەرەدى. ياعني كومپانياعا تۇسەتىن جۇكتەمەنى ايتارلىقتاي ازايتادى.
