ادەبيەتسۇيەر قاۋىمدى قۋانتقان جوباعا «قازاقپارات» حالىقارالىق اقپارات اگەنتتىگى ۇيىتقى بولىپ وتىر. «Tynda» ءموبيلدى قوسىمشاسى «كلاسسيكالىق پروزا», «كلاسسيكالىق پوەزيا», «دالا داۋىسى», «اباي الەمى», «الەمدىك كلاسسيكا» اتتى تاڭداۋلى توپتامالار مەن «رومان», «حيكايات», «اڭگىمە», «ەسسە», «بالالار ادەبيەتى», «ساتيرا», «پوەما», «ولەڭ», «پەسا» جانە وزگە دە جانرلاردان تۇرادى.
وسى ورايدا اقپارات جانە قوعامدىق دامۋ ءمينيسترى ايدا بالاەۆا اقپاراتتىق تەحنولوگيا قارىشتاپ دامىعان قازىرگى زاماندا كىتاپ وقۋعا دەگەن قىزىعۋشىلىقتىڭ ازايا باستاعانىن, سوندىقتان بۇل جاڭا جوبا وسى ولقىلىقتىڭ ورنىن تولتىرۋعا ءوز دەڭگەيىندە ىقپال ەتەتىنىن جەتكىزدى.
«ينتەرنەت پەن تەحنولوگيانىڭ دامۋى جانە ونىڭ كۇندەلىكتى ومىرىمىزگە دەندەپ ەنۋى – ءبىزدى كەيبىر بۇرىنعى ادەتتەردەن الىستاتىپ جاتقانى جاسىرىن ەمەس. سولاردىڭ ءبىرى – كىتاپ وقۋ داعدىسى دەسەك قاتەلەسپەيمىز. زەرتتەۋلەرگە سەنسەك, سوڭعى جىلدارى بۇكىل الەمدە كىتاپ وقۋعا قىزىعۋشىلىق ازايا باستاپتى. دەگەنمەن, تەحنولوگيا قانشا دامىسا دا, ءبىلىمنىڭ قاينارى – كىتاپتا ەكەندىگىمەن ەشكىم داۋلاسا قويماس. سوندىقتان ءبىز ادامدار كىتاپ وقىمايدى دەپ كىنا ارتقاننان, جاڭا زامانعا بەيىمدەلگەن ناقتى شارالاردى قولعا الۋىمىز كەرەك. بۇل رەتتە, «قازاقپارات» حالىقارالىق اقپارات اگەنتتىگى ىسكە قوسقان «Tynda» ءموبيلدى قوسىمشاسى وسى ولقىلىقتىڭ ورنىن تولتىرادى دەپ سەنەمىن», دەپ جازدى ا.بالاەۆا Facebook پاراقشاسىندا.
مينيستر جاڭا جوبا كىتاپسۇيەر قاۋىمنىڭ ۋاقىتىن ۇنەمدەپ, سۇيىكتى تۋىندىسىن جىلدام ءارى وڭاي تابۋعا مۇمكىندىك بەرەتىنىن العا تارتتى.
ءموبيلدى قوسىمشانى ءدال قازىر Play Market جانە App Store جەلىسىنەن جۇكتەۋگە بولادى, سونداي-اق ەلەكتروندى جانە اۋديوكىتاپتاردى ونلاين-وفلاين نۇسقادا وقىپ, تىڭداۋعا مۇمكىندىك بار.
ال ۇناعان كىتاپتاردى «مەنىڭ كىتاپتارىم» بولىمىنە ساقتاپ, «مەنىڭ سورەلەرىم» بولىمىندە جەكە كىتاپحانا جاساقتاۋعا بولادى ەكەن. «وقىلىم ستاتيستيكاسى» بولىمىندە اپتا, اي نەمەسە جىل بويى وقىلعان كىتاپتىڭ بەتتەر سانى, وقۋ جىلدامدىعى مەن وقۋ ۋاقىتىنىڭ ستاتيستيكاسى كورسەتىلەدى. «ايدىڭ جاڭا كىتاپتارى», «سىزگە ۇناۋى مۇمكىن», «كوپ ىزدەلگەن» سياقتى ايدارلاردان وقىرمان مەن تىڭداۋشى جاڭا ءارى سۇرانىستاعى كىتاپتاردى تابا الادى.
اتاۋلى جوبا ءتول ادەبيەتىمىزدى ناسيحاتتاۋدى ءبىر عانا تەتىكپەن جۇزەگە اسىرۋدى, جاڭا شىعارمانى, كىتاپتى جىلدام ءارى وڭتايلى جولمەن تاراتۋدى, كىتاپقۇمار وقىرماننىڭ ۋاقىتىن ۇنەمدەۋدى كوزدەيدى. بۇل قوسىمشا كوركەم شىعارمالاردىڭ كوكجيەگىن كەڭەيتىپ قانا قويماي, قازاق تىلىندەگى كونتەنتتىڭ دامۋىنا ۇلەس قوسادى.
