ۇشجاقتى كەلىسىم نە بەرەدى؟

ءبىرىنشى ماسەلە بويىنشا، پرەمەر-مينيستر اتالعان كەلىسىم ۇكىمەت پەن قار­جى رەتتەۋشىلەرىنىڭ كەلىسىلگەن ءىس-قي­مىلدارىن قازىرگى جاعدايلاردا قام­تاماسىز ەتۋگە مۇمكىندىك بەرەتىنىن اتاپ ءوتتى. «حالىقتىڭ تۇرمىس دەڭگەيى مەن ءال-اۋقاتىن ارتتىرۋ – ەلىمىزدىڭ الەۋ­مەت­تىك-ەكونوميكالىق ساياساتىنىڭ نەگىزگى با­سىمدىعى. ول ءۇشىن اقشا-نەسيە، سالىق-بيۋدجەت جانە قۇرىلىمدىق ساياساتتاردى، سونداي-اق قارجى سەكتورىن دامىتۋ سايا­ساتىن ۇيلەستىرۋ قامتاماسىز ەتىلەدى»، دەدى ا.مامين.

بىرلەسكەن شارالاردى ىسكە اسىرۋ ءۇش باعىت بويىنشا جۇزەگە اسىرىلاتىن بولادى. «ماكروەكونوميكالىق تۇراق­تىلىقتى ارتتىرۋ» باعىتى اياسىندا تومەن ينفلياتسيا، قارجى جۇيەسىنىڭ تۇراق­تىلىعى مەن ەكونوميكانىڭ ءوسۋى ارا­سىنداعى تەڭگەرىمدى قامتاماسىز ەتە وتى­رىپ، ىسكەرلىك بەلسەندىلىكتى ىنتالاندىرۋ بويىنشا شارالار قابىلدانادى. ينفلياتسيانى بىرتىندەپ تومەندەتۋ جانە ونى ورنىقتى ەكونوميكالىق وسىمگە ىقپال ەتەتىن تومەن دەڭگەيدە ساقتاۋ جونىندەگى جۇمىس جالعاسادى.

«قارجى نارىعىن دامىتۋ» ەكىنشى باعى­تىن ىسكە اسىرۋ قارجى سەكتورىن دا­مىتۋدىڭ 2030 جىلعا دەيىنگى تۇجى­رىم­داماسىن قابىلداۋدى كوزدەيدى. قارجى جۇيەسىنىڭ تۇراقتىلىعىن جانە ەكونو­ميكانىڭ ءوسۋىن قامتاماسىز ەتۋ قا­جەتتىلىگىن ەسكەرە وتىرىپ، نارىقتىق تەتىكتەر نەگىزىندە ەكونوميكانى بانكتىك كرەديتتەۋدى ەداۋىر كەڭەيتۋ جونىندە شارالار قابىلدانادى.

«ەكونوميكالىق ءوسىمنىڭ ۇزاق مەرزىمدى الەۋەتىن ارتتىرۋ» ءۇشىنشى باعىتى اياسىندا باسەكەگە قابىلەتتى شيكىزاتتىق ەمەس سەكتورعا نەگىزدەلگەن ەكونوميكانىڭ جا­ڭا قۇرىلىمىن قالىپتاستىرۋدى ىنتالاندىرۋ، قوسىلعان قۇننىڭ وڭىرلىك جانە جاھاندىق تىزبەكتەرىنە ەنگىزۋ بويىنشا جۇمىس جالعاسادى. پرواكتيۆتى سىرتقى ساۋدا ساياساتىن جۇرگىزۋ، سونداي-اق ين­ۆەس­تيتسيالاردىڭ جاڭا تولقىنىن تارتۋ جالعاستىرىلادى. «ەكونوميكانىڭ ساپالى جانە ورنىقتى دامۋى ءۇشىن تۇبەگەيلى جاڭا ينستيتۋتسيونالدىق جاعداي جاسالادى. بۇل جاڭا ەكونوميكالىق جاعدايدا حا­لىقتىڭ تۇرمىس ساپاسى مەن ءال-اۋقاتى­نىڭ ارتۋىنا ىقپال ەتەدى»، دەدى ا.ما­مين.  

پرەمەر-مينيستر بارلىق مۇددەلى مەم­لەكەتتىك ورگاندارعا كەلىسىم ءىس-شارا­لارىنىڭ بەلگىلەنگەن مەرزىمدە ساپا­لى ورىندالۋىن قامتاماسىز ەتۋدى تاپ­سىردى.

بيىل 17 ملن شارشى مەتر تۇرعىن ءۇي سالىنادى

ۇكىمەت وتىرىسىندا قارالعان تۇرعىن ءۇي ساياساتىنداعى جاڭا تاسىلدەر تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، «باي­تەرەك» ۇلتتىق باسقارۋشى حولدينگى» اق باسقارما توراعاسى ايدار ءارىپحانوۆ، «وتباسى بانكى» اق باسقارما توراعاسى ءلاززات يبراگيموۆا، «Qazaq stroy» جشس اتقارۋشى ديرەكتورى نۇرلان ارتىقباەۆ، شىعىس قازاقستان وبلىسىنىڭ اكىمى دانيال احمەتوۆ، قاراعاندى وبلىسىنىڭ اكىمى جەڭىس قاسىمبەك، شىمكەنت قالاسىنىڭ اكىمى مۇرات ايتەنوۆ، نۇر-سۇلتان قالاسىنىڭ اكىمى التاي كولگىنوۆ، پرەمەر-ءمينيستردىڭ ورىنباسارى رومان سكليار بايانداما جاسادى.

ءوز بايانداماسىندا ب.اتامقۇلوۆ 2020 جىلى رەسپۋبليكا بويىنشا 15،3 ملن شارشى مەتر تۇرعىن ءۇي سالىنعانىن، 140 مىڭنان استام باسپانا پايدالانۋعا بەرىلگەنىن اتاپ ءوتتى. تۇرعىن ءۇي قۇرى­لىسىنا ينۆەستيتسيالار 2019 جىلمەن سا­لىستىرعاندا 33،6%-عا ءوسىپ، 2 ترلن تەڭگەنى قۇرادى.  مەملەكەتتىك قاراجات­تىڭ 1 تەڭگەسىنە 5 تەڭگە جەكە ينۆەستيتسيا تارتىلدى. «38،4 مىڭ وتباسىنا مەم­لەكەتتىك قولداۋ كورسەتىلدى. ونىڭ ىشىن­دە 28 مىڭ الەۋمەتتىك تۇرعىن ءۇي تۇرىن­دە جانە 10،4 مىڭ جەڭىلدەتىلگەن زايم بەرىلدى. بيىل قارجىلاندىرۋدىڭ بارلىق كوزدەرى ەسەبىنەن 17 ملن شارشى مەتر تۇرعىن ءۇي سالۋ جوسپارلانۋدا – بۇل 163 مىڭ باسپانا»، دەدى ب.اتامقۇلوۆ.

ءمينيستردىڭ ايتۋىنشا، مەملەكەتتىك ينۆەستيتسيالار ەسەبىنەن كەزەكتە تۇرعان 31،3 مىڭ ادامدى قولداۋ جوسپارلانۋدا. 22،5 مىڭ الەۋمەتتىك باسپانا سالى­نىپ، ساتىپ الىنادى جانە كەزەكتە تۇر­عان­دارعا 8،8 مىڭ جەڭىلدەتىلگەن قارىز­ بەرىلەدى. «كەزەك ماسەلەسىن شەشۋ ءۇشىن مەم­لەكەت باسشىسى بۇعان دەيىن جەرگىلىكتى اتقا­رۋشى ورگاندارداعى تۇرعىن ءۇي كەزە­گىن بەرە وتىرىپ، «قازاقستاننىڭ تۇرعىن ءۇي قۇرىلىس جيناق بانكى» نەگىزىن­دە «وتباسى بانك» تولىققاندى دامۋ جانە قولداۋ ينستيتۋتىن قۇرۋدى تاپسىر­عان بولاتىن. «وتباسى بانك» جۇمىسى­نىڭ نەگىزگى قاعيداتى، اسىرەسە حالىق­تىڭ الەۋ­مەتتىك وسال توپتارى ءۇشىن تۇر­عىن ءۇيدىڭ قولجەتىمدىلىگىن ارتتىرۋعا باعىتتالاتىن بولادى»، دەدى ب.اتام­قۇلوۆ.

«وتباسى بانك» بازاسىندا «تۇرعىن ۇيمەن قامتاماسىز ەتۋ جونىندەگى ورتا­لىق» قۇرىلادى، ول تۇرعىن ۇيگە مۇقتاج­داردى ەسەپكە الۋدى، سونداي-اق تۇرعىن ءۇيدىڭ قولجەتىمدىلىك ساتىسىنا سايكەس تۇرعىن ءۇيدى كەزەككە قويۋ كۇنى بويىنشا ءبولۋدى ورتالىقتاندىرىپ جۇزەگە اسى­راتىن بولادى. «تۇرعىن ۇيمەن قامتا­ماسىز ەتۋ ورتالىعىنىڭ» بازاسى جەكە تۇلعالاردىڭ مەملەكەتتىك دەرەك­قور­لارىمەن ينتەگراتسيالانادى. سونىمەن قاتار مينيستر اتاپ وتكەندەي، بازاعا قايتا ەنگىزۋگە جول بەرىلمەيدى، ازاماتتار مەملەكەتتىك باعدارلامالارعا ءبىر رەت قانا قاتىسا الادى.

«بايتەرەك» ۇبح» اق باسقارما تور­اعاسى ايدار ءارىپحانوۆ وڭىرلەردە قار­جى­لاندىرۋ كولەمىنىڭ ۇلعايۋىنا نازار اۋداردى. ا.ءارىپحانوۆتىڭ ايتۋىنشا، كرەديتتىك تۇرعىن ءۇي قۇرىلىسى بويىنشا اكىمدىكتەر اينالىمىندا قازىر 387 ملرد تەڭگە بار. قۇرىلىس كولەمىن ۇلعايتۋ ءۇشىن بىرىڭعاي وپەراتور نارىق جاعدايىندا قوسىمشا 61 ملرد تەڭگە تارتا الادى. «تارتىلاتىن قورلاندىرۋ قاراجاتتى اعىمداعى كولەمدەرمەن ميكشيرلەۋگە باعىتتالادى، بۇل اكىمدىكتەردىڭ وبليگاتسيالارىن جىلدىق 4،25% بىرىڭعاي مولشەرلەمە بويىنشا ساتىپ الۋعا مۇمكىندىك بەرەدى. بۇل قاراجات اينالىمىن 448،5 ملرد تەڭگەگە دەيىن ۇلعايتۋعا، 2،5 ملن شارشى مەتر تۇرعىن ءۇي سالۋعا مۇمكىندىك بەرەدى»، دەدى ا.ءارىپحانوۆ. 

«نۇرلى جەر» مەملەكەتتىك باعدار­لاماسىن ىسكە اسىرۋ تۋرالى «وتباسى بانك» اق باسقارما توراعاسى ءلاززات يبراگيموۆا ءوز كەزەگىندە «نۇرلى جەر» مەملەكەتتىك باعدارلاماسىن ىسكە اسىرۋ شارالارى تۋرالى حاباردار ەتتى. تۇرعىن ءۇي قۇرىلىس جيناق جۇيەسى شەڭبەرىندە 2019 جىلدان باستاپ 2020 جىلعا دەيىنگى كەزەڭدە جاسالعان شارتتاردىڭ سانى 407 مىڭنان 486 مىڭعا دەيىن، ياعني 19%-عا ءوستى. وسى كەزەڭدە جۇيەگە قاتىسۋشىلار سانى 1 553 مىڭنان 1 862 مىڭعا دەيىن، نەمەسە 20%-عا ءوستى. مەملەكەتتىك باع­دارلاما ىسكە اسىرىلا باستاعاننان بەرى «وتباسى بانكىنە» تۇرعىن ءۇي زاەمدەرىن بەرۋگە 310 ملرد تەڭگە ءبولىندى. ونىڭ ىشىندە 2020 جىلدىڭ تامىز ايىندا «شاڭىراق» باعدارلاماسىنا 90 ملرد تەڭگە ءبولىندى. اعىمداعى جىلى 202 ملرد تەڭگە، ونىڭ ىشىندە ناۋرىز ايىندا «شاڭىراق» باعدارلاماسىنا 120 ملرد تەڭگە الۋ جوسپارلانىپ وتىر.

پرەمەر-ءمينيستردىڭ ورىنباسارى رومان سكليار تۇرعىن ءۇي ساياساتى ماسەلەلەرى ۇكىمەتتىڭ تۇراقتى باقىلاۋىندا ەكەنىن جانە بايانداماشىلاردىڭ ۇسى­نىس­تارىنىڭ تۇرعىن ءۇيدىڭ، اسىرەسە حالىق­تىڭ الەۋمەتتىك وسال توپتارى ءۇشىن قولجەتىمدىلىگىن ارتتىرۋعا باعىت­تال­عانىن اتاپ ءوتتى. «قابىلدانىپ جاتقان شارالار ارقىلى ەل ەكونوميكاسىنىڭ وسۋىنە وڭ اسەر ەتەتىن قۇرىلىس يندۋس­تريا­سىنىڭ جاندانۋىن بولجايمىز. قاجەتتى قۇقىقتىق وزگەرىستەر، سونداي-اق ۇكىمەتتىڭ ۇزاق مەرزىمدى جوسپارلا­رىن ۇلتتىق جوباعا اينالدىرۋ قاراس­تى­رىلعان»، دەدى ر.سكليار.

ماسەلەنى ۇكىمەت باسشىسى اسقار مامين قورىتىندىلادى. «تۇرعىن ءۇي سايا­ساتىن ءتيىمدى ىسكە اسىرۋ ەلباسى نۇر­سۇلتان ءابىش ۇلى نازارباەۆتىڭ 2030 جىلعا قاراي باسپانامەن قامتاماسىز ەتۋدى 1 ادامعا 30 شارشى مەترگە دەيىن جەت­كىزۋ تۋرالى تاپسىرماسىن ورىنداۋعا مۇمكىندىك بەرەدى. مەملەكەت باسشىسى قاسىم-جومارت كەمەل ۇلى توقاەۆ Nur Otan پارتياسىنىڭ سايلاۋالدى باع­دارلاماسىن تانىستىرعان كەزدە الداعى بەس جىلدا 100 ملن شارشى مەتردەن استام ءۇي سالۋدى تاپسىردى. وسىلايشا، ءبىز 1 ملن-عا جۋىق وتباسىن ۇيمەن قام­تاماسىز ەتە الامىز»، دەدى ا.مامين.

پرەمەر-مينيستر العا قويىلعان اۋ­قىمدى مىندەتتەردى ىسكە اسىرۋ ءۇشىن تۇرعىن ءۇي ساياساتى رەفورمالا­نۋ ۇستىندە ەكەنىن اتاپ ءوتتى. جاڭا شارالار كەشەنى تۇرعىن ءۇيدىڭ قولجە­تىم­دىلىگىن ودان ءارى ارتتىرۋدى، جالعا بەرى­لەتىن تۇرعىن ءۇي قۇرىلىسىنا جەكە قۇ­رىلىس سالۋشىلاردىڭ ينۆەستيتسيا­لار اعىنىن ىنتالاندىرۋدى كوزدەيدى. نارىق جاعدايىندا تۇرعىن ءۇيدى قار­جىلاندىرۋ كولەمىن ارتتىرۋ بويىنشا تاسىلدەر ازىرلەندى. بۇل جۇمىستىڭ نەگىز­گى قۇرالى «نۇرلى جەر» مەملەكەتتىك باع­دار­لاماسى اياسىندا جەڭىلدىكپەن بەرىلە­تىن تۇرعىن ۇيلەردى ساتا وتىرىپ، مۇقتاج ازا­ماتتاردىڭ كەزەگىن ورتالىقتان قالىپ­تاستىرىپ، جۇرگىزەتىن «وتباسى بانك» قۇ­رىلعان. بيىل بارلىعى 17 ملن شارشى مەتر تۇرعىن ءۇيدى پايدالانۋعا بەرۋ كوزدەلگەن، بۇل وتكەن جىلمەن سالىس­تىر­عاندا شامامەن 2 ملن شارشى مەتر­گە ارتىق.

يمپورتتالاتىن قۇرىلىس ماتەريال­دارىنىڭ وتاندىق ءوندىرىسىن دامىتۋ اياسىندا جاقىن ارادا گاز-بەتون بلوكتارىن، قاسبەتتىك فيبروتسەمەنتتى پليتالار، جىلۋ وقشاۋلاعىش ماتەريالدار، سەندۆيچ-پانەلدەر، تەمىر-بەتون كونسترۋكتسيالارىن، كەراميكالىق پليتالار ءوندىرۋ بويىنشا جالپى قۇنى 63 ملرد تەڭگەدەن اساتىن جەكە ينۆەستورلاردىڭ جوبالارىن ىسكە اسىرۋ جوسپارلانىپ وتىر.

پرەمەر-مينيستر وسى جىلدىڭ 25 ناۋ­رىزىنا دەيىن تۇرعىن ءۇي ساياساتىن­داعى جاڭا تاسىلدەردى ىسكە اسىرۋ جانە بيىل «نۇرلى جەر» مەملەكەتتىك باع­دار­لاماسىنا ءتيىستى وزگەرىستەر ەنگىزۋ ءۇشىن زاڭناماعا تۇزەتۋلەر ەنگىزۋ تۋرالى زاڭ جوباسىن ۇكىمەتكە ەنگىزۋدى تاپ­سىر­دى. «وڭىرلەردە قۇرىلىس ماۋسىمىن ۋاقتىلى باستاۋ ماڭىزدى. جەر ۋچاسكە­لەرىن دەر كەزىندە ءبولىپ، ولارعا قاجەتتى ين­فراقۇرىلىم جۇرگىزۋ كەرەك»، دەدى ا.مامين.

يندۋستريا جانە ينفراقۇرىلىمدىق دامۋ مينيسترلىگىنە «سامۇرىق-قازىنا» ۇاق» اق جانە «اتامەكەن» ۇكپ-مەن بىر­لەسىپ، وسى جىلدىڭ 15 ناۋرىزىنا دەيىن قۇرىلىس يندۋسترياسىن دامىتۋ جو­نىندەگى ءىس-شارالاردىڭ ەگجەي-تەگجەي­لى جوسپارىن ازىرلەپ، ۇكىمەتكە ەنگىزۋ تاپسىرىلدى.

سۋ تاسقىنىنا دايىندىق

ۇكىمەت وتىرىسىندا سۋ تاسقىنى كە­زەڭىنە دايىندىق ماسەلەسى قارالدى. بۇل تۋرالى توتەنشە جاعدايلار ءمي­نيسترى يۋري يلين، ەكولوگيا، گەولوگيا جانە تابيعي رەسۋرستار ءمينيسترى ماع­زۇم مىرزاعاليەۆ، يندۋستريا جانە ين­فراقۇرىلىمدىق دامۋ ءمينيسترى بەيبىت اتامقۇلوۆ، اقمولا وبلىسىنىڭ اكىمى ەرمەك مارجىقپاەۆ، پاۆلودار وبلىسىنىڭ اكىمى ابىلقايىر سقاقوۆ، سولتۇستىك قازاقستان وبلىسىنىڭ اكىمى قۇمار اقساقالوۆ، پرەمەر-ءمينيستردىڭ ورىنباسارى رومان سكليار بايانداما جاسادى.

ماسەلەنى قورىتىندىلاعان ۇكىمەت باسشىسى اسقار مامين «قازگيدرومەت» رمك-ءنىڭ وزەن باسسەيندەرىندەگى قار قورىنىڭ كولەمى بويىنشا الدىن الا جاساعان بولجامدارى كەزەڭنىڭ قولايلى جاعدايدا وتەتىندىگىن بىلدىرەتىنىن ايتتى. بىراق قاردىڭ قارقىندى ەرۋى جانە قاتتى جاۋىن-شاشىن بولعان جاعدايدا بىرقاتار وڭىردە سۋ تاسقىنى جاعدايى كۇردەلەنۋى مۇمكىن.

قازىرگى تاڭدا ءىرى سۋ قويمالارىنىڭ ورتا­شا تولىمدىلىعى 70-75%-دى قۇراي­دى. 6 مىڭ سۋ شارۋاشىلىعى قۇرىلىس­تارىنىڭ 500-گە جۋىعىن جوندەۋ قاجەت. ەلدى مەكەندەردى سۋ تاسقىنىنان قورعاۋ ءۇشىن 2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسى بەكىتىلدى، ونى ىسكە اسىرۋعا 160 ملرد تەڭگەدەن استام قاراجات ءبولۋ جوس­پارلانۋدا.

الداعى سۋ تاسقىنى كەزەڭىنە دايىن­دىق اياسىندا وڭىرلىك دەڭگەيدە توتەنشە جاعدايلار جونىندەگى كوميسسيانىڭ وتىرىستارى وتكىزىلدى، جانار-جاعار­ماي، ينەرتتى ماتەريالدار مەن قاپ قور­لارى قالىپتاستىرىلدى، شۇعىل شىعىندارعا ارنالعان توتەنشە رەزەرۆتەر قاراستىرىلدى، سانى 38 مىڭنان اس­تام ادام، شامامەن 13 مىڭ بىرلىك تەح­نيكا، 500-دەن استام ءجۇزۋ جانە 2500-دەن استام سۋ ايدايتىن قۇرالدان تۇراتىن ازاماتتىق قورعاۋ قۇرالىمدارى ايقىندالدى. ەلدى مەكەندەردەن 13 ملن تەكشە مەتردەن استام قار شىعارىلدى.

ناۋرىز ايىنىڭ باسىندا «كوك­تەم-2021» رەسپۋبليكالىق كوماندالىق-شتابتىق وقۋ-جاتتىعۋىن وتكىزۋ جوسپارلانۋدا، ونىڭ بارىسىندا ازاماتتىق قورعاۋدىڭ مەملەكەتتىك جۇيەسىنىڭ دايىن­دىعى تەكسەرىلەدى. تجم اۆاريا­لىق-قۇتقارۋ بولىمشەلەرىنىڭ كۇشتەرى مەن قۇرالدارىنىڭ توبىن قۇردى، اتاپ ايتساق، 10 مىڭنان استام قىزمەتكەر، 1800-دەن استام تەحنيكا، 27 تىكۇشاق، 330 ءجۇزۋ قۇرالى جانە 1،3 مىڭ موتوپوم­پا دايىن. ازاماتتىق قورعانىس اسكەري بولىمدەرىندە 3 مىڭ ادامعا ارنالعان شاتىرلى لاگەرلەر دايىندالدى، قاز­اۆياقۇتقارۋ اۋە كەمەلەرى تۇراقتى دايىندىقتا تۇر.

سۋ تاسقىنىنىڭ الدىن الۋ ءۇشىن جۇيەلى شارالار قابىلداۋ قاجەتتىگىن اتاپ كورسەتكەن ا.مامين ءبىر اي ىشىندە گيد­روتەحنيكالىق قۇرىلىستاردى جوندەۋ مەرزىمدەرىن جانە سۋقويمالارىن تول­تى­رۋدىڭ قاۋىپسىز كولەمىن انىقتاۋدى تاپسىردى. اقتوبە، قاراعاندى، پاۆلودار جا­نە سولتۇستىك قازاقستان وبلىستارىنىڭ اكىم­دىكتەرىنە زاڭناماعا سايكەس قاراۋ­سىز جاتقان گيدروتەحنيكالىق قۇرى­لىستار بويىنشا مەنشىك قۇقىعىن بەرۋ ماسەلەسىن اياقتاۋدى مىندەتتەدى. ين­دۋستريا جانە ينفراقۇرىلىمدىق دامۋ مينيسترلىگىنە جانە وڭىرلەردىڭ اكىمدىكتەرىنە اۆتوموبيل جولدارىندا سۋ باسۋعا جول بەرمەۋ، كوپىرلەر مەن سۋ وتكىزۋ قۇرىلىستارىن ۋاقتىلى دايىنداۋ تاپسىرىلدى. «وڭىرلەردىڭ اكىمدەرى قار شىعارۋ، ارىقتاردى، نوسەر كارىزدەرىن تازارتۋ، ۋاقىتشا جەر ۇيىندىلەرى مەن بوگەتتەردى تۇرعىزۋ جۇمىستارىنىڭ، ونىڭ ىشىندە اۋىلدىق ەلدى مەكەندەر مەن تۇرعىن ءۇي الاپتارىندا ۋاقتىلى جۇرگىزىلۋىن قامتاماسىز ەتۋى قاجەت»، دەدى ا.مامين.

توتەنشە جاعدايلار مينيسترلىگىنە وڭىرلەردىڭ اكىمدەرىمەن بىرلەسىپ، ءتيىستى جەدەل شتابتار قۇرۋ، الداعى سۋ تاسقىنى كەزەڭىنە كۇشتەر مەن قۇرالداردىڭ دايىن بولۋىن جانە سۋ تاسقىنى قاۋپى بولۋى مۇمكىن كەزدە حالىقتى ۋاقتىلى حا­بار­دار ەتۋ تاپسىرىلدى. ۇكىمەت باس­شىسى سۋ باسۋ قاۋپى مەن تۋىنداۋى كەزىن­دەگى ءىس-قيمىل ەرەجەلەرىنە سايكەس حالىقتى اقپا­راتتاندىرۋ جونىندەگى جۇمىستى جانداندىرۋ قاجەتتىگىن اتاپ ءوتتى.