ونەر • 23 اقپان، 2021

قىلقالام اشقان قۇندىلىق

28 رەت كورسەتىلدى

اسپان مەن جەردى بايلانىستىرىپ تۇرعان نە؟ اۋا ما، الدە عالامشاردىڭ ماگنيتتىك ءورىسى مە؟ بالا كوڭىلىندە گۇلدەگەن ءاربىر ويدىڭ تۇبىنە ۇڭىلسەڭىز ۇلكەن ماعىنا جاتقانداي. سودان با، الەم بالدىرعانداردىڭ كوزىمەن قاراعاندا عانا ادەمى ءھام شىم-شىتىرىققا تولى. تانىمال سۋرەتشى تولەۋبەك مۇقاشەۆتىڭ «بالالىق شاققا ساياحات» اتتى جەكە كورمەسىنە بارعاندا، سان ءتۇرلى تولعانىس سانامىزدا بۇرلەدى. كەنەت بالداۋرەن شاققا قايتا ساپار شەككەندەي بولدىق.

كورمە ۇلتتىق مۋزەيدە ۇيىمداس­تىرىلدى. ماقسات – سۋرەتشىنىڭ تاۋاندى تاريح پەن مادەنيەت تاقىرىپتارىنا ارنالعان شىعارمالارىن ونەرسۇيەر قاۋىمعا كەڭىنەن ناسيحاتتاۋ.

سالتاناتتى شارانىڭ بەتاشار ءسوزىن ۇلتتىق مۋزەي ديرەكتورى ارىستانبەك مۇحامەدي ۇلى سويلەدى.

«تولەۋبەك تولەۋ ۇلى ءومىر بويى ىزدە­نىستە جۇرەتىن، ومىرگە دە، ونەرگە دە شىن عاشىق جان. سەبەبى رەاليست سۋرەتشى بار الەم تەك تاڭعاجايىپتان تۇرادى دەپ ءومىر سۇرەدى. بۇعان سۋرەتشىنىڭ قىلقالامىنان شىققان پەيزاجدىق تۋىندىلارى ايقىن دالەل. كورمەنىڭ «بالالىق شاققا ساياحات» اتالۋى دا بەكەر ەمەس. تولەۋبەك مۇقاشەۆتىڭ بالا كەزىنەن باستاۋ العان شىعارمالارىنان جان دۇنيەسىنىڭ تازالىعىن، ەلى مەن جەرىنە دەگەن شەكسىز سۇيىسپەنشىلىگىن بايقاۋعا بولادى»، دەدى ا.مۇحامەدي ۇلى.

پەيزاج قىلقالام شەبەرىنىڭ جانىنا جاقىن جانر. سۋرەتشى ءۇشىن تۇمسا تابيعات قاشاندا سۇلۋلىق پەن تازا­لىق­تىڭ ماڭگىلىك ۇيلەسىم تاپقان نۇرلى مەكەنى. تۋعان جەر ونىڭ بارلىق شىعار­مالارىنىڭ وزەگى دەسە دە بولادى. ەكسپو­زيتسياعا ۇسىنىلعان 50-گە جۋىق كارتينادا جەتىسۋ جەرىنە ءتان ادەمى پەيزاجدى، قىزعالداعى جايناعان دارحان دالانى، تىنىشتىققا بوككەن تابيعات تىلسىمىن شىنايى جەتكىزگەن. سونىسىمەن وقىرمانداردى وزىنە ەلىتىپ الادى. ءاربىر تۋىندى بالاعا ەرتەگى ايتىپ وتىرعان اجەدەي الاڭسىز جىلداردىڭ كوركەم كورىنىسىن كوز الدىنا اكەلەدى.

شارا بارىسىندا بەلگىلى قوعام جانە مەملەكەت قايراتكەرى بىرعانىم ءايتىموۆا: «بۇل ءوزى ەرەكشە كورمە. سەبەبى تولەۋبەك تو­لەۋ ۇلى – قازاقستاندا مەملەكەتتىك قىز­­مەتىمەن قاتار، ونەرىن دە دامىتىپ، كوپ­شىلىككە ۇسىنعان ءبىرىنشى سەناتور. بۇ­گىنگى كورمە ونىڭ تۋعان جەرىنە دەگەن ال­عىسى، سۇيىسپەنشىلىگى، ماحابباتى»، دەپ اق­جارما تىلەگىن جولداسا، سەناتور با­قىت­جان جۇماعۇلوۆ پەن مەملەكەت قايرا­ت­كەرى جاق­سىبەك قۇلەكەەۆ سۋرەتشى تۋىن­دى­لا­رىنىڭ كەلەشەك ۇرپاق ءۇشىن تاۋسىل­ماس رۋحاني ازىق بولاتىندىعىن اتاپ ءوتتى. 

كەنەپ بەتىنە تۇسكەن سان ءتۇرلى بوياۋلار بالا قيالىنا بىتكەن الۋان اسەرلەر. سول اياۋلى شاقتار سانا تۇبىندە قاتتالىپ، سان جىلدان كەيىن تاماشا تۋىندىلارعا اينالعان. مۇنداعى كارتينالاردىڭ قۇ­پياسى سوندا. اۆتوردىڭ كىندىك قانى تامعان توپىراعىنا دەگەن ساعىنى­شى سۋرەتكە ۇلاسىپ، تۇستەرگە ءار بەرىپ تۇر.

ايتا كەتەيىك، قىلقالام شەبەرىنىڭ تۋىندىلارىن تاماشالايمىن دەگەن كوپشىلىك ءۇشىن كورمە ەكى اي بويى ۇلتتىق مۋزەيدە ەكسپوزيتسيالانادى.

سوڭعى جاڭالىقتار

تاميلانىڭ تارتۋى

ونەر • كەشە

مۋتاتسيالانعان ۆيرۋس

مەديتسينا • كەشە

ۇقساس جاڭالىقتار