شارانى اشىپ, ءسوز العان قورىق-مۋزەي ديرەكتورى نۇربولات احمەتجانوۆ: «بۇل كونفەرەنتسيا تاۋەلسىزدىگىمىزدىڭ 30 جىلدىعىنا وراي وتكىزىلىپ وتىر. ەگەمەندىككە قول جەتكىزگەن جىلداردان باستاپ ەلىمىزدەگى تاريحي-مادەني ورىندار قايتا تۇلەپ, ەجەلگى مۇرالار قالپىنا كەلە باستادى. سونىڭ ءبىرى – تۇركىستان قالاسىنداعى قاسيەتتى نىساندار. اتالمىش عىلىمي شارا 30 جىلدا قول جەتكىزگەن جەتىستىكتەرىمىز بەن زەرتتەۋ ەڭبەكتەرىمىزگە, سونىمەن قاتار كونە مۇرالاردىڭ اشىلۋى ءتيىس رۋحاني بەتتەرىن زەرتتەپ-زەردەلەۋگە تىڭ سەرپىن بەرىپ, عالىمدارىمىزدىڭ پىكىرلەرىمەن تولىعا تۇسەتىنىنە سەنىمىمىز مول. كونفەرەنتسياعا قاتىسىپ وتىرعان تاريحشى مامانداردىڭ اتقارعان ەڭبەكتەرى – «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ عىلىمي جۇمىستارىنىڭ جاندانۋىنا ولشەۋسىز ۇلەس قوسىپ كەلدى. وسى باعىتتا قورىق-مۋزەي جانىنان تاريحي ورىندار مەن تۇلعالارعا ارنالعان كىتاپتار شىعارىلۋدا. تاعى دا ءبىر قۋانىشتى جاڭالىق – قوجا احمەت ياساۋي كەسەنەسىندە جەرلەنگەن تۇلعالار ءتىزىمى جاڭاردى. عىلىمي كەڭەس بۇعان دەيىن بەلگىسىز بولىپ كەلگەن 12 تۇلعانىڭ وسىندا جەرلەنگەنى تۋرالى تاريحي دەرەكتەردى تاپتى. بۇگىنگى باسقوسۋ بارىسىندا تىڭ تاقىرىپتار قوزعالىپ, پىكىر بىلدىرىلەدى, بۇل ءاربىر تاقىرىپتىڭ مازمۇنىن اشىپ, ناقتىلانۋىنا جول اشارى انىق» دەدى.
باسقوسۋ بارىسىندا كونە جانە جاڭا تۇركىستاننىڭ تاريحي دامۋ ساباقتاستىعى, 30 جىل ىشىندە اتقارىلعان جۇمىستار, ەلباسى نۇرسۇلتان نازارباەۆتىڭ تۇركىستان قالاسىن دامىتۋ جانە تاريحي ورىنداردى قايتا جاڭعىرتۋ جولىنداعى سەرپىندى ىستەرى, ۇلتتىق سانا, ۇلى دالا ەلى ۇعىمىنىڭ مازمۇنى, ورتاعاسىرلىق قالالاردىڭ زەرتتەلۋى مەن تاريحى, قوجا احمەت ياساۋي دۇنيەتانىمىنىڭ ءمانى, ارحەولوگيالىق قازبا جۇمىستار بارىسىنداعى عىلىمي جەتىستىكتەر, تۇلعالار ءىزى قالعان قاسيەتتى مەكەندى تانىتۋ باعىتىندا ءوربىپ, جوعارىدا اتاپ وتىلگەن باعىتتارعا قاتىستى باياندامالار تىڭدالدى.
