فورۋم جۇمىسىنا دۇنيەجۇزىلىك مەتەورولوگيالىق ۇيىمنىڭ باس حاتشىسى پەتتەري تاالاس, تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي, سونداي-اق تۇركيا رەسپۋبليكاسى, قازاقستان, ءازىربايجان, قىرعىزستان, سولتۇستىك كيپر, تۇركىمەنستان جانە وزبەكستاننىڭ مينيسترلىكتەرى مەن ۇلتتىق گيدرومەتەورولوگيالىق قىزمەتتەرىنىڭ باسشىلىعى قاتىستى.
ەكولوگيا, گەولوگيا جانە تابيعي رەسۋرستار ۆيتسە-ءمينيسترى سەرىكقالي برەكەشەۆ تۇرىك مەملەكەتتىك مەتەورولوگيالىق قىزمەتىن قۇرىلعانىنا 84 جىل تولۋىمەن قۇتتىقتاپ, تۇركى الەمىندەگى اپاتتارعا توزىمدىلىكتى ارتتىرۋدا مەتەورولوگيالىق ينفراقۇرىلىمنىڭ ماڭىزدىلىعى تۋرالى بايانداما جاسادى.
ۆيتسە-مينيستر ەكونوميكانىڭ ءتۇرلى سەكتورلارى مەن جالپى حالىق ءۇشىن توتەنشە اۋا رايى قۇبىلىستارى تۋرالى ۋاقىتىلى ەسكەرتۋ قاجەتتىگىن توقتالا كەلىپ, اۋا رايى ءبىزدىڭ ءومىرىمىزدىڭ اجىراماس بولىگى بولىپ تابىلاتىنىن اتاپ ءوتتى. وسىعان بايلانىستى, مۇنداي كەزدەسۋلەر كووپەراتسيا ءۇشىن ءتيىمدى الاڭ بولىپ تابىلادى جانە گيدرومەتەورولوگيالىق مونيتورينگ جانە بولجاۋ سالاسىنداعى جۇمىستى بىرلەسىپ جاقسارتۋعا مۇمكىندىك بەرەدى.
ء «بىزدىڭ جۇمىسىمىزدى جاقسارتۋ ءۇشىن ءبىز ۇنەمى جۇمىس ادىستەرىن جەتىلدىرىپ, ۇسىنىلاتىن ءونىمنىڭ ساپاسىن جاقسارتۋىمىز كەرەك. اۋا-رايى قۇبىلىستارىن تەك ءوز ەلىنىڭ دەرەكتەرىن پايدالانا وتىرىپ جوسپارلاۋ مۇمكىن ەمەس, سوندىقتان باسقا مەتەورولوگيالىق قىزمەتتەرمەن ىنتىماقتاستىق, دەرەكتەرمەن, تاجىريبەمەن الماسۋ جانە مامانداردىڭ بىلىكتىلىگىن ارتتىرۋ ماڭىزدى جانە اجىراماس بولىگى بولىپ تابىلادى», - دەدى سەرىكقالي برەكەشەۆ.
كەزدەسۋ قورىتىندىسى بويىنشا تاراپتار مەتەورولوگيا جانە گيدرولوگيا بويىنشا ستراتەگيالىق جانە عىلىمي جوسپاردى دايىنداۋ بويىنشا جۇمىس توبىن قۇرۋ مۇمكىندىگىن, سونداي-اق وزىق تاجىريبەمەن, حالىقارالىق ستيپەنديالارمەن جانە جوبالىق مۇمكىندىكتەرمەن الماسۋ ماقساتىندا «مەتەورولوگيا بويىنشا تۇركى الەمى فورۋمىنىڭ» ۆەب-پاراعىن تالقىلاۋعا كەلىستى.
