قۇمار اقساقالوۆ پەتروپاۆلداعى كوپقاباتتى ۇيدە بولعان جارىلىستان قازا تاپقانداردىڭ وتباسىلارىنا كوڭىل ايتتى. «قازا تاپقانداردىڭ تۋعان-تۋىستارىنا كوڭىل ايتامىن. اۋرۋحانادا جاتقان 8 ادامعا تەزىرەك ءتاۋىر بولۋلارىنا تىلەكتەسپىن. بولاشاقتا وسىنداي جاعدايلارعا جول بەرمەۋ ءۇشىن كاسىپكەرلەرگە كوپقاباتتى ۇيلەردە گاز باللونىن قولدانۋعا ءۇزىلدى-كەسىلدى تۇردە تىيىم سالىنادى», دەدى ول.
ءوڭىر باسشىسىنىڭ ايتۋىنشا, وسى وقيعاعا بايلانىستى ارنايى كوميسسيا قۇرىلادى. وعان پروكۋراتۋرا, تجد, كاسىپكەرلەر پالاتاسىنىڭ وكىلدەرى, كاسىپكەرلەر جانە پەتروپاۆل قالالىق اكىمدىگىنىڭ ماماندارى كىرەدى. كوميسسيا كوپقاباتتى ۇيلەردىڭ ءبىرىنشى قاباتتارىندا ورنالاسقان كاسىپكەرلىك سۋبەكتىلەرىن تەكسەرمەك.
«عيماراتتى جونگە كەلتىرۋگە قاجەت قاراجات قالا بيۋدجەتىنەن بولىنەدى. پاتەر يەلەرىنە بىررەتتىك ماتەريالدىق كومەك بەرىلەدى. ءبىر دە ءبىر ادام نازارسىز قالمايدى», دەدى سقو اكىمى قۇمار اقساقالوۆ. پەتروپاۆل ارداگەرلەر كەڭەسى جانە قالالىق اكىمدىك زارداپ شەككەندەرگە كومەكتەسۋ ماقساتىندا ارنايى بانك ەسەپشوتىن اشتى.
قايىرىمدىلىق كومەك كورسەتكىسى كەلگەندەر تومەندەگى رەكۆيزيتتەر بويىنشا قارجى اۋدارا الادى:
بين 961141002819 «ارداگەرلەر ۇيىمى» رقب پەتروپاۆل قالالىق فيليالى «بانكتسەنتركرەديت» اق يك KZ 578560000004453692
بيك KCJBKZKX كبە 18, كنپ 119
تەلەفون/فاكس: 8 7152 46-50-71
ەستەرىڭىزگە سالايىق, 21 اقپان كۇنى پەتروپاۆلداعى 5 قاباتتى تۇرعىن ءۇيدىڭ ءبىرىنشى قاباتىندا ورنالاسقان ءدامحانادا گاز باللونى جارىلىپ, ەكى ادام قازا تاپتى. وسى وقيعاعا بايلانىستى قىلمىستىق ءىس قوزعالدى. زارداپ شەككەندەردىڭ ۇشەۋىنىڭ جاعدايى اۋىر.
