وندا دەپۋتاتتار 2021 جىلعى 25 اقپاندا وتەتىن سەنات وتىرىسىنىڭ كۇن ءتارتىبىن تالقىلادى.
پالاتانىڭ الداعى جالپى وتىرىسىندا سەناتورلار «قازاقستان رەسپۋبليكاسىنىڭ حالىقارالىق شارتتارى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن قارايدى. بۇل قۇجات حالىقارالىق قۇقىق سالاسىنداعى ۇلتتىق زاڭنامانى ءارى قاراي جەتىلدىرۋگە جانە حالىقارالىق شارتتاردىڭ ارەكەت ەتۋ ءتارتىبى مەن شارتتارىن انىقتاۋعا ارنالعان.
سونىمەن قاتار سەنات وتىرىسىنىڭ كۇن تارتىبىنە «قازاقستان رەسپۋبليكاسى مەن كورەيا رەسپۋبليكاسىنىڭ اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوباسى دا شىعارىلدى. بۇل زاڭ جوباسى سوتتالعان ادامداردى بەرۋ كەزىندە مەملەكەتتەر اراسىنداعى ىنتىماقتاستىقتى نىعايتۋعا ىقپال ەتەدى. سونىڭ نەگىزىندە سوتتالعان ازاماتتار جازانى ءوز ەلدەرىندە وتەۋگە مۇمكىندىك الادى.
سەناتورلار الداعى پالاتا وتىرىسىندا «1993 جىلعى 22 قازانداعى قازاقستان رەسپۋبليكاسى مەن موڭعوليا اراسىنداعى ازاماتتىق جانە قىلمىستىق ىستەر جونىندەگى ءوزارا كومەك تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن دا قارايدى. حاتتامانى راتيفيكاتسيالاۋ ازاماتتىق جانە قىلمىستىق وندىرىستەر سالاسىندا ءوزارا قۇقىقتىق كومەك كورسەتۋ بويىنشا قۇزىرەتتى ورگانداردىڭ ناقتى قىزمەتىن بەلگىلەۋدى كوزدەيدى. سونداي-اق, اتالعان قۇجات قازاقستان مەن موڭعوليا ازاماتتارىنىڭ قۇقىقتارىن تولىققاندى قورعاۋعا باعىتتالعان.
ودان بولەك, بيۋرودا سەناتورلار ماجىلىستەن كەلىپ تۇسكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۋريستىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا الەۋمەتتىك-مادەني دامۋ جانە عىلىم كوميتەتىن باس كوميتەت ەتىپ بەلگىلەدى.
