تاريحي ماڭىزى بار ەسكەرتكىشتىڭ رەسمي اشىلۋىنا 22 اقپان كۇنى تۇركيا ۇلى ۇلتتىق ءماجىلىسىنىڭ توراعاسى مۇستافا شەنتوپ ارنايى قاتىسادى. وسىلايشا حالىقارالىق تۇركى اكادەمياسى مەن التىنداع اۋدانى مەرياسى «تۇركى ءتىلى جىلى» مەن يۋنەسكو-نىڭ شەشىمىمەن اتاپ وتىلگەن تونىكوك ەسكەرتكىشىنىڭ 1300 جىلدىق مەرەيتويىنا ارنالعان ماڭىزدى ءبىر ءىس-شاراعا ۇيىتقى بولدى. وسى ءىس-شارا اياسىندا التىنداعداعى ءبىر ساياباق «تۇركى الەمى: تونىكوك ساياباعى» دەپ اتالاتىن بولدى.
ساياباق ىشىندە VIII-عاسىردا موڭعولياداعى ورحون وزەنىنىڭ اڭعارىندا ورناتىلعان تونىكوك ەسكەرتكىشىنىڭ كوشىرمەسى ورنالاسقان ارنايى الاڭ سالىندى.
تۇركى الەمىنىڭ كورنەكتى مەملەكەت قايراتكەرلەرىنىڭ ءبىرى تونىكوك ابىزدىڭ ەسىمى التىنداعداعى ساياباققا بەرىلگەنىنە اسا قۋانىشتى ەكەنىن بىلدىرگەن انكارا قالاسى التىنداع اۋدانىنىڭ مەرى اسىم بالجى: «وتكەن جىلدى يۋنەسكو «بىلگە تونىكوك جىلى» دەپ جاريالاعان ەدى. بىراق پاندەمياعا بايلانىستى جوسپارلانعان كوپتەگەن جوبالار اياقتالماي قالدى. وسى ورايدا التىنداع مەرياسى حالىقارالىق تۇركى اكادەمياسىمەن بىرلەسە جۇمىس اتقارىپ, تونىكوك ەسكەرتكىشىنىڭ كوشىرمەسى ورناتىلعان ەڭ كورنەكتى الاڭدى «تۇركى الەمى: تونىكوك ساياباعى» دەپ اتادىق. تۇركى الەمىنە ورتاق ۇيىم تۇركى اكادەمياسىنىڭ وسىنداي جوبالارعا باستاماشى بولعانىنا ۇلكەن ريزاشىلىعىمىزدى بىلدىرەمىز», – دەدى.
